Lua tosi a Samuele 19 - Tosi Tapu

¹ Na au loa o fakasa kia Soape : Ko leinei, kua tagi le sau mo mamae o tupu ko Apesalone.

² Ti na liliu loa le malo, i le aso lena, ko se putu ki le kakai katoa, talie na logo le kakai i le aso lena ki le mamae o le sau, o tupu ko lona vosa.

³ I le aso lena na ulu fakaeteete loa le kakai ki le kolo ofaipe ni kakai kua luma talie na lotou sosola mei se tau.

⁴ Na puloui loa e le sau ona mata, ti na tagi loa a ia o leo lasi : Loku vosa ko Apesalone ! Apesalone, loku vosa, loku vosa !

⁵ Na ulu loa Soape ki le kogafale leia na nofo ai le sau, o pati : Kua ke fakalumai i le aso nei au tagata fakasausau, ala na saofaki ia lou mauli i le aso nei, mo le mauli o ou vosa mo ou taineliki, ti mo le mauli o au avaga mo au tinifu.

⁶ E ke alofa kia latou ala e vesia kiate koe, kae ke vesia kia latou ala e alofa kiate koe, talie kua sa malie i le aso nei e leaise mauiga kiate koe au kau pule mo au kau tagata fakasausau ; ti e kau tio i le temi nei, kanapau na mauli a Apesalone kae motou mamate fuli i le aso nei, na malie ake loa le nea lena kiate koe.

⁷ Tuu ki aluga, ti ke ulu ki fafo, o masau ki au tagata fakasausau ! Talie e kau fakamaoki atu i le suafa o le Eteleno, kapau e leaise ke ulu loa ki fafo, e leaise toe nofo loa se tagata e toka tasi mo koe i le po leinei ; ti e toe veli oki ake loa le nea lena kiate koe i malaia fuli ala kua soko kiate koe, talu mei lou ikiiki o kaku mai ki le aso nei.

⁸ Ti na tuu ake loa le sau o tonatona i le matapa. Na fakasa loa ki le kakai, ko leinei le sau kua tonatona i le matapa o le kolo, ti na au loa le kakai katoa ki mua o le sau. I le temi lena na sola loa Iselaele, o tasi ano ki lona kaiga.

Toe aumai o Tavite e Suta mo Iselaele

⁹ Ti na visi loa le kakai i faasiga fuli o Iselaele, o pati : Na saofaki tatou e le sau mei le lima o otatou fili, ko ia leia na fakamauli ia tatou mei le lima o le kau Filisitini ; ti ko leinei na tonu ke sola a ia mei le fenua i mua o Apesalone.

¹⁰ Kae ko leinei, kua mate i le tau Apesalone, leia na tou fakanofo ke pule kia tatou : Kolea e leaise kotou masasau ai ke toe fakaliliu mai le sau ?

¹¹ I lona fetuu, na kakau loa e le sau ko Tavite ke pati ki tagata faisakilifisio ko Satoke mo Apiatale : Kolua masasau ki le kau matua o Suta, ti kolua pati kia latou : Kolea e kotou muli ai loa i le toe aumai o le sau ki lona fale sau ? Talie kua kaku ki le sau le nea leia kua masaui i Iselaele katoa.

¹² Ko oku fetaina koutou, ko oku ivi koutou mo loku kanofi, kolea ka kotou muli ai loa i le toe aumai o le sau ki lona fale sau ?

¹³ E kotou toe pati loa kia Amasa : Pe leaise ko loku ivi mo loku kanofi a koe, ke tautea au e le Atua i lona makeke katoa mo kapau e leaise ke liliu i oku mua ko le pule o le solia, o fetogi Soape, o lee gato !

¹⁴ Na afei loa e Tavite a loto o tagata fuli o Suta, ti na lotou liliu loa ofaipe se fa tagata e tasi ; na lotou kakau loa ke pati ki le sau : Toe liliu mai, a koe mo au tagata fakasausau fuli.

¹⁵ Na toe liliu loa le sau ti na kaku loa a ia ki le Solotane ; ti na ano loa Suta ki Kilikale o fakafelavei ki le sau ti mo tokoi kiate ia ke fakalaka i le vaitafe.

Loto fakamolemole o Tavite

¹⁶ Ko Simei, vosa o Kele, tagata o Pesamino, leia na nofo i Pasulimi, na fakatavili loa o ifo fakatasi mo le kakai o Suta, o fakafelavei kia Tavite.

¹⁷ Na ano a ia mo kau tagata e tino afe o Pesamino, mo Tesipa, tagata fakasausau o le fale o Saulo, mo vosa e tino agafulu tupu lima o Tesipa mo ana tagata fakasausau e tino lua. Na lotou fakalaka loa i le Solotane i mua o le sau.

¹⁸ Na fai loa e le vaka, leia na tuku ki le sau, le feanoaki o fetuku lona famili ; ti ko leinei, i le lakaga leia na tonu ke fakalaka ai le sau i le solotane, na tutuli loa Simei, vosa o Kela, i ona mua.

¹⁹ Ti na pati loa a ia ki le sau : Ke aua na taofi e le sau laku agaveli, ke galoi e ia lona lauvelii e lau tagata fakasausau i le aso leia na mavae ai le sau loku Aliki i Selusalemi, ti ke aua na tokagai e le sau le nea lena !

²⁰ Talie kua iloa e lau tagata fakasausau lana agasala. Ti ko leinei, kua kau muamua toka tasi mai i le fale o Sosefo i le aso nei, o fakafelavei ki le sau loku aliki.

²¹ Ti na masau loa Apisai, vosa o Teselusa, o pati : Pe leaise tonu ke mate Simei, talie na lauveli a ia ki le filifiliia a le Eteleno ?

²² Kae na pati loa Tavite : E leaise kolua kau i ai, vosa o Teselusa, ti kolea e kolua fakafesagai ai ki aku manatu ? Pe tamate loa se tagata i le aso nei i Iselaele ? Pe leaise kau iloa ko au leia e pule i le aso nei i Iselaele ?

²³ Ti na pati loa le sau kia Simei : E leaise ke mate loa ! Ti na fakapapau loa e le sau le nea lena kiate ia.

²⁴ Na ifo mai foki mo Mefiposete, makopuna o Saulo, o fakafelavei ki le sau. Na leaise fufulu fua e ia ona vae, pe tele lona kaukava, pe fo ona nea lava, talu mei le aso leia na ano ai le sau o kaku ki lana toe liliu mai i le tokamalie.

²⁵ I lana ano ki mua o le sau i Selusalemi, na pati loa le sau kiate ia : Kolea na leaise ke au ai mo au, Mefiposete ?

²⁶ Na tali loa Mefiposete : Ei sau loku aliki, na kakaai au e laku tagata fakasausau, talie ko lau tagata fakasausau, leia e kito, na pati : E kau fakatotonu loa ke teuteui laku asino, ti e kau eke loa ki ai, ti e kau ano loa mo le sau.

²⁷ Ti na loi a ia o uiga mo lau tagata fakasausau ki loku aliki le sau. Kae e fai loku aliki le sau pe se aselo a le Atua. Fai le nea leia e ke malie ia.

²⁸ Talie na tonu ke mamate latou fuli o le fale o loku tamana i mua o le sau loku aliki ; kae na ke tuku lau tagata fakasausau ke kai mo latou ala e kai i lou laupapa. Kolea le nea koi mafai ke kau kole ki le sau ?

²⁹ Na pati loa le sau kiate ia : Kolea le uiga o masau fuli ana ? Kua oki i laku fakasa, ko koe mo Tesipa, e kolua vaelua loa a kele.

³⁰ Ti na pati loa Mefiposete ki le sau : Ke too fuli e ia a kele, talie kua toe ulu le sau loku aliki ki lona fale sau i le tokamalie.

³¹ Na ifo loa Palesilai, le tagata Kalaate, mei Lokelime, ti na fakalaka loa a ia i le Solotane mo le sau, o ave a ia ki leia ake fetuu o le solotane.

³² Ko leinei na matua ai Palesilai, na fetuu kau valu. Na taupau e ia le mauli o le sau i lana nofo i Maanaimi, talie ko se tagata mou koloa a ia.

³³ Na pati loa le sau kia Palesilai : Au mo au, ti e kau taupau loa a koe i loku fale i Selusalemi.

³⁴ Kae na tali loa Palesilai ki le sau : Pe koi toe fetuu e fia ki loku mauli, ke kau pale ai mo le sau ki Selusalemi ?

³⁵ Ko loku fetuu kau valu leinei. Pe mafai ke kau iloa le nea e malie mo le nea e veli ? Pe mafai ke iloa e lau tagata fakasausau le malie o nea kai mo nea inu ? Pe koi mafai ke kau logo ki le leo o tagata mo fafine sua ? Ti kolea e liliu ai loa lau tagata fakasausau ko se kavega ki loku aliki le sau ?

³⁶ E ano fakaikiiki loa lau tagata fakasausau mo le sau ki leia atu fetuu o le solotane. Ti kolea e tuku mai ai loa e le sau le kalasia lena kiate au ?

³⁷ Ke toe liliu nei lau tagata fakasausau, ti ke kau mate loa i loku kolo, o ofi ki le tanuma o loku tamana mo loku tinana ! Kae ko leinei, e ano loa mo le sau loku aliki lau tagata fakasausau ko Kimame, loku vosa ; ke ke fai kiate ia le nea leia e ke malie ia loa.

³⁸ Na pati loa le sau : Ke fakalaka Kimame mo au, ti e kau fai loa kiate ia le nea leia e ke loto loa ki ai ; ko nea fuli ala e ke loto loa ki ai meiate au, e kau soli atu loa a ia kiate koe.

³⁹ I le oki o le fakalaka o le kakai katoa i le solotane, ti na fakalaka foki mo le sau, na sogi loa le sau kia Palesilai mo tapuaki kiate ia. Ti na toe liliu loa Palesilai ki lona kaiga.

⁴⁰ Na ano loa le sau o fakaaga ki Kilikale, ti na ano loa Kimame mo ia. Na fakafeao ki le sau le kakai katoa o Suta mo le vaelua o le kakai o Iselaele i lana fakalaka i le solotane.

⁴¹ Kae ko leinei, na au loa a tagata fuli o Iselaele ki le sau, o pati kiate ia : Kolea na too ai a koe e omatou fetaina, tagata o Suta, ti na lotou fakafeao ai ki le sau ke fakalaka i le solotane, mo lona famili, mo le kakai katoa a Tavite ?

⁴² Na tali loa tagata fuli o Suta ki tagata o Iselaele : Talie e motou ofi ake ki le sau ia koutou ; ti kolea e kotou ita ai i le nea lena ? Pe na motou mauli mei le sau ? Pe na soli e ia kia matou ni nea alofa ?

⁴³ Ti na tali loa a tagata o Iselaele ki tagata o Suta : E motou kau tua kau agafulu ki le sau, ti e toe lasi ake kia Tavite ia koutou. Kolea na kotou fakanoai ai matou ? Pe na leaise ko matou ala na uluaki manatu ke toe aumai lomatou sau ? Ti na masau loa a tagata o Suta o makeke ake i tagata o Iselaele.