Lua tosi a Samuele 18 - Tosi Tapu

Lava mo le mate o Apesalone

¹ Na lau loa e Tavite le kakai leia na nofo mo ia, ti na fakanofo loa e ia ni pule solia ki tino afe mo tino lelau.

² Na tuku loa e ia le vaega tolu o le kakai ke taki e Soape, ko le tasi vaega tolu ke taki e Apisai, taina o Soape, vosa o Teselusa, ti ko le tasi vaega tolu ke taki e Itai, mei Kate. Ti na pati loa le sau ki le kakai : Ko au foki, e kau loto ke kau ano mo koutou ki le tau.

³ Kae na pati loa le kakai : E leaise ke ano loa ki le tau ! Talie kapau e motou sosola loa, e leaise tokaga loa le fili kia matou ; ti kapau e mate loa le vaelua o le kakai, e leaise tokaga loa a ia ki ai ; kae ko koe, e ke tatau mo se tino agafulu afe o matou ; koia i le lakaga nei, e malie ake ke ke nofo i le kolo, o aumai mei ai se tokoi kia matou.

⁴ Na tali loa le sau kia latou : E kau fai loa le nea leia e malie kia koutou. Ti na tuu loa le sau i le fetuu o le matapa o le kolo, kae fakasolo loa le solia ki fafo i tino lelau mo tino afe.

⁵ Na tuku loa e le sau le fakatotonu leinei kia Soape, mo Apisai, mo Itai : Kapau e kotou alofa kiate au, ke aua na kotou fai loa se nea veli ki loku vosa ko Apesalone ! Ti na logo loa le kakai katoa ki le fakatotonu a le sau ki pule tau fuli o uiga mo Apesalone.

⁶ Na ano loa le kakai ki fafo ke tau ki Iselaele, ti na soko loa le tau i le ulu vao o Efalaimi.

⁷ I ai na tamate loa le solia a Iselaele e le kau tagata fakasausau a Tavite, ti na lasi ai le kau mate i le aso lena, ko le tino lua afe.

⁸ Na mafola le tau i le fenua katoa lena, ti na api ake le kau mate o tupu ko le vaomatua ia latou ala na mate i le tau.

Tamate o Apesalone e Soape

⁹ Na fetaulaki loa Apesalone mo le kau tagata a Tavite. Na eke a ia i se osi. Na ulu loa le osi i lalo o laa kopikopi o se telepenite lasi ai, ti na pikiia loa le ulu o Apesalone i laa o le laakau ; ti na tautau loa a ia i le vasa o le lagi mo le kele, kae na fakalaka atu loa lana osi ki se tasi ganea.

¹⁰ Na tio loa se tagata kiate ia, ti na au loa a ia, o pati kia Soape : Ko leinei, na kau tio kia Apesalone kua tautau i se telepenite.

¹¹ Ti na pati loa Soape ki le tagata leia na aumai ia le logo lena : Na ke tio ai kiate ia ! Kolea na leaise ke tamate a ia i le ganea lena ? E kau soli loa kiate koe a fa sikele paaga e kau agafulu mo se kilii pipi.

¹² Kae na pati loa le tagata lena kia Soape : Kapau foki e kau too loa i loku lima ni fa sikele paaga e afe, e leaise kau fafa loa ki le vosa o le sau ; talie na tou logo fuli ki le fakatotonu leia na fai e le sau kiate koe, mo Apisai, mo Itai : Ke kotou tokaga ki loku vosa ko Apesalone !

¹³ Ti kapau na kau tamate fakafufu loa a ia, e leaise munia loa le nea lena ki le sau, ti e ke toe fakafesagai loa mo koe totonu kiate au.

¹⁴ Na pati loa Soape : E leaise kau masau fualoa mo koe ! Ti na too loa e Soape a fa tao e tolu, o sukii ki le mafu o Apesalone, leia na koi mauli malie i loto malie o laa o le telepenite.

¹⁵ Na takatakai loa Apesalone e tama tupulaga e tino agafulu ala na amo ia a masafu a Soape, ti na lotou taai loa a ia mo tamate loa a ia.

¹⁶ Na fakatotonu loa e Soape ke pupusi le fakatagi pupusi ke taofi le tau ; ti na foki mai loa le kakai mei le tuli o Iselaele.

¹⁷ Na lotou too loa Apesalone, ti na lotou ti loa a ia ki se fa popoko lasi i le vaomatua, ti na lotou laku loa ni fatu i aluga. Na sola loa Iselaele katoa, o tasi ano ki lona falela.

¹⁸ I le temi leia na mauli ai Apesalone, na fakatuu e ia sona fatu fakamanatu i le vaivailiua o le sau ; talie na pati a ia : E leai soku vosa ke taupau ia le fakamanatu o loku igoa. Ti na tuku loa e ia lona igoa totonu ki le fatu lena, leia koi fakaigoa i le aso nei ko le fatu fakamanatu o Apesalone.

Mamae o Tavite

¹⁹ Na pati loa Asimaate, vosa o Satoke : Tuku ke kau makape o fakasa ki le sau le logo malie leinei, kua fakasa e le Eteleno kiate ia lana faitotonu o saofaki a ia mei lima o ona fili.

²⁰ Na pati loa Soape kiate ia : E leaise ko koe leia e tonu ke ave ia a logo i le aso nei ; koi ke ave ia loa a logo i se tasi ake aso, kae leai i le aso nei, talie kua mate le vosa o le sau.

²¹ Ti na pati loa Soape kia Kusi : Ano, ti ke fakasa ki le sau le nea leia kua ke tio ki ai. Na punou loa Kusi i mua o Soape, ti na makape loa a ia, o ano.

²² Na toe pati loa Asimaate, vosa o Satoke, kia Soape : E logo ai le nea leia ka soko, e kau kole atu ke tuku mai ke kau makape i muli o Kusi. Ti na pati loa Soape : Kolea e ke loto ai ke ke makape, ei loku vosa ? E leaise malie loa le logo lena kiate koe.

²³ Kae na toe pati Asimaate : E logo ai le nea ka soko loa, e kau loto ke kau makape. Ti na pati loa Soape kiate ia : Makape ! Na makape loa Asimaate i le ala o le toafa, ti na fakalaka loa a ia ia Kusi.

²⁴ Na nofo Tavite i le vasa o matapa o le kolo. Na pale loa le tagata leo ki le ato o le matapa i le paa ; ti na tio loa a ia ki mamao. Ti ko leinei, na makape mai se tagata e toka tasi.

²⁵ Na kalaga loa le tagata leo, o fakasa a ia ki le sau. Na pati loa le sau : Kapau e toka tasi a ia, ti e aumai e ia ni logo. Ti na fakafeofi tuumau mai le tagata lena.

²⁶ Na tio loa le tagata leo ki se tasi ake tagata leia na makape mai ; ti na kalaga loa a ia ki le tagata tuu matapa : Ko leinei se tasi tagata e makape toka tasi mai. Na pati loa le sau : E toe aumai foki e ia ni logo.

²⁷ Na pati loa le tagata leo : E fai le makape a leia e mua mai pe leia a Asimaate, vosa o Satoke. Ti na pati loa le sau : Ko le tagata malie a ia, ti e aumai e ia ni logo malilie.

²⁸ Na kalaga loa Asimaate, o pati ki le sau : Kua ano malie a nea fuli ! Na punou loa a ia ki le kele i mua o le sau, o pati : Ke fakafetai ki le Eteleno, lou Atua, leia kua tuku ia a tagata ala na siki ia olatou lima ke agatuu ki le sau, loku aliki !

²⁹ Na pati loa le sau : Pe malie le tupulaga ko Apesalone ? Na tali loa Asimaate : I le lakaga leia na kakau mai ai e Soape le tagata fakasausau a le sau mo au ko lau tagata fakasausau, na kau tio ki se maveuveu lasi, kae na leaise kau iloa lona tupuaga.

³⁰ Ti na pati loa le sau : Ke ke tuu fakafetuu, ti na tuu fakafetuu loa Asimaate.

³¹ Na kaku mai loa a Kusi. Ti na pati a ia : Ke iloa e le sau, loku aliki, le logo malie ! I le aso nei kua tuku atu kiate koe e le Eteleno lana faitotonu, talie kua saofaki e ia a koe mei lima o latou fuli ala na malaga ke agatuu kiate koe.

³² Na pati loa le sau kia Kusi : Pe malie le tupulaga ko Apesalone ? Na tali loa a Kusi : Ke lotou faipe le tupulaga lena, a fili o le sau loku aliki mo latou fuli ala e malaga kiate koe, ke agatuu kiate koe !

³³ Koia na mamae lasi ai le sau, ti na pale loa a ia ki le kogafale i aluga o le matapa, o tagi loa. Na pati a ia i lana saele : Ei loku vosa ko Apesalone ! Ei loku vosa, ei loku vosa ko Apesalone ! Kolea na leaise kau mate ai o fetogi a koe ! Apesalone, loku vosa, loku vosa !