Lua tosi a Samuele 17 - Tosi Tapu

Fakanoai o tokoi a Asitofele e Usai

¹ Na pati loa Asitofele kia Apesalone : Tuku mai ke kau filifili se kau tagata e tino agafulu tupu lua afe ! E kau tuu loa ti e kau tuli loa Tavite i le po fai leinei.

² E kau osoi fakaofolele loa a ia i le temi leia e loto gaegae ai a ia ti mo gaegae ai ona lima, ti e kau fakamanavase loa a ia, ti e sosola loa le kakai katoa leia e nofo mo ia. E kau taai loa le sau toka tasi,

³ ti e kau toe aumai loa kiate koe le kakai katoa. Ko le mate o le tagata leia e ke vesia ki ai, e fakafaigaofie ia loa le toe liliu mai o tagata fuli, ti e nofo loa le kakai katoa i le tokamalie.

⁴ Na malie le masau lena kia Apesalone mo le kau matua fuli o Iselaele.

⁵ Kae na pati loa Apesalone : Ke toe kalagai mai mo Usai, le tagata Alekite, ti ke tou logo foki ki le nea e pati loa a ia ki ai.

⁶ Na au loa Usai kia Apesalone, ti na pati loa Apesalone kiate ia : Ko leinei le masau a Asitofele ; pe tonu ke tou fai le nea leia na pati a ia ki ai pe leai ? Masau mai, a koe !

⁷ Na tali loa Usai kia Apesalone : I le faiaga leinei, e leaise malie le tokoi leia na soli e Asitofele.

⁸ Ti na pati loa Usai : E ke iloa le loto toa o lou tamana mo ana kau tagata, e lotou itaita ofaipe se uluso fafine i le vao, leia kua kaia mei ai ona uviki. Ko se tagata tau lou tamana, ti e leaise nofo loa a ia mo le kakai i le pouli.

⁹ Ko leinei, kua lagi mumuni a ia i se popoko pe ko se tasi ake ganea. Ti kapau i le kamataaga e vivilo loa ni iki i lau solia ia latou, e leaise tuvai loa le mafola o le logo lena, ti e pati loa : Kua lava le kakai leia e muli ia Apesalone !

¹⁰ Ti ko le tagata leia e loto toa ofaipe se laione, e gaegae loa ; talie e iloa e Iselaele ko se toa lou tamana ti e nofo a ia mo ni tagata toa.

¹¹ Koia e kau manatu ke fakatasii fuli mai a Iselaele kiate koe, mei Tane o kaku ki Peele-Sepa, ke api ofaipe le one o le mata tai. Ti ko koe, ke ke saele totonu loa mo latou ki le tau.

¹² E tou kaku loa kiate ia i le ganea leia e tou maua ai loa a ia, ti e tou vilo loa kiate ia ofaipe le vilo o le sasau ki le kele ; ti e leaise toe sao loa se fa toka tasi, pe ko ia pe ko se tasi o kau tagata ala e nonofo mo ia.

¹³ Kapau e sola loa a ia ki se kolo, e ano loa a Iselaele katoa mo ni maea, o toso le kolo katoa lena ki le liua, o kaku ki le oki o momoi fatu fuli i le kolo.

¹⁴ Na pati loa Apesalone mo le kakai katoa o Iselaele : E malie ake le tokoi a Usai, le tagata Aleki, i le tokoi a Asitofele. Talie kua fakatotonu e le Eteleno ke fakanoai le tokoi malie a Asitofele, o tupu ke aumai ai le malaia kia Apesalone.

Saofaki o Tavite i le tokoi a Usai

¹⁵ Na pati loa Usai ki tagata faisakilifisio ko Satoke mo Apiatale : Na tuku e Asitofele le tokoi leia mo leia kia Apesalone mo le kau matua o Iselaele ; ti ko au, na kau pati ke felaaki mo felaaki.

¹⁶ Kakau fakatavili nei se tasi kia Tavite, o pati kiate ia : Aua na ke moe loa i le toafa, kae ke ke ano vave ke toe mamao atu, talie na teifo loa se tutamaki ki le sau mo le kakai e leia nofo mo ia.

¹⁷ Ka ko leinei na nofo Sonatane mo Asimaate i Ene-Lokueli. Talie na tapu ke la ulu ki le kolo ; koia na au loa se fafine fakasausau o pati kia laua ke ano o fakasa le nea lena kia Tavite.

¹⁸ Na tio loa se tama tupulaga kia laua ti na fakasa loa e ia kia Apesalone. Kae na la ano fakatavili aifai, ti na la kaku loa ki Pasulimi, ki le fale o se tagata leia na maua ia sona sosoni i lona malae, ti na la ifo loa o mumuni i ai.

¹⁹ Na too loa e le fafine o le kaiga lena se la o folasi i aluga o le sosoni, ti na veteki loa e ia i aluga ni fuai fulumeto ke aua na fakatokagai e se tasi se nea.

²⁰ Na ulu loa tagata fakasausau a Apesalone ki le fale o le fafine lena, o pati : Kofea Asimaate mo Sonatane ? Na tali loa le fafine kia latou : Kua la fakalaka i le liua. Na lotou afa loa laua, kae na leaise lotou maua loa laua, ti na lotou toe liliu loa ki Selusalemi.

²¹ I le oki o lolatou mavae, na ulu ake loa ki tafa Asimaate mo Sonatane mei le sosoni, o ano o fakasa a nea fuli ki le sau ko Tavite. Na la pati loa kia Tavite : Kotou tutuu vave ki aluga, o fakalaka i le liua, talie kua tuku e Asitofele le tokoi leia o uiga mo koutou.

²² Na tutuu ake loa ki aluga Tavite mo le kakai katoa leia na nofo mo ia, o fakalaka i le Solotane ; i le mafoa mai o le ao, na leaise nofo kese fua se fa toka tasi, ti na leaise tasi fua na leaise fakalaka i le solotane.

²³ I le tio a Asitofele na leaise fakaaoga lana tokoi, na tuu loa a ia, o sopo ki lana asino o toe liliu ki lona kaiga i lona kolo. Na tuku loa e ia ana fakatotonu ki lona fale, ti na nonoa loa e ia lona ua o tautau. Ti na mate ai loa a ia, ti na tanu loa a ia i le tanuma o lona tamana.

Tavite i Maanaimi

²⁴ Na kaku loa Tavite ki Maanaimi. Ti na fakalaka loa Apesalone i le solotane, a ia mo tagata fuli o Iselaele ala na nonofo mo ia.

²⁵ Na fakanofo loa e Apesalone a Amasa ke pule ki le solia, o fetogi Soape ; ko Amasa ko le vosa o se tagata na igoa ko Sitela, tagata o Iselaele, leia na ano kia Apikale, taine o Nakase ti ko le taina o Teselusa, tinana o Soape.

²⁶ Na nofo loa Iselaele mo Apesalone i le fenua o Kalaate.

²⁷ I le kaku a Tavite ki Maanaimi, ko Sopi, vosa o Nakase mei Lapa o vosa o Amone, mo Makile, vosa o Amiele mei Lotepale, mo Palesilai, tagata Kalaate, mei Lokelime,

²⁸ na lotou aumai loa ni palepale, mo ni fa topu, mo ni fa ipu kele, mo se fulumeto mata, mo se olese, mo se falina, mo ni fulumeto tunu, mo ni fuai feve mata, mo ni lenitili, mo fuai feve tunu,

²⁹ mo se meli, mo se sua manu, mo ni ovi, ti mo ni folomasi sua pipi. Na lotou aumai loa a nea ana kia Tavite mo le kakai leia na nofo mo ia, o tupu ke lotou kai ; talie na lotou pati : Kua lagi mamae le kakai lena i le fia kai, mo le gaegae, ti mo fia inu i le toafa.