Lua tosi a Samuele 16 - Tosi Tapu

Tesipa, tagata fakasausau veli a Mefiposete

¹ I le tuku fakaikiiki ki muli e Tavite le tumutumu o le mauga, ko leinei, na au loa ki ona mua Tesipa, tagata fakasausau a Mefiposete, mo ni asino e lua ala na amoga ia ni fa pane e kau lelau lua, mo ni paapaa vite malo e kau lelau fa, mo ni paapaa fuai laakau e kau lelau fa i fuai laakau o le temi vevela, ti mo se utele vino e tasi.

² Na pati loa le sau kia Tesipa : Kolea le nea leia e ke loto ke fai ki nea ana ? Na tali loa Tesipa : Ko asino ke eke ai lou famili, ko pane mo fuai laakau ke fagai ai le kakai, ti ko le utele vino ke fakainu ai latou ala e gaegae loa i le toafa.

³ Na pati loa le sau : Kofea le vosa o lou pule ? Ti na tali loa Tesipa ki le sau : Ko leinei, na nofo a ia i Selusalemi talie e pati a ia : I le aso nei e liufaki loa kiate au e le fale o Iselaele le puleaga o loku tamana.

⁴ Na pati loa le sau kia Tesipa : Ko leinei, kua ke maua a nea fuli a Mefiposete. Ti na punou loa Tesipa ki le kele, o pati : Ke finegalo alofa mai kiate au loku aliki le sau !

Lauvelii o Tavite e Simei

⁵ Na kaku loa Tavite ki Pasulimi. Na ulu ake loa se tagata i le famili o Saulo na igoa ko Simei, vosa o Kela, ti na fakamalaia loa e ia Tavite,

⁶ ti na laku foki e ia ni fatu kia Tavite mo ana tagata fakasausau fuli, logo ai le api o le kakai leia na saele i le fetuu atamai mo le fetuu sema o le sau.

⁷ Na masau feneeki Simei i lana fakamalaia Tavite : Ano, ano, tagata o le toto, tagata agaveli !

⁸ E toe fakavilo e le Eteleno kiate koe le toto katoa o le fale o Saulo, leia na ke too lona ekeekeaga fakasau, ti kua tuku e le Eteleno le puleaga ki lima o Apesalone, lou vosa ; ti ko lena lou totogi kua ke fakaaloalofa, talie ko se tagata tukipo a koe !

⁹ Koia na pati loa Apisai, vosa o Teselusa, ki le sau : Kolea e fakamalaia ai e le kuli mate lena le sau, loku aliki ? Ke ke fakataga mai kau ano o tuuti lona fa ulu.

¹⁰ Kae na pati loa le sau : E leaise kolua kau i ai, vosa o Teselusa ; tuku ke fakamalaia e ia au, talie kua pati le Eteleno kiate ia : Fakamalaia Tavite ! Ti ko ai e pati loa kiate ia : Kolea e ke fai felaaki ai ?

¹¹ Ti na pati loa Tavite kia Apisai mo ana tagata fakasausau fuli : Ko leinei, ko loku vosa, leia na ifo mei oku tootooga, e afa ki loku mauli ; ti e feaki ake loa le tagata lena o Pesamino ! Tuku a ia ke fakamalaia, talie kua pati le Eteleno kiate ia.

¹² E lagi tio loa le Eteleno ki loku fakaaloalofa, ti e fai loa e ia kiate au le nea e malie o fetogi ai loku fakamalaia i le aso nei.

¹³ Na soko atu loa e Tavite mo ana kakai lolatou fanoga. Ti na saele loa Simei i le fetuu o le mauga, o ofi kia Tavite, o fakamalaia a ia, mo laku fatu, ti mo laku kele kia latou.

¹⁴ Na kaku loa le sau mo le kakai katoa leia na ano mo ia, ki Asefime, ti na lotou malolo loa i le ganea lena.

Ulu o Apesalone ki Selusalemi

¹⁵ Na ulu loa ki Selusalemi a Apesalone mo le kakai katoa, ko tagata o Iselaele ; ti na ano foki Asitofele mo Apesalone.

¹⁶ I le kaku a Usai, le tagata Aleki, kaukau nea o Tavite, kia Apesalone, na pati loa a ia kiate ia : Ke mauli le sau ! Ke mauli le sau !

¹⁷ Ti na pati loa Apesalone kia Usai : E fenaaki loa lou agatonu ki lou kaukau nea ko Tavite ! Kolea na leaise ke ano ai mo lou kaukau nea ?

¹⁸ Na tali loa Usai kia Apesalone : E kau loto ke kau kau mo leia kua filifili e le Eteleno mo le kakai katoa mo tagata fuli o Iselaele, ti e kau nofo loa mo le sau.

¹⁹ Ti ko ai leia ka kau tausi loa ki ai ? Pe leaise ko lona vosa ? E kau tausi loa kiate koe ofaipe laku tausi ki lou tamana.

²⁰ Na pati loa Apesalone kia Asitofele : Kolua felogoi fakatasi pe kolea le nea leia ke tou aga o fai ?

²¹ Ti na pati loa Asitofele kia Apesalone : Ke ke ano ki fafine tinifu o lou tamana ala na tuku e ia ke leoleo ia le fale sau ; i le nea lena e iloa loa e Iselaele katoa kua ke vesia ki lou tamana, ti e fakamakeke ai loa a lima o latou fuli ala e nonofo mo koe.

²² Na fakatuu loa kia Apesalone se falela i le ato o le fale sau, ti na momoe loa Apesalone i ai mo avaga o lona tamana, i mata o Iselaele katoa.

²³ I le temi lena na fakalogo ki tokoi a Asitofele ofaipe le folafola a le Atua totonu. Na fai felaaki ki tokoi fuli a Asitofele, tatau kia Apesalone pe kia Tavite.