Lua tosi a Samuele 15 - Tosi Tapu

Agatuu a Apesalone

¹ I le sili o le nea lena, na totogi loa e Apesalone kiate ia se saliote, mo ni osi, mo se kau tagata e tino lima ke makape i ona mua.

² Na alaala usu loa a ia, o tuu i tafa o le ala o le matapa. I temi fuli ala e fakalaka ai se tagata leia kua nofo mo se nea ke fakamaaui, o ano ki le sau o tupu ke fai sona fakamaau, na kalagai a ia e Apesalone, o pati : E ke kau ki le kolo fea ? Ti kapau e tali mai a ia : E kau kau ki leia le faasiga o Iselaele,

³ na pati loa Apesalone kiate ia : Ko leinei, e malie mo totonu lau tagi ; kae e leaise fakalogo loa se tasi i le fale o le sau kiate koe.

⁴ Na pati loa Apesalone : Ko ai e fakanofo ia loa au ke tui fakamaau i le fenua nei ? Kae kapau e au loa kiate au a tagata fuli ala e nofo loa mo se tagi pe ko se fakavisi, ti e kau fai loa kiate ia le nea e totonu !

⁵ Ti kapau e fakafeofi ake loa se tasi kiate ia, o tulolo i ona mua, e velo loa e Apesalone lona lima kiate ia, o luluku a ia ti mo sogi kiate ia.

⁶ Na fai fenaaki Apesalone kia latou fuli o Iselaele, ala na ano ke fakamaaui e le sau. Ti na afei e Apesalone le loto o le kakai o Iselaele kiate ia.

⁷ I le oki o fetuu e fa, na pati loa Apesalone ki le sau : Fakataga mai ke kau ano ki Epelone o fakasoko le fakapapau leia na kau fai ki le Eteleno.

⁸ Talie na fai e lau tagata fakasausau se fakapapau i le temi leia na kau nofo ai i Kesuli i Silia ; na kau pati : Kapau e toe fakaliliu loa au e le Eteleno ki Selusalemi, e kau momoli loa ni sakilifisio ki le Eteleno.

⁹ Na pati loa le sau kiate ia : Ano i le tokamalie. Ti na tuu ake loa Apesalone, o ano ki Epelone.

¹⁰ Na kakau loa e Apesalone ni tagata esipio i faasiga fuli o Iselaele, ke pati : Ka kotou logo loa ki le tagi o le fakatagi pupusi, e kotou pati loa : Kua sau Apesalone i Epelone.

¹¹ Na ano loa mo Apesalone mei Selusalemi, ni kau tagata e tino lelau lua na fakaafe ; ti na lotou ano fakafuanoa, na leaise lotou iloa fua se nea.

¹² I le lolotoga momoli e Apesalone o le sakilifisio, na kakau loa e ia ke afa mei le kolo ko Kilo a Asitofele, ko le tagata Kilo, leia na kau i kau matua tokoi a Tavite. Na asilisili makeke le fakafesagai, ti na asilisili api le kakai leia kua kau kia Apesalone

Sola o Tavite

¹³ Na au loa se tasi o fakasa le nea lena kia Tavite, o pati kiate ia : Kua afe le loto o le kakai o Iselaele kia Apesalone.

¹⁴ Ti na pati loa Tavite ki ana tagata fakasausau ala na nonofo mo ia i Selusalemi : Kotou tutuu ki aluga, ke tou fesolaki, talie e leaise tou mauuli loa i mua o Apesalone. Kotou fakavilivili o ano, talie na tau fakafokifa mai loa a ia kia tatou, ti na fakavilo loa e ia le malaia kia tatou, ti na taai loa e ia le kolo ki le seleta.

¹⁵ Na pati loa tagata fakasausau a le sau kiate ia : E fai loa e au tagata fakasausau a nea fuli ala e loto loa ki ai lomatou aliki sau.

¹⁶ Na mavae loa le sau mei le kolo, ti na mulimuli loa iate ia lona fale katoa, ti na tuku loa e ia a fafine e tino agafulu i ana kau tinifu ke leoleo ia le fale sau.

¹⁷ Na ano loa le sau, ti na mulimuli loa iate ia le kakai katoa, ti na lotou tutuu loa i le fale taupotu.

¹⁸ Ti na fakaolo loa i ona mua ana tagata fakasausau fuli : le kau Keleti fuli, mo le kau Peleti fuli ; ti na toe fakalaka foki i mua o le sau le kakai fuli o Kate, ala ko kau tagata e tino lelau e ono, na au mei Kate o mulimuli iate ia.

¹⁹ Na pati loa le sau kia Itai mei Kate : Kolea ka ke au ai loa, a koe foki, mo matou ? Toe liliu, ti ke nofo mo le sau, talie ko se matapule a koe, ti na aumai foki a koe mei lou fenua.

²⁰ Na ke kaku mai fua nanafi, ti e leaise malie ke kau fakaeva a koe mo matou i le aso nei, kae e leaise kau iloa totonu pe kau ano kifea ! Toe liliu, ti ke ave ou fetaina mo koe. Ke tuku e le Eteleno lona agamalie mo lona agatonu kiate koe !

²¹ Na tali loa Itai ki le sau : E mauli le Eteleno, ti e mauli loku aliki, le sau ! I le ganea leia e nofo ai loa loku aliki le sau, ki le mate pe ki le mauli, i le ganea lena e nofo ai loa lau tagata fakasausau.

²² Na pati loa Tavite kia Itai : Ano, ti ke fakalaka ! Ti na fakalaka loa Itai mei Kate mo ana kakai fuli ti mo fanau fuli na nonofo mo ia.

²³ Na fetagisi le fenua katoa o leo lasi i le temi leia na fakalaka ai le kakai i mua o Tavite. Na fakalaka loa le sau i le liua ko Setolone mo lona kakai, i le ala leia e ano ki le toafa.

²⁴ Na i ai foki le tagata faisakilifisio ko Satoke, ti na ano mo ia le kau Levi fuli ala na amo ia le aleka o le sai. Na lotou tuku loa ki lalo le aleka, ti na momoli loa e le tagata faisakilifisio ko Apiatale ni sakilifisio o kaku ki le fakalaka fuli o latou ala na mavae mei le kolo.

²⁵ Na pati loa le sau kia Satoke : Toe ave le Aleka o le Atua ki le kolo. Kapau e finegalo alofa loa le Eteleno kiate au, e toe aumai loa e ia au, ti e toe fakatio loa e ia au ki le aleka mo lona fale tapu.

²⁶ Kae kapau e pati a ia : E leaise kau maua loku fiafia iate koe ! ko leinei au, ke fai e ia kiate au le nea leia e malie kiate ia.

²⁷ Na toe pati loa le sau ki le tagata faisakilifisio ko Satoke : Pe ke matala ? Toe liliu i le tokamalie ki le kolo, a koe mo Asimaate, lou vosa, mo Sonatane, vosa o Apiatale.

²⁸ Kotou tio, e kau nofo loa i le toafa, o kaku ki le kaku mai o ni logo meia koutou.

²⁹ Koia na toe ave loa e Satoke mo Apiatale le aleka o le Atua ki Selusalemi, ti na lotou nonofo loa i ai.

³⁰ Na pale loa Tavite ki le mauga o oliveto. Na pale tagi a ia, ti na pulou lona fa ulu, ti na saele kilii vae a ia ; ti na pulou foki a ulu o latou fuli ala na nonofo mo ia, ti na lotou pale fetagisi.

³¹ Na au loa o fakasa kia Tavite : Kua nofo Asitofele mo Apesalone i le kau fakafesagai. Ti na pati loa Tavite : Ei Eteleno, e kau kole atu kiate koe, ke ke fakaliliu ke noa a tokoi a Asitofele !

³² I le kaku a Tavite ki le tumutumu o le mauga, leia na atolasio ai loa ki le Atua, ko leinei, na au loa Usai, le tagata Aleki, ki ona mua, kua sae lona kofu ti kua pani efu lona ulu.

³³ Na pati loa Tavite kiate ia : Kapau e ke au mo au, ti e ke liliu loa ko se kavega kiate au.

³⁴ Kae kapau e ke toe liliu ki le kolo, e ke fakanoai loa a tokoi a Asitofele o uiga mo au, o ke pati loa kia Apesalone : Ei sau, e kau liliu loa ko lau tagata fakasausau ; i le temi kua sili na kau fakasausau ki lou tamana, kae i le lakaga nei ko lau tagata fakasausau au.

³⁵ Pe leaise nonofo mo koe i lena a tagata faisakilifisio ko Satoke mo Apiatale ? Ko nea fuli ala e ke logo loa ki ai i le fale o le sau, e ke fakasa loa a ia ki tagata faisakilifisio ko Satoke mo Apiatale.

³⁶ Ti e nonofo i ai mo laua ola vosa e toka lua ko Asimaate, vosa o Satoke, mo Sonatane, vosa o Apiatale, ko laua loa ana e aumai ia loa a logo fuli ala e kotou maua loa.

³⁷ Koia na toe liliu ai loa ki le kolo a Usai, le tagata tokoi a Tavite. Ti na ulu loa Apesalone ki Selusalemi.