Lua tosi a Samuele 14 - Tosi Tapu

Puleaki a Soape, toe liliu o Apesalone

¹ Na tio loa Soape, vosa o Teselusa, kua fimalie loa le loto o le sau kia Apesalone.

² Ti na kakau loa e Soape ke aumai mei Tekoa se fafine poto, ti na pati loa a ia ki le fafine : Ke ke fai pe se fafine leia e mamae, ti ke ke kofu ofaipe se fafine leia e putu ; aua na ke fakamanogi, ti ke ke fai pe se fafine leia e tagi ki se mate talu mei fualoa.

³ E ke ano fenaaki loa ki le sau, ti e ke masau feneeki loa kiate ia. Ti na tuku loa e Soape ki lona gutu a masau ala ke fai loa e ia.

⁴ Na ano loa le fafine mei Tekoa, o masau ki le sau. Na punou loa ona mata ki le kele i mua o le sau, o pati : Ei sau, fakamauli au !

⁵ Na pati loa le sau kiate ia : Kolea le nea leia kua soko kiate koe ? Na tali loa a ia : Ko leinei, ko se lokonui au, kua mate loku avaga !

⁶ Na maua e lau fafine fakasausau ni tama e toka lua, ala na fefele loa i faisaga, ti ko leinei, na tamate loa e se tasi lona taina, talie na leaise tasi leia ke veteki ia laua.

⁷ Ti ko leinei, kua malaga mai le famili katoa ki lau fafine fakasausau, o pati : Tuku mai nei leia na tukipo ia lona taina ! E motou loto ke tamate a ia ke taui ai le mauli o lona taina leia na tamate e ia ; e motou loto ke maumaui foki mo lona sakoga ! E lotou tamate ai loa le ga malala leia koi kaka iate au, ti e leaise toe maua loa se sakoga o loku avaga i aluga o le kele.

⁸ Na pati loa le sau ki le fafine : Ano ki lou kaiga, e kau tuku loa ni fakatotonu o uiga mo koe.

⁹ Na pati loa le fafine o Tekoa ki le sau : Ei sau, ke vilo le tautea kiate au mo le fale o loku tamana ; e leaise tonu ke mamae loa le sau mo le puleaga fakasau i le nea lena.

¹⁰ Na pati loa le sau : Kapau e masau fakaveli loa se tasi kiate koe, aumai a ia ki leinei, ti e leaise toe fafa loa a ia kiate koe.

¹¹ Na pati loa le fafine : Ke manatui e le sau le Eteleno, lou Atua, o tupu ke aua na toe fakalasi le maumau e le tagata totogi toto, ti ke aua na maumaui loku vosa ! Ti na pati loa le sau : E mauli le Eteleno ! e leaise vilo loa ki le kele se fa fului ulu e tasi o lou vosa.

¹² Na pati loa le fafine : Fakataga mai ki lau fafine fakasausau ke fai e ia se kupu e tasi ki loku aliki sau. Ti na pati loa le sau : Masau !

¹³ Na pati loa le fafine : Kolea e ke manatu felaaki ai ki le kakai o le Atua, talie e sa mei masau totonu a le sau e sakinake kua sala le sau talie na leaise kalagai mai e ia leia e nofo i le fenua kese ?

¹⁴ E maoki e tonu ke tou mamate fuli, ti e tou tatau loa mo le vai leia e maligi ki le kele, leia e leaise mafai ke toe fakatasii ; e leaise too e le Atua le mauli, ti e leaise loto a ia ke mamao mei lona agai le tagata leia na sola.

¹⁵ I le lakaga nei, kapau na kau au o fakasa atu a nea anei ki le sau, loku aliki, e tupu ko loku i ki le kakai. Ti na pati loa lau fafine fakasausau : Ku kau loto ke kau masau ki le sau ; E lagi fai loa e le sau le nea leia e pati loa ki ai lana fafine fakasausau.

¹⁶ Io, e fakalogo loa le sau ki lana fafine fakasausau, o tupu ke saofaki lana fafine fakasausau mei lima o latou ala e afa ke tamate ia maua, a au mo loku tama, mei le tofiga o le Atua.

¹⁷ Na pati lau fafine fakasausau : Ko le masau a loku aliki, le sau, e soli ia mai loa kiate au le fulufulumalie. Talie e tatau loku aliki, le sau, mo se aselo a le Atua, kua nofo teuteu a ia ke logo ki le malie mo le veli. Ti ke nofo mo koe le Eteleno, lou Atua !

¹⁸ Na tali loa le sau ki le fafine : Aua na ke fufu mai le nea leia ka kau vesili atu ki ai. Ti na pati loa le fafine : Ke masau loku aliki, le sau !

¹⁹ Na pati loa le sau : Pe na leaise kau le lima o Soape mo koe i le faufau o le nea leinei ? Ti na tali loa le fafine : E ke mauli, ei loku aliki, ti e leaise loi se nea fua i nea ala e pati ki ai loku aliki, le sau. Ko lau tagata fakasausau totonu ko Soape leia na tuku ia mai kiate au a fakatotonu ti na tuku ia ki le gutu o lau fafine fakasausau a masau fuli ana.

²⁰ Na fai le nea lena e lau tagata fakasausau ko Soape ke fulusi ai le nea. Kae e poto loku aliki ofaipe se aselo o le Atua, e iloa e ia a nea fuli ala e soko i le kele.

Fakamolemole Tavite kia Apesalone

²¹ Na pati loa le sau kia Soape : Ko leinei, kua kau loto malie ke fai le nea lena ; ano, o aumai le tagata tupulaga ko Apesalone.

²² Na punou loa Soape ki le kele i mua o le sau, o fakamalo kiate ia mo pati : Ei sau, loku aliki, kua iloa e lau tagata fakasausau i le aso nei e ke taupau kiate au lou agamalie, talie kua fai loa e le sau o mulimuli ki le pati a lau tagata fakasausau.

²³ Na tuu ake loa Soape ki aluga, o ano ki Kesuli, ti na aumai loa e ia Apesalone ki Selusalemi.

²⁴ Kae na pati loa le sau : Ke liliu a ia ki lona fale ! Kae ke aua na tio a ia ki oku mata. Ti na ano loa Apesalone ki lona fale, ti na leaise tio loa a ia ki mata o le sau.

²⁵ I Iselaele katoa, na leaise maua se tasi ke tupulaga ofaipe Apesalone ; mei ona taga vae o kaku ki le fa ulu na leaise maua fua se ga mele e tasi.

²⁶ I le fakaoki o fetuu fuli, na koti lona ulu, talie na mamafa ai lona lau ulu. Na fua loa e ia lona lau ulu, ti na kilo lua lona mamafa o mulimuli ki le fua masani.

²⁷ Na tupu loa kia Apesalone ni vosa e toka tolu, mo se taine na igoa ko Tamale, leia na fulumalie ai.

²⁸ Na nofo loa Apesalone i Selusalemi i fetuu e lua, kae na leaise tio a ia ki le sau.

²⁹ Na kalagai loa e ia Soape ke kakau ki le sau, kae na fakafiti loa Soape, ti na leaise au loa a ia kiate ia. Ti na toe kakau loa e Apesalone ke afa Soape ke au kiate ia, kae na toe fakafiti foki a Soape.

³⁰ Na pati loa Apesalone ki ana tagata fakasausau : Ko leinei, e tuu le faisaga olese a Soape i tafa o laku faisaga ; kotou ano, o susunu a ia. Ti na susunu loa e tagata fakasausau a Apesalone le faisaga a Soape.

³¹ Na tuu ake loa Soape ki aluga, o au kia Apesalone i lona kaiga. Na pati loa a ia kia Apesalone : Kolea na susunu ai e au tagata fakasausau laku faisaga ?

³² Na tali loa Apesalone kia Soape : Ko leinei, na kau kole atu ke ke au kiate au i leinei, ti e kau kakau loa a koe ki le sau talie ke ke pati kiate ia : Kolea le uiga o laku au mei Kesuli ? Na malie ake kiate au laku nofo i ai ! I le temi nei e kau fia tio ki mata o le sau ; ti kapau e i ai se sala iate au, ti ke fakatotonu e ia ke tamate au.

³³ Na ano loa Soape, o fakasa le nea lena ki le sau ti na kalagai loa e le sau Apesalone. Na au loa Apesalone ki le sau ti na punou loa ona mata ki le kele i mua o le sau. Na sogi loa le sau kia Apesalone.