Lua tosi a Samuele 13 - Tosi Tapu

Aga fakalumaluma a Amone

¹ I le sili o nea ana, na soko loa le nea leinei. Na i ai se tuagaane o Apesalone, vosa o Tavite, na tupulaga ai ti na igoa ko Tamale ; ti na mamana loa kiate ia Amone, vosa o Tavite.

² Na nofo veli Amone, o soko ai mo lona masaki, o tupu ko Tamale, lona tuagaane ; ti na mata faigataa ai kia Amone ke fai kiate ia se nea, talie koi taupoou a ia.

³ Kae na i ai se kaukau nea o Amone leia na igoa ko Sonatape, vosa o Simea, taina o Tavite, ti ko se tagata kaka ai a Sonatape.

⁴ Na pati loa Sonatape ki Amone : Ko le vosa a koe o le sau, kolea e tautuku aifai lou kala i usu fuli ? Pe leaise ke fia fakasa mai a ia kiate au ? Na tali loa Amone kiate ia : E kau mamana kia Tamale, le tuagaane o Apesalone, loku taina.

⁵ Na pati loa Sonatape kiate ia : Ano o moe i lou palepale o sakinake kua ke masaki. Ka au loa lou tamana o tio kiate koe, ti ke pati loa kiate ia : Fakataga kia Tamale, loku tuagaane, ke au o aumai saku nea kai ; ke teuteui e ia se nea kai i oku mua, o tupu ke kau tio ki ai ti ke kau too a ia mei lona lima.

⁶ Na moe loa Amone, ofaipe se masaki. Na au loa le sau, o tio kiate ia, ti na pati loa Amone ki le sau : E kau kole atu kiate koe ke au mua Tamale, loku tuagaane, o fai ni fa kato e lua i oku mua, ti ke kau kai laua mei lona lima.

⁷ Na kakau loa e Tavite ke pati kia Tamale i lona fale : Ano nei ki le fale o Amone, lou tuagaane, ti ke teuteui kiate ia se nea kai.

⁸ Na ano loa Tamale ki le fale o Amone, lona tuagaane, leia na moe i lona palepale. Na too loa e ia se falina o lusi, ti na teuteui loa e ia i ona mua ni kato, o fakamoso ;

⁹ ti na too loa e ia le ipu o tuku ki ona mua. Kae na leaise loto loa Amone ke kai. Na pati loa ia : Fakaulu ki fafo a kakai fuli. Ti na ulu loa a kakai fuli ki fafo mei lona fale.

¹⁰ Ti na pati loa Amone kia Tamale : Aumai le nea kai ki le kogafale ti ke kau kai a ia mei lou lima. Na too loa e Tamale a fa kato ala na fai e ia, o ave laua kia Amone, lona tuagaane, i le kogafale.

¹¹ I lana avatu kiate ia a fa kato ke kai, na tapo loa e ia a ia, o pati kiate ia : Au, o moe mo au, ei loku tuagaane.

¹² Na tali loa Tamale kiate ia : Leai, ei loku tuagaane, aua na ke fakamatagafua au, talie e leaise fai se nea feneeki i Iselaele ; aua na ke fakasoko le nea fakalialia lena.

¹³ E kau ano loa kifea mo loku luma ? Ti ko koe, e ke liliu loa ko se tagata fakalialia ki Iselaele. I le lakaga nei e kau kole atu kiate koe, masau ki le sau ti e leaise fakafesagai loa a ia ke kau liliu ko lau avaga.

¹⁴ Kae na leaise fia logo Amone kia Tamale ; ti na too fakamakeke loa e ia Tamale, o momoe mo ia.

¹⁵ Ti na fakalialia loa Amone kia Tamale, o lasi ake i le alofa leia na maua e ia kiate ia. Na pati loa a ia kia Tamale : Tuu, o ano !

¹⁶ Na tali loa Tamale kiate ia : Aua na ke toe fakalasi le veli leia kua ke aga o fai kiate au, o ke toe kapu au.

¹⁷ Na leaise fia logo loa a ia kia Tamale, ti na kalagai loa e ia le tama leia na fakasausau kiate ia, o pati : Ke ke fakamamao atu iate au le fafine leinei, ti ke ke kapu a ia ki fafo. Ti ke tapono le matapa i ona muli !

¹⁸ Na kofu e Tamale se kofu lanu kesekese talie ko le teu lena o taineliki o sau, i le temi katoa leia koi lotou taupoou ai. Na tuku loa e le tagata fakasausau a Amone a Tamale ki fafo, ti na tapono loa e ia le matapa.

¹⁹ Na laku loa e Tamale ni mugalafu ki lona fa ulu ti na sae loa e ia lona kofu lanulanu ; na teki loa e ia ona lima ki lona fa ulu ti na ano loa a ia mo tagi leo lasi.

²⁰ Na pati loa kiate ia Apesalone, lona tuagaane : Pe na fakamakeke a koe e Amone, lou tuagaane ? I le lakaga nei, fakalologo talie ko lou tuagaane a ia ; aua na ke tokaga ki le nea lena. Ti na nofo loa Tamale i le mamae, i le fale o Apesalone, lona tuagaane.

²¹ Na logo loa le sau ko Tavite ki nea fuli ana ti na ita lasi ai.

²² Na leaise toe masau loa Apesalone kia Amone ; kae na vesia loa a ia kiate ia talie na fakamatagafua e ia Tamale, lona tuagaane.

Tamate o Amone ; sola o Apesalone

²³ Na sili loa fetuu e lua ki le nea lena, ti na maua loa e Apesalone le kau koti fului ovi i Paale-Atesoli, o ofi ki Efalaimi, ti na fakaafe loa e ia a vosa fuli o le sau.

²⁴ Na ano loa Apesalone ki le sau, o pati kiate ia : Ko leinei, kua maua e lau tagata fakasausau le kau tuuti fului ovi ; ke au le sau mo ana tagata fakasausau ki le fale o lau tagata fakasausau.

²⁵ Ti na pati loa le sau kia Apesalone : E leaise motou natu fuli loa, ei loku vosa, talie ke aua na lasi lou pakia kia matou. Na fakamakeke ake loa Apesalone ki le sau ; kae na leaise loto loa le sau ke ano, ti na tapuaki loa le sau kiate ia.

²⁶ Na pati loa Apesalone : Ke ke fakataga fua ke au loku taina ko Amone mo matou. Na pati loa le sau kiate ia : Kolea ka natu ai loa a ia ki lou kaiga ?

²⁷ Kae i le fakamakeke ake a Apesalone, na tuku loa e le sau ke ano mo ia a Amone mo ona vosa fuli.

²⁸ Na tuku loa e Apesalone le fakatotonu leinei ki ana tagata fakasausau : Kotou tokaga i le temi leia e kona ai loa Amone ti e kau pati atu ai loa kia koutou : Kotou taai Amone ! Ti kotou tamate loa a ia, aua na kotou i ki se nea, pe leaise ko au leia kua fakatotonu ia atu a ia kia koutou ? Ke kotou loto toa ti ke kotou fakasa lokoutou loto makeke !

²⁹ Ti na fai loa e tagata fakasausau a Apesalone kia Amone o mulimuli ki le nea leia na fakatotonu e Apesalone. Ti na tutuu ake loa a vosa fuli o le sau ki aluga, o tasi sopo loa ki lana osi, o sosola.

³⁰ Koi lotou lolotoga natu i le ala, kae kua kaku loa le logo kia Tavite kua tamate e Apesalone a vosa fuli o le sau, ti na leaise sao loa se fa toka tasi.

³¹ Na tuu ake loa le sau ki aluga, o sae ona kofu, ti na moe loa a ia ki le kele ; ti na nonofo loa ana tagata fakasausau fuli mo ia, ti na lotou sae foki olatou teu.

³² Na masau loa Sonatape, vosa o Simea, taina o Tavite, o pati : Ke aua na manatu loa loku aliki kua tamate loa a tupulaga fuli, vosa o le sau, talie ko Amone toka tasi leia kua mate ; ti ko le nea lena na fakapapau e Apesalone talu mei le aso leia na fakamatagafua ai e Amone a Tamale, lona tuagaane.

³³ Ke aua na mamae loa le sau, loku aliki, o manatu kua mamate loa a vosa fuli o le sau, talie ko Amone toka tasi leia kua mate.

³⁴ Na sola loa Apesalone. Ti na tio loa le tagata leo mei mamao ki ni fenua api ala e ifo ake i le ala leia i ona muli, i le fetuu o le mauga.

³⁵ Na pati loa Sonatape ki le sau : Ko nei a vosa o le sau e au, ofaipe le nea leia kua pati ki ai lau tagata fakasausau.

³⁶ E oki atu fai lana masau kae tau mai a vosa o le sau. Na lotou fetagisi loa ; ti na toe fetagisi foki le sau mo ana tagata fakasausau.

³⁷ Na sola loa Apesalone, o ano ki le fale o Talemai, sau o Kesuli, vosa o Amiule. Ti na tagi loa Tavite ki lona vosa ko Amone i aso fuli.

³⁸ Na nofo loa Apesalone i Kesuli, leia na sola a ia ki ai, i fetuu e tolu.

³⁹ Na tuku loa e le sau ko Tavite le tuli o Apesalone, talie kua fimalie loa lona loto i le mate o Amone.