Lua tosi a Samuele 12 - Tosi Tapu

Valoki o Tavite e Natane

¹ Na kakau loa e le Eteleno a Natane kia Tavite. Ti na au loa Natane kia Tavite, o pati kiate ia : Na nofo i se kolo ni tagata e toka lua, na mou koloa le tasi, kae na mativa le tasi.

² Na lasi ai a kau ovi mo kau pipi a le tagata mou koloa.

³ Kae na leaise maua se nea e le tagata mativa, ko se ga ovi fafine muli fua e tasi leia na totogi e ia ; na fagai e ia a ia, ti na tupu ake a ia o lasi i lona fale mo ona toe ; na kai a ia ki lana pane, ti na inu a ia i lona ipu, ti na moe a ia i lona fatafata, ti na tio a ia ki ai ofaipe sona taine.

⁴ Na kaku ake loa se tagata folau ki le fale o le tagata mou koloa. Ti na leaise loto loa le tagata mou koloa ke fafa ki ana kau ovi mo ana kau pipi, ke teuteui ai se nea kai ki le tagata folau leia kua kaku ake ki lona fale ; na too loa e ia le ovi a le tagata mativa, ti na teuteui e ia a ia ke kai e le tagata leia kua kaku ake ki lona fale.

⁵ Na malaga loa le ita o Tavite, o mu ki le tagata lena, ti na pati loa a ia kia Natane : E mauli le Eteleno ! E tonu ke mate le tagata leia na fai ia le nea lena.

⁶ Ti e liufaki loa e ia ni ovi e fa, o tupu ko lana fai le nea lena, o tupu na leaise maua e ia se manava alofa.

⁷ Ti na pati loa Natane kia Tavite : Ko koe le tagata lena ! Ko leinei le folafola a le Eteleno, le Atua o Iselaele : Na kau pani lolo a koe ke ke nofo ko le sau o Iselaele, ti na kau saofaki a koe mei le lima o Saulo ;

⁸ na kau soli kiate koe le fale o lou pule, na kau tuku ki lou fatafata a avaga o lou pule, ti na kau soli kiate koe le fale o Iselaele mo le fale o Suta. Ti kanapau na leaise feauga a nea ana, na kau toe soli atu loa kiate koe ni iki ake a nea.

⁹ Kolea na ke fakanoai ai le folafola a le Eteleno, o ke fai ai le nea e veli ki ona mata ? Na ke taai ki le seleta a Uli, le tagata Eti ; na ke too lana avaga ke liliu ko lau avaga, ti na ke tamate a ia ki le seleta o vosa o Amone.

¹⁰ I le lakaga nei, e leaise toe mamao loa le seleta mei lou fale, talie na ke fakanoai au, ti na ke too le avaga a Uli, le tagata Eti, ko lau avaga.

¹¹ Ko leinei le folafola a le Eteleno : E kau fakamapuna loa mei lou fale le malaia kiate koe, ti e kau too loa i ou mua au avaga o soli ki se tasi, ke momoe loa mo ia i mua o le malama o le laa.

¹² Talie na ke fai fakafufu le nea lena, e kau fai loa le nea leinei i mua o Iselaele katoa, ti mo mua o le laa.

¹³ Na pati loa Tavite kia Natane : Kua kau agasala ki le Eteleno ! Ti na pati loa Natane kia Tavite : Kua fakamolemole e le Eteleno lau agasala, e leaise ke mate loa.

¹⁴ Kae ko leinei, o tupu kua ke fai se nea leia ke lauveli ai a fili o le Eteleno, e mate loa le vosa leia kua tupu kiate koe.

¹⁵ Ti na ano loa Natane ki lona fale. Na taai loa e le Eteleno le toe leia na fanaui e le avaga o Uli kia Tavite, ti na masaki loa a ia o veli ai.

¹⁶ Na kole loa e Tavite ki le Atua ti mo sesunio o uiga mo le fanau ; ti ka ulu loa a ia ki lona fale, na moe loa a ia i le kele, i le po katoa.

¹⁷ Na faiga ake loa le kau matua o lona fale kiate ia ke tuu ake a ia mei le kele, kae na leaise loto a ia, ti na leaise kai e ia se nea mo latou.

¹⁸ I le fitu o aso, na mate loa le toe. Na tuania loa e le kau tagata fakasausau a Tavite le fakasa kiate ia kua mate le toe. Talie na lotou pati : Ko leinei, i le koi mauli o le fanau, na leaise fakalogo a ia ki atatou masau ; pe feaki loa latatou fakasa kiate ia : Kua mate le toe ? E toe asilisili ake loa lona mamae.

¹⁹ Kae i le tio a Tavite ki le femumusuaki o ana tagata fakasausau, na matala loa a ia kua mate le toe. Ti na pati loa a ia ki ana tagata fakasausau : Pe kua mate le toe ? Ti na lotou tali loa kiate ia : Kua mate a ia.

²⁰ Ti na malaga ake loa Tavite mei le kele. Na maanu loa a ia, mo takai lolo, mo fetogi ona teu ; ti na ano loa a ia ki le fale o le Eteleno, o fai lana su. I lana toe liliu mai ki lona fale, na pati loa a ia ke avake sana nea ke kai, ti na kai loa a ia.

²¹ Na pati loa ana tagata fakasausau kiate ia : Kolea le uiga o le nea leia kua ke fai ? I le koi mauli o le fanau, na ke sesunio mo tagi ; ti i le temi nei kua mate ai le toe, kua ke tuu ki aluga o kai !

²² Na tali loa a ia : I le koi mauli o le toe, na kau sesunio ti na kau tagi, talie na kau pati : Ko ai na iloa ia, na saga e alofa loa le Eteleno kiate au o soli mai le mauli o le fanau ?

²³ I le temi leinei kua mate ai, kolea loa le uiga o laku toe sesunio ? Pe feala ke kau toe fakamauli mai a ia ? E kau ano loa kiate ia, kae e leaise toe au loa a ia kiate au.

Tupu o Salomone

²⁴ Na fakafimalie loa e Tavite lana avaga ko Pate-Sepa, ti na ano loa a ia kiate ia, o momoe mo ia. Na fanaui loa e Pate-Sepa se toe tama leia na fakaigoa loa e Tavite ko Salomone, leia na alofa ki ai le Eteleno.

²⁵ Na tuku loa e ia le toe ki lima o le polofeta ko Natane, ti na tuku loa e Natane kiate ia le igoa ko Setitesa, o tupu ko le Eteleno.

Too o Lapa e Tavite mo Soape

²⁶ Ti na fai loa e Soape le tau ki Lapa, ko le kolo mua o vosa o Amone, ti na maua loa e ia le kolo,

²⁷ ti na kakau loa e ia ni tagata avelogo kia Tavite, o fakasa kiate ia : Na kau taui a Lapa, ti kua kau maua le potu o le kolo leia e tanaki ai a vai ;

²⁸ ke ke tanaki loa i le lakaga nei le toega o le kakai, ti ke ke au loa, a koe totonu, o too le kolo talie ke aua na kau too loa a ia, ti ke tuku mai loa kiate au le kololia.

²⁹ Na fakatasii loa e Tavite le kakai katoa, ti na saele loa a ia ki Lapa ; na taui loa e ia le kolo, o too loa a ia.

³⁰ Na too loa e ia le pala fakasau mei le fa ulu o le sau, ko lona mamafa na fakalaka i le kau tolu kilo aulo ti na teuteui a ia ki ni fatu mauiga. Na teki loa le pala ki le fa ulu o Tavite, leia na ave ia loa i le kolo se koloa lasi ai.

³¹ Na fakamavae loa e ia le kakai mei le kolo, ti na fakagaoii loa e ia latou ki ni gaoi mamafa, ki le tutuu, ki le ta fatu, ki toki mo le fai piliki ; na toe fai felaaki e ia ki la ake a kolo fuli o vosa o Amone. Ti na toe liliu loa Tavite ki Selusalemi mo le kakai katoa.