Lua tosi a Samuele 11 - Tosi Tapu

Tono mo le tukipo a Tavite

¹ I leia ake fetuu, i le temi leia na ano masani ai a sau o tau, na kakau loa e Tavite a Soape mo ana tagata fakasausau ti mo Iselaele katoa, ke ano o maumaui a vosa o Amone ti mo taui a Lapa. Kae na nofo loa Tavite i Selusalemi.

² I se afiafi, na malaga ake loa Tavite i lona moeaga ; ti na evaeva loa a ia i aluga o le ato o le fale sau, ti na tio loa a ia mei ai ki se fafine na maanu, ti na fulumalie ai le fafine.

³ Na afa loa e Tavite pe ko ai le fafine ti na tali kiate ia : Pe leaise ko Pate-Sepa, le taine o Eliame, avaga o Uli ko le tagata Eti ?

⁴ Ti na kakau loa e Tavite ni tagata avelogo ke afa mai a ia. Na au loa a ia kia Tavite, ti na momoe loa Tavite mo ia. I le oki o lona fakamea, na toe liliu loa Pate-Sepa ki lona kaiga.

⁵ Na tinae loa le fafine lena, ti na kakau loa e ia ke fakasa kia Tavite : Kua kau tinae.

⁶ Ti na ave loa e Tavite le fakatotonu leinei kia Soape : Kakau mai ke au kiate au a Uli, le tagata Eti. Ti na kakau loa e Soape a Uli kia Tavite.

⁷ Na ano loa a Uli kia Tavite, leia na fakavesili ia loa a ia pe feaki a Soape, mo le kau solia, ti mo le tau.

⁸ Ti na pati loa Tavite kia Uli : Ifo ki lou fale, ti ke fufulu ou vae. Na mavae loa Uli mei le fale sau, ti na muli atu loa iate ia se nea alofa.

⁹ Kae na moe loa Uli i le matapa o le fale sau, mo tagata fakasausau fuli o lona pule, ti na leaise ifo loa a ia ki lona kaiga.

¹⁰ Na fakasa loa le nea lena kia Tavite, o pati kiate ia : Na leaise ifo Uli ki lona kaiga. Ti na pati loa Tavite kia Uli : Pe na leaise ke tau fanoga mai nei fua ? Kolea na leaise ke ifo ai ki lou kaiga ?

¹¹ Na tali loa Uli kia Tavite : E nofo nei le aleka, mo Iselaele, mo Suta i falela ; ti e nofo i le vao loku aliki ko Soape mo tagata fakasausau a loku aliki, kae ko au ke kau ano loa ki loku kaiga o kai, mo inu, ti mo momoe mo laku avaga ! E ke mauli ti e mauli lou laumalie, e leaise kau fai loa le nea lena.

¹² Na pati loa Tavite kia Uli : Ke ke toe nofo i le aso nei, ti ke toe liliu loa i apogipogi.

¹³ Ti na fakaafe loa e Tavite a Uli ke nake o kai, mo inu mo ia, ti na fakainu loa a ia e Tavite o kona ; i le afiafi, na mavae loa Uli ke moe i lona moeaga, mo tagata fakasausau o lona pule, ti na leaise ifo loa a ia ki lona kaiga.

¹⁴ I le ala usu ake, na fai loa e Tavite se tosi kia Soape, ti na fakatoo loa e ia a ia kia Uli.

¹⁵ Na tosi loa e ia i le tosi lena : Kotou fakatuu Uli ki le ganea leia e vevela ai le tau, ti kotou soso kese loa meiate ia, o tupu ke taai a ia ke mate.

¹⁶ I le oki o le sivisivi e Soape o le kolo kua a takatai, na fakatuu loa e ia a Uli i le ganea leia na iloa e ia e felavei ai loa Uli mo tagata toa.

¹⁷ Na ulu ake loa ki fafo a tagata o le kolo, o taui Soape ; ti na matea ai loa se toka api i le kakai, i kau tagata fakasausau a Tavite, ti na tamate ai foki Uli, le tagata Eti.

¹⁸ Na kakau loa e Soape se tagata avelogo ke ano o fakasa kia Tavite a nea fuli ala na soko i le tau.

¹⁹ Na tuku loa e ia le fakatotonu leinei ki le tagata avelogo : Ka oki loa lau fakamatala ki le sau o nea fakalikiliki fuli o le tau,

²⁰ e feala loa ke itaita a ia, o pati atu kiate koe : Kolea na kotou fakafeofi ai ki le kolo i le lolotoga o le tau ? Pe leaise kotou iloa e fana gasau mei aluga o le kaua ?

²¹ Ko ai leia na tamate ia Apimeleke, vosa o Selupesete ? Pe leaise ko se fafine leia na titi ia a ia ki se tipii fatu mei aluga o le paa, ti na leaise mate ai loa a ia i Tepete ? Kolea na kotou fakafeofi ai ki le kaua o le kolo ? Ti e ke pati loa : Kua mate foki lau tagata fakasausau ko Uli, le tagata Eti.

²² Na ano loa le tagata avelogo. I lana kaku kia Tavite, na fakamatala loa e ia kiate ia a nea fuli ala na fakatotonu ake e Soape.

²³ Na pati loa le tagata avelogo kia Tavite : Na makeke ake le fenua o le kolo ia matou ; na lotou ulu mai o taui matou i le vao, ti na motou taui latou, o lotou solomuli o kaku ki le uluaga o le matapa ;

²⁴ na fana loa e kau tagata fai fana alotou gasau mei aluga o le kaua ki au tagata fakasausau, ti na matea ai loa se toka api o au tagata fakasausau, ti na mate ai foki lau tagata fakasausau ko Uli, le tagata Eti.

²⁵ Na pati loa Tavite ki le tagata avelogo : Ko leinei le nea leia e ke fakasa loa kia Soape : Aua na ke mamae ki le nea lena, talie ko le anoaga lena o le tau : e saele malie i le tasi lakaga, ti saele veli i le tasi a temi ; ke ke taui fakamakeke le kolo, ti ke ke maumaui a ia. Ti ko koe, ke ke fakamakeke a ia !

²⁶ Na logo loa le avaga a Uli kua mate lona avaga, ti na tagi loa a ia ki lona avaga.

²⁷ I le oki o le putu, na kakau loa e Tavite ke afa mai a ia, ti na fakaulu loa e ia a ia ki lona fale. Na liliu loa Pate-Sepa ko lana avaga, ti na fanaui loa e ia kia Tavite se tama. Kae na veli ai ki le Eteleno le nea leia na fai e Tavite.