Lua tosi a Samuele 10 - Tosi Tapu

Lauvelii o tagata avelogo a Tavite ; tau ki le kau Amone

¹ I le sili o nea ana, na mate loa le sau o vosa o Amone, ti na fetogi loa a ia e Anune, lona vosa.

² Na pati loa Tavite : E kau fakasa loa loku agamalie kia Anune, vosa o Nakase, ofaipe le fakasa e lona tamana lona agamalie kiate au. Ti na kakau loa e Tavite ana tagata fakasausau ke ano o fakapelepelei a ia i le mate o lona tamana. I le kaku loa a tagata fakasausau a Tavite ki le fenua o vosa o Amone,

³ na pati loa a pule o vosa o Amone kia Anune, lolatou pule : Pe ke masalo na kakau mai e Tavite ana tagata fakasausau ke fakapelepelei ia a koe, mo fakaapaapa ki lou tamana ? Pe leaise lotou au o tioi le kolo ke maumaui, leia e kakau mai ai e ia ana tagata fakasausau kiate koe ?

⁴ Ti na too loa e Anune a tagata fakasausau a Tavite o tele le vaelua o olatou kaukava mo kotii fakavaelua olatou kofu lava, mei lalo o kaku ki olatou tega. Ti na kakau loa e ia latou ke toe liliu.

⁵ Na fakasa loa le nea lena kia Tavite, leia na kakau ia loa ni kakai ke ano o fakafelavei kia latou, talie kua luma lasi ai a tagata ana ; ti na pati loa le sau ke fakasa kia latou : Kotou nonofo i Seliko o kaku ki le toe loloa o okoutou kaukava ti o kotou au loa.

⁶ I le tio loa o vosa o Amone ki le fakalialia o le nea leia na lotou fai kia Tavite, na lotou totogi loa a kau tagata solia e tino lua afe i le solia a le kau Silia o Pete-Leopi mo le kau Silia o Tesopa, mo kau tagata e tino afe i le sau o Maaka, ti mo kau tagata e tino agafulu tupu lua afe i le kakai o Tope.

⁷ I le logo lena, na kakau loa e Tavite kia latou a Soape mo le solia katoa, ana tagata toa fuli.

⁸ Na ulu loa ki fafo a vosa o Amone, ti na lotou fakatuutuu tau loa i le matapa o lolatou kolo mua ; ko le kau Silia o Tesopa mo Leopi, mo tagata o Tope mo Maaka, na lotou nonofo kese loa ki le vao.

⁹ Na tio loa Soape e tonu loa ke tau a ia ki mua mo muli. Ti na filifili loa e ia i le solia katoa se fa solia ke tau ki le kau Silia.

¹⁰ Kae na tuku loa e ia lona taina ko Apisai ke taki ia leia ake a koga o le solia, o tau ki vosa o Amone.

¹¹ Na pati loa Soape : Kapau e makeke ake loa le kau Silia iate au, e ke au loa o tokoi mai kiate au ; ti kapau e makeke ake loa a vosa o Amone iate koe, e kau natu loa o tokoi atu kiate koe.

¹² Ke ke loto toa, ti ke ta fia tagata, o tupu ko lotatou kakai mo kolo o lotatou Atua, ti ke fai loa e le Eteleno le nea leia e malie kiate ia !

¹³ Na saele loa Soape mo lana solia o taui le kau Silia, ti na sosola loa le kau Silia i ona mua.

¹⁴ I le tio o vosa o Amone kua sosola le kau Silia, na lotou toe sosola foki mo latou i mua o Apisai o ulu ki le kolo. Na fakamamao loa Soape mei vosa o Amone, o toe liliu ki Selusalemi.

¹⁵ I le tio a le kau Silia, kua lotou lava i Iselaele, na lotou toe fakatasii loa olatou makeke.

¹⁶ Na kakau loa e Atatesele ke afa mai le kau Silia ala na nonofo i leia ake fetuu o le vaitafe ; ti na lotou au loa ki Elami, ti na taki loa latou e Sopake, le pule o le solia a Atatesele.

¹⁷ Na fakasa loa le nea lena kia Tavite, leia na toe tanaki ia loa Iselaele katoa, o fakalaka i le Solotane, o ano ki Elami. Na teuteu loa le kau Silia ki le felavei mo Tavite, ti na lotou tau loa mo ia.

¹⁸ Kae na sosola loa le kau Silia i mua o Iselaele. Ti na tamate loa e Tavite a kau tau o saliote e kau lelau fitu ti mo ni tagata ekeosi e tino fa afe ; na tamate foki e ia le pule o lalatou solia ko Sopake.

¹⁹ Ko sau fuli ala na fakalogo kia Atatesele, i le tio kua taai latou e Iselaele, na lotou kole loa le tokamalie mo Iselaele, ti na lotou popula loa kiate ia. Ti na leaise toe toa loa le kau Silia ke toe tokoi ki vosa o Amone.