Lua tosi a Samuele 1 - Tosi Tapu

Logo o Tavite ki le mate o Saulo

¹ I le oki o le mate o Saulo, na toe liliu loa Tavite ki Tesikelake, i le oki o lana tamate le kau Amaleke, ti kua aso lua foki lana nofo i ai.

² I le tolu o aso, na kaku mai loa se tagata mei le nofolaga tau o Saulo, kua masaesae ona teu ti kua kelekele lona fa ulu. I lana kaku ki mua o Tavite, na tutuli loa a ia ki le kele i ona mua.

³ Ti na pati loa Tavite kiate ia : E ke au meifea ? Ti na tali loa a ia kia Tavite : Na kau sola mai mei le nofolaga tau o Iselaele.

⁴ Ti na pati loa Tavite kiate ia : Kolea le nea na soko ? Fakamatala mai kiate au ! Ti na tali loa a ia : Kua sola le kakai i le tau, ti kua vivilo se kakai toka api, o mamate ; ti kua mamate foki Saulo mo Sonatane, lona vosa.

⁵ Na pati loa Tavite ki le tama lena na au mo le logo : Na feaki loa lau iloa kua mamate Saulo mo Sonatane, lona vosa !

⁶ Ti na tali loa le tama lena na au mo le logo : Na kau nofo totonu i le mauga o Kilipoa ; ti ko leinei, na fafanaki Saulo ki lana tao ti kua ofi ake kiate ia a saliote mo tagata ekeosi.

⁷ Na mafuli mai loa Saulo, o tio mai kiate au, ti na kalaga mai loa a ia kiate au. Na kau tali loa kiate ia : Ko leinei au !

⁸ Ti na pati mai loa a ia kiate au : Ko ai a koe ? Na kau tali loa kiate ia : Ko se tagata Amaleke au.

⁹ Ti na pati loa a ia : Fakafeofi mai, ti ke tamate au ; talie kua kau mamae lasi ai, talie koi makeke ai loku mauli iate au.

¹⁰ Na kau fakafeofi loa kiate ia, o tamate a ia talie na kau iloa e leaise toe mauli loa a ia i lona lava. Na kau too loa le pala fakasau leia na piki i lona fa ulu, mo le matemate leia na piki i lona lima, ti na kau aumai loa laua ki leinei ki loku aliki.

¹¹ Na sae loa e Tavite ona kofu, ti na toe fai fenaaki loa a tagata fuli ala na nonofo mo ia.

¹² Na lotou putu loa, mo fetagisi, ti mo sesunio o kaku ki le afiafi, o tupu ko Saulo mo Sonatane, lona vosa, mo le kakai o le Eteleno, mo le fale o Iselaele, talie kua lotou mamate i le seleta.

¹³ Na pati loa Tavite ki le tama leia na au mo logo ana : Ko ai a koe ? Ti na tali a ia : Ko au ko le vosa o se tagata matapule, ko se Amaleke.

¹⁴ Na pati loa Tavite kiate ia : Kolea na leaise ke i ai i le fafa ki le filifiliia a le Eteleno, o ke tamate a ia ?

¹⁵ Ti na kalagai loa e Tavite se tasi o ana kau tagata, o pati : Fakafeofi mai, ti ke tamate a ia ! Na taai loa e le tagata lena le tagata Amaleke, o mate ai loa.

¹⁶ Ti na pati loa Tavite kiate ia : Ke vilo lou toto ki lou fa ulu, talie kua masau lou gutu kiate koe, talie na ke pati : Na kau tamate le filifiliia a le Eteleno !

Lau mate o Saulo mo Sonatane e Tavite

¹⁷ Ko leinei le laumate leia na fatu e Tavite kia Saulo mo Sonatane, lona vosa,

¹⁸ ti na fakatotonu loa e ia ke ako a ia ki fanau a Suta. Ko le katiko o le kalolo ; e tuu a ia i le tosi a le tagata agatonu.

¹⁹ Kua tamate le tauleleka o Iselaele i ou mauga ! Kolea kua vilo ai ki le kele le kau toa ?

²⁰ Aua na kotou fakasa a ia i Kate, Aua na kotou fakasa le logo i ala o Asekaloni, Talie na fiafia a taineliki o le kau Filisitini, Talie na kakata a taineliki o le kau pagani.

²¹ Mauga o Kilipoa ! Ke aua na toe to kia koutou le sasau mo le ua, Ke aua na i ai ni faisaga e tuku ia ni uluaki fua ki moliga ! Talie ko le ganea lena na vivilo ai a paletau a le kau toa, Le paletau a Saulo ; Na leaise toe pani loa latou ki le lolo.

²² I mua o le toto o le kau kafo, I mua o le gako o le kau toa, Na leaise solomuli fua le kalolo a Sonatane. Ti na leaise toe liliu ata le seleta a Saulo.

²³ Na fealofani Saulo mo Sonatane i lola mauli katoa, Na leaise la mavete foki i lola mamate ; Na la maamaa ake i akuila, ti na la makeke ake i laione.

²⁴ Taineliki o Iselaele ! ke kotou tagi kia Saulo, Leia na fakalava ia koutou ki kie kula fulumalilie, Leia na teuteui ia okoutou kofu ki le aulo.

²⁵ Na vivilo feaki loa ni toa i le tau ? Na vilo feaki loa Sonatane i ou mauga ?

²⁶ E kau mamae, o tupu ko koe, Sonatane, loku taina ! Na ke fakatupu ia loku fiafia katoa, Na fulumalie kese ai lou alofa kiate au, O lasi ake i le alofa o fafine.

²⁷ Na vivilo feaki loa ni toa ? Na pupuli feaki loa ala masafu tau ?