Lua tosi a Petelo 3 - Tosi Tapu

Ko le toe liliu mai o le Aliki

¹ Ei oku alofaaga, ko le lua loa leinei o tosi e kau fai atu kia koutou. I le uluaki mo leinei e kau faiga i ni valoki ke fafagu lokoutou atamai mea,

² o tupu ke kotou manatui a nea ala na fakasa fakatomua e le kau polofeta maokioki, ti mo le fakatotonu o lotatou Aliki mo Fakamauli, leia na akonaki ki ai le kau apositolo.

³ Kotou iloa mua, i aso fakamuli, e au loa ni kau gologolo, ala e saele loa o mulimuli ki olatou oli veveli totonu.

⁴ E lotou pati loa : Kofea le fakapapau o lana toe liliu mai ? Ko leinei kua mamate foki otatou tamana, kae e tuu aifai a nea fuli ofaipe i le kamataaga o le fakatupu o le malama nei.

⁵ E leaise lotou fia iloa le nea leinei : Na maua i mua ni atu lagi i le folafola a le Atua, ti mo se malama nei leia na toso mei le vai ti na fai ki le vai,

⁶ ti na toe maumaui foki le malama lena ki a nea ana, i le vai o le lomaki ;

⁷ kae e taofi e le folafola lena le atu lagi mo le malama nei o le temi nei ke maumaui e le afi, i le aso o le fakamaau mo le maumaui o le kau agaveli.

⁸ Kae e i ai se nea, ei alofaaga, e leaise tonu ke kotou galoi : i mua o le Aliki e tatau se aso e tasi mo ni fetuu e afe, ti e tatau fetuu e afe mo se aso e tasi.

⁹ E leaise tuvai le Aliki i le fakasoko o lana fakapapau, ofaipe le lau a ni iki ; kae e kataki fualoa a ia kia koutou, talie e leaise loto a ia ke mate se tasi, kae ke kotou kaku fuli ki le fakasemala.

¹⁰ E au loa le aso o le toe liliu mai o le Aliki ofaipe se tagata kaia ; i le aso lena, e puli loa le atu lagi i se gugulu lasi, ti e vela loa a nea fuli i le lagi o okioki, ti e toe vela loa o okioki le kele mo gaoiaga i ai.

E tonu ke fakamea

¹¹ O tupu e maumaui loa a nea fuli ana, e tonu ke kotou asilisili maokioki ake i okoutou mauli ti mo lokoutou alofa ki le Atua.

¹² Kotou talitali ti kotou gaoi ke soko vave le aso o le Atua, aso leia e maumaui ai loa e le afi le atu lagi, ti e okioki ai loa a nea o le lagi i le tutu e ula o le afi !

¹³ Kae e tou talitali, o mulimuli ki lana fakapapau, ki ni lagi foou mo se kele foou, leia e nofo ai loa le maokioki.

¹⁴ Koia loa, alofaaga, i lakoutou talitali ki nea ana, kotou faiga ke maua atu koutou e mea mo lee mele i le tokamalie.

¹⁵ Kotou tui ko le kataki fualoa o lotatou Aliki ko lokoutou fakamauli a ia ofaipe lona tosi atu foki kia koutou e lotatou taina alofaina ko Paulo, o mulimuli ki le poto leia kua tuku kiate ia.

¹⁶ E fai e ia le nea lena i ana tosi fuli, ala e masau ai a ia ki ai ; i ana tosi ana, e i ai ni koga faigataa ke matala ki ai, ti e pikoi lolatou uiga e ni tagata fakapouli mo tui gagae, ofaipe la ake foki a koga o le Tosi, ke lotou malaia totonu ai.

¹⁷ Kae kia koutou, alofaaga, ala kua iloa ia le maoki i le temi nei, kotou tokaga, ke aua na ave koutou e le sese o le kau agaveli, ti ke kotou vilo loa mei lokoutou tuuaga makeke ;

¹⁸ kae ke kotou tuputupua i le kalasia mo le iloa o lotatou Aliki mo Fakamauli ko Sesu-Kilisito. Kiate ia le kololia, i le temi nei o lee gato ! Amene !