Lua tosi a Petelo 2 - Tosi Tapu

Valoki o toketa loi o le Lao

¹ Na i ai foki ni kau polofeta loi i le kakai, ti e toe i ai loa ia koutou ni toketa loi, ala e fakauluulu fakafufu ia loa ni magai lotu fakamalaia, ti i lalatou fakafiti ki le pule leia na totogi ia latou, e lotou aumai loa kia latou se maumau fakapunamauli.

² Ti e muli loa se toka api i lolatou mauli fakavale, ti e lauvelii loa le ala o le maoki o tupu ko latou.

³ I lolatou manumanu koloa, e lotou faigai loa ke lotou maua meia koutou ni koloa ki ni masau kaka, e latou ana kua tuu fakalogo ki ai se tautea fakaii talu mei fualoa, ti e leaise moe lolatou maumaui.

⁴ Talie, kapau na leaise fakasao e le Atua le kau aselo leia na agasala, kae na ti e ia latou ki ifeli, leia e taofi ai mo saisai ai latou o pilisoni i ni sosoni o le fakapouli ki le aso o le fakamaau ;

⁵ kapau na leaise fakasao e ia le malama afea, ti kapau na fakamauli fua e ia se ga toka valu o kau ai a Noe, le tagata fai akonaki lena o le faitotonu, i le temi leia na kakau mai ai e ia le lomaki ki se malama o ni tagata agasala ;

⁶ kapau na tautea e ia ki le maumau, ti na fakaliliu e ia o mugalafu a kolo o Sotoma mo Komola, o tuku laua ofaipe se fakamaoki ki tagata agasala o le temi ka au,

⁷ ti kapau na fakamauli e ia a Lote, ko le tagata agatonu, leia na mamae lasi ai o tupu ko le mauli fakalialia o tagata agasala ana,

⁸ (talie ko le tagata agatonu lena, leia na nofo i loto malie o latou, na fakamamae ia lona laumalie agatonu i le aso katoa, o tupu ko alatou aga fakalialia ala na tio a ia ki ai ti mo logo a ia ki ai).

⁹ Koia, e iloa e le Aliki le fakamauli o tagata maokioki mei le asiasii, ti e iloa e ia le taofi o le kau agasala ke tautea i le aso o le fakamaau,

¹⁰ tafito latou ala e makape i muli o le kanofi i se oli fakakelekele, ti e nukinuki ki le pule a le Atua. E lotou agamakeke mo loto fefeka, e leaise lotou i fuai i le lauveli ki le kau pule fakakololia o le lagi,

¹¹ kae ko le kau aselo, leia e taualuga ake i le makeke mo le mafimafi, e leaise fai ia fua se fakamaaui mo se lauveli kia latou i mua o le Aliki.

¹² Kae ko latou ana, ofaipe ni manu fekai ala e mulimuli fai ki oli o lolatou natula ti na fakatupu ke maumaui, e lauveli ki nea ala e leaise lotou iloa, ti e lotou pulinoa loa o tupu ko alatou aga fakalialia totonu,

¹³ ti e lotou tali loa i ai le totogi o lalatou agaveli. E lotou maua lolatou fiafia i le fakasoko olatou oli veveli i le lauatea ; ko ni tagata maimoa mo kelekele latou ; e lotou fiafia i alatou kaka, o kau i akoutou kaitasi fakatautaina.

¹⁴ E apele olatou mata i le tono fafine, ti e leaise lotou makona i le agasala ; e lotou maselei a laumalie ala koi gagae ; ti kua poto olatou loto i le manumanu ki le paaga ; ko ni fanau latou o le malaia.

E lotou tatau mo Palaame

¹⁵ Kua lotou tiaki le ala totonu, ti kua lotou sese ; kua lotou muli i le ala o Palaame, ko le vosa o Peole, leia na manako ki le totogi o le agaveli,

¹⁶ kae na valoki a ia o tupu ko lana patigataa : na masau loa se asino fafine gutu mate i se leo o se tagata, o taofi le valea o le polofeta.

E leaise lotou maua ia le Laumalie

¹⁷ Ko tagata ana ko ni vai mamasa latou, ko ni ao latou kua viligia i se afa ; ti kua taofi kia latou se nofoaga i le fakapouli lee gato.

E lotou fia poto mo fia nealasi

¹⁸ I ni masau fia nealasi mo loi, e lotou maselei ki a oli o le kanofi mo aga fakalialia latou ala nao mavae fua mei tagata ala e mauli sese ;

E lotou maumaui le lauatea ia Kilisito

¹⁹ e lotou fakapapau kia latou le lauatea kae ko latou totonu ala e popula ki ni aga fakalialia, talie e tasi popula le tagata ki le nea leia kua pule kiate ia.

²⁰ Koia, kapau i le oki o lolatou mavae mei nea kelekele o le malama nei, o tupu kua lotou iloa le Aliki mo le Fakamauli ko Sesu-Kilisito, e lotou toe tuku loa a nea ana ke toe too ia latou, ti ke toe malo ia latou, e toe veli ake loa lolatou mauli fakamuli i le uluaki.

²¹ Talie na malie ake kia latou ke aua na lotou iloa le ala o le faitotonu, i lona iloa kae lotou titua ki le folafola maokioki leia na tuku kia latou.

E lotou toe liliu ki alatou agasala mago

²² Kua soko kia latou le nea leia e pati ki ai le taagapati maoki : Kua toe liliu le kuli ki le nea leia na luluai e ia, ti kua toe uku ki le pela le tigamanu leia kua mea.