Lua tosi a Petelo 1 - Tosi Tapu

Fakaalofa

¹ Ko au Simone Petelo, ko le tagata fakasausau ti mo le apositolo a Sesu-Kilisito, kia latou ala kua kau mo matou ki se tui mauiga e tasi i le faitotonu o lotatou Atua mo lotatou Aliki ko Sesu !

² Ke liuliuga atu kia koutou le kalasia mo le tokamalie i le iloa o le Atua mo Sesu ko lotatou Aliki !

Kalaga a le Atua mo ona fua

³ Ko lona mafimafi fakaatua na soli ia mai kia tatou a nea fuli ala e aoga ki le mauli mo le tausi ki le Atua, i le iloa o leia kua kalagai ia tatou ke tou kau ki lona kololia totonu mo lona agamalie.

⁴ Koia kua soli ai e ia kia tatou ni fakapapau mauiga mo lalasi ai, o tupu ke tou kau ki le natula fakaatua, o sola mei le aga fakalialia leia e maua i le malama nei i le oli veli.

⁵ Koia ko koutou foki, ke kotou faiga i lokoutou makeke katoa ke maua e lakoutou tui le agamalie, e le agamalie le iloa,

⁶ e le iloa le loto lolomi, e le loto lolomi le kataki fualoa, e le kataki fualoa le alofa ki le Atua,

⁷ e le alofa ki le Atua le alofa fakatautaina, e le alofa fakatautaina le alofa.

⁸ Talie kapau e kotou maua a nea ana o lasi ia koutou, e leaise lotou tuku loa koutou ke nonofo noa mo sala fua i le iloa o lotatou Aliki ko Sesu-Kilisito.

⁹ Kae ko leia e leaise nofo ai a nea ana e kivi a ia, e leaise tio mamao a ia, ti kua galoi e ia le fakamea o ana agasala afea.

¹⁰ Koia loa, fetaina, ke kotou asilisili fakamalotoloto o fakamakeke lokoutou vokasio mo lokoutou filifili ; talie, i lakoutou fai le nea a ia, e leaise kotou toe tukia loa.

¹¹ Talie i le nea a ia, e fakamavaa fakalaulasi atu loa kia koutou le uluaga ki le Puleaga lee gato o lotatou Aliki mo Fakamauli ko Sesu-Kilisito.

Mauiga o le folafola fakakikite

¹² Ko le tupuaga a ia o laku tokaga o fakamanatu tuumau atu kia koutou a nea ana, logo ai kua kotou iloa latou, ti kua kotou tuu mau i le maoki leia kua kotou tali.

¹³ Ti e kau tio ofaipe soku maua i le temi katoa leia koi kau nofo ai i le falela leinei, ke fakaalaala koutou ki ni valoki,

¹⁴ talie e kau iloa e kau mavae fakapunamauli loa i le falela leinei, ofaipe lona fakasa mai kiate au e lotatou Aliki ko Sesu-Kilisito.

¹⁵ Kae e kau tokaga loa, o tupu ke kotou mafai ia le manatui tuumau o nea ana mo ka oki loa loku mate.

¹⁶ Talie na leaise motou fakasa atu kia koutou le mafimafi mo le toe liliu mai o lotatou Aliki ko Sesu-Kilisito, o mulimuli ki ni talatuku ala na motou fau fakapoto, kae o tupu kua motou tio maoki ki lona kololia ki omatou mata totonu.

¹⁷ Talie na maua e ia le fakamauiga mo le kololia mei le Atua ko le Tamana, i le lakaga leia na fakasa ai e lona kololia kiate ia se leo leia na pati : Ko loku Alo alofaina leinei, leia kua kau tuku ki ai loku alofa katoa.

¹⁸ Ti na motou logo ki le leo lena mei le lagi, i lamotou nonofo mo ia i le mauga maokioki.

¹⁹ Ti e motou fakamaoki ki le folafola kikite, leia e tonu ke kotou tokaga lasi ki ai, ofaipe se malama leia e mu i se ganea fakapouli, o kaku ki le mafoa mai o le ao, ti ke sopo le fetuu ao i okoutou loto.

²⁰ I mua o nea fuli, ke kotou iloa e koutou totonu e leaise feala ke fakamatala e se tasi se folafola kikite o le Tosi o mulimuli ki lona loto,

²¹ talie na leaise folafola fua e tasi na tuku mei se finegalo o le tagata, kae na ekenaki e le Laumalie maokioki ni tagata ke lotou masau mei le Atua.