Loma 9 - Tosi Tapu

Manatu loto a Paulo ki Iselaele

¹ E kau fakasa le maoki ia Kilisito, e leaise kau loi fua, e fakamaoki mai loku loto kiate au i le Laumalie Maokioki :

² E kau mafaia lasi ai ti e kau mamae tuumau i loku loto.

³ Talie e kau fakaamu ake ke kau malaia mo kau motusi meia Kilisito o tupu ko oku fetaina, mo oku matua i le kanofi,

⁴ ala e Iselaele, ala e maua ia le fufui, mo le kololia, mo sai, mo le lao, mo le atolasio, mo fakapapau,

⁵ ti mo le kau pateliaka foki, ala na tupu mei ai le tino o Kilisito, leia e taualuga i nea fuli, ko le Atua manuia o lee gato. Amene !

E kesekese le sakoga fakanatula mo le sakoga fakalaumalie

⁶ E leaise kau pati na leaise fua le folafola a le Atua. Talie e leaise Iselaele latou fuli ala e au meia Iselaele.

⁷ Ti e logo ai ko le sakoga latou o Apalaamo, e leaise ko latou fuli ko ana fanau ; kae e pati : Ia Isaake, e ke maua loa se sakoga e fakaigoa loa ki lou igoa,

⁸ ko lona uiga : E leaise ko fanau o le kanofi ala ko fanau a le Atua, kae ko fanau o le fakapapau ala e lau ko le sakoga.

⁹ Talie ko leinei le folafola o le fakapapau : I le temi totonu leinei, e kau toe au loa, ti e maua loa e Sala se vosa.

¹⁰ Ti e leaise gato i ai, kae na toe fai fenaaki kia Lepeka, leia na faitoe ia Isaake lotatou tamana ;

¹¹ (talie na leikiaise tupu a toe ti na leikiaise fai fua e laua se nea e malie pe ko se nea e veli, kae o tupu ke tuumau le fakatuutuu a le Atua o mulimuli ki le filifili leia e leaise fakalogo ki gaoi kae ki leia e kalagai ia),

¹² na pati kia Lepeka : E fakalogo loa le muamua ki le mulimuli, o mulimuli ki le nea na tosi :

¹³ Na kau alofa kia Sakopo Ti na kau vesia kia Esau.

Filifili o le kau pagani

¹⁴ Kolea loa ka tou pati ? Pe leaise faitotonu le Atua ? E leai ai !

¹⁵ Talie na pati a ia kia Moisese : E kau manavaalofa loa ki leia e kau manavaalofa ki ai, ti e kau aloalofa loa ki leia e kau aloalofa ki ai.

¹⁶ Koia loa, e leaise fakalogo le nea lena ki leia e loto, pe ki leia e makape, kae ki le Atua leia e manavaalofa.

¹⁷ Talie na pati le Tosi kia Falaone : Na kau fakatupu ia fua a koe ke fakasa iate koe loku mafimafi, ti ke fakasa ia loku suafa i le malama nei katoa.

¹⁸ Koia e manavaalofa ai a ia ki leia e loto a ia ki ai, ti e fakafefeka e ia leia e loto a ia ki ai.

¹⁹ E ke pati mai loa kiate au : Kolea koi ita ai a ia ? Talie ko ai e taofi ia lona finegalo ?

²⁰ Ei tagata, ko ai a koe, ke ke fakavisi ki le Atua ? Pe pati loa le ipu kele ki leia na fau ia a ia : Kolea na ke fau ai au ke kau feneeki ?

²¹ Pe leaise pule le tagata fai ipu ki le kele, ke fau e ia, mei se kele e tasi, se ipu mauiga ti mo se ipu masani ?

²² Ti kapau kua loto le Atua ke fakasa lona sausau, ti mo fakailo lona mafimafi, na katakii e ia i se kataki fualoa lasi ni ipu o le sausau ala na fau ki le malaia,

²³ ti kapau kua loto a ia ke fakasa a koloa o lona kololia ki ni ipu o le manavaalofa ala na teuteui fakatomua ki le kololia : Ko ai loa ke toe pati kiate ia ?

²⁴ Koia kua kalagai e ia tatou, o leaise gato fua mei le kakai Sutea, kae mei le kakai pagani foki,

²⁵ ofaipe lona fakasa i le Tosi a Oseo : E kau fakaigoa loa ko loku kakai leia na leaise ko loku kakai, ti ko loku alofaaga le fafine leia na leaise ko se alofaaga ;

²⁶ ti i le ganea leia e pati ai kia latou : E leaise ko koutou ko loku kakai ! E fakaigoa loa latou ko vosa o le Atua mauli.

²⁷ Kae na tagi a Esaia o uiga mo Iselaele : Ka api loa a vosa o Iselaele ofaipe le one o le tai, Efakamauli loa se ga toetoega.

²⁸ Talie e fakasoko loa e le Aliki lana folafola katoa i le malama nei, Ti e fai vave loa e ia lana fakapapau.

²⁹ Ti e faipe lona fakasa e Esaia i mua atu : Ka na leaise tuku mai Ele Aliki o kau tau kia tatou se fakaili, Na tou liliu loa ofaipe Sotoma, Na tou tatau loa mo Komola.

Iselaele mo le faitotonu i le tui

³⁰ Kolea loa ke tou pati ? Ko le kau pagani, ala na leaise afa ia le faitotonu, kua maua ia le faitotonu, le faitotonu leia e au mei le tui,

³¹ kae ko Iselaele, leia na afa ia se lao o le faitotonu, na leaise kaku ki le lao lena.

³² O tupu kolea ? Talie na afa e Iselaele a ia, o leai ki le tui, kae ki a gaoi. Na lotou tukia i le fatu fakatupu siga,

³³ ofaipe lona tuu i le Tosi : Ko leinei, e kau tuku i Sione se fatu fakatupu siga Ti mo se utu fakatupu malaia, Ti ko leia e tui kiate ia e leaise luma loa.