Loma 8 - Tosi Tapu

Le lauatea i le Laumalie

¹ Koia i le temi nei, e leaise tautea fua e tasi kia latou ala e nonofo ia Sesu-Kilisito.

² Talie, ko le lao o le Laumalie o le mauli ia Sesu-Kilisito, kua fakalauatea ia au mei le lao o le agasala ti mo le mate.

³ Talie - na leaise mafai a ia e le lao, talie na fakaliliu e le kanofi le lao o gaegae - na tautea e le Atua le agasala i le kanofi, i lana kakau mai, o tupu ko le agasala, lona Alo totonu i se kanofi na tatau mo le kanofi o le agasala.

⁴ O tupu ke fakasoko le faitotonu o le lao ia tatou, ala e leaise saele o mulimuli ki le kanofi kae o mulimuli ki le Laumalie.

⁵ Koia, ko latou ala e mauli o mulimuli ki le kanofi e tokaga ki nea o le kanofi, kae ko latou ala e mauli o mulimuli ki le Laumalie e tokaga ki nea o le Laumalie.

⁶ Ko le tokaga ki nea o le kanofi, ko le mate ; kae ko le tokaga ki nea o le Laumalie, ko le mauli mo le tokamalie.

⁷ Koia ko le tokaga ki nea o le kanofi, e fili ki le Atua, talie e leaise fakalogo le kanofi ki le Atua, ti e leaise mafai ai e ia.

⁸ Kae ko latou ala e nofo i le makeke o le kanofi, e leaise mafai ke lotou malie ki le Atua.

⁹ Kia koutou, e leaise kotou mauli o mulimuli ki le kanofi, kae o mulimuli ki le Laumalie, mo kapau e nofo maoki ia koutou le Laumalie o le Atua. Kapau e leaise maua e se tasi le Laumalie o Kilisito, e leaise kau a ia kiate ia.

¹⁰ Ti kapau e nofo Kilisito ia koutou, e maoki, kua mate le tino o tupu ko le agasala, kae e mauli le Laumalie o tupu ko le maokioki.

¹¹ Ti kapau e nofo ia koutou le Laumalie o leia na toe fakatuuake ia a Sesu mei le kau mate, ko leia na fakatuuake ia a Sesu-Kilisito mei le kau mate, e toe soli ia loa le mauli ki okoutou tino mamate i lona Laumalie leia e nofo ia koutou.

¹² Koia, fetaina, e leaise tou tuu maua fua ki le kanofi, ke tou toe mauli o mulimuli ki le kanofi.

¹³ Kapau e kotou mauli o mulimuli ki le kanofi, e kotou mamate loa ; kae kapau i le Laumalie e kotou tamate a gaoi o le tino, e kotou mauli loa.

¹⁴ Talie ko latou fuli ala e taki e le Laumalie o le Atua ko vosa o le Atua.

¹⁵ Ti na leaise kotou tali se laumalie o le popula ke kotou toe nonofo ai i le i ; kae kua kotou tali se Laumalie o le fufui, leia e tou kalaga ai : Apa ! Tamana !

¹⁶ E fakamaoki le Laumalie totonu ki lotatou laumalie ko tatou ko fanau a le Atua.

¹⁷ Ti kapau ko tatou ko fanau, ko tatou foki ko fanau maua tofiga : Ko fanau maua tofiga a le Atua, ti mo maua tofiga fakatasi mo Kilisito, mo kapau e tou mamae fakatasi foki mo ia, o tupu ke tou toe fakatasi foki mo ia i lona kololia.

Le kololia o le temi ka au

¹⁸ E kau pati, e leaise gali ke fakatatau a mamae o le temi nei ki le kololia ka au, leia ka fakasa loa kia tatou.

¹⁹ Koia e talitali ai le malama nei mo se oli mamae ki le fakasa o vosa o le Atua.

²⁰ Talie na fakataulaloi le malama nei ki le vaiga, kae na leaise loto a ia ki ai, e leia na tuku ia a ia ki ai,

²¹ mo se amanaki e fakalauatea loa a ia mei le popula o le pala, o tupu ke kau foki mo ia ki le lauatea o fanau a le Atua i le kololia.

²² Kae e tou iloa, o kaku mai ki le aso nei, e e tagi ti mo mamae le malama nei katoa i mamae o le temi fai fanau.

²³ Ti e leaise gato fua iate ia, kae ko tatou foki, a nei e maua ia a uluaki fua o le Laumalie, e tou fetagisi i otatou loto, o talitali ki lotatou fufui ti mo le saofaki o otatou tino.

²⁴ Talie na saofaki tatou e le amanaki malie. Kae ko le amanaki malie leia e tou tio ki ai e leaise ko se amanaki : Ko le nea leia e tou tio ki ai, pe mafai ke tou toe amanaki ki ai ?

²⁵ Kae kapau e tou amanaki ki le nea leia e leaise tou tio ki ai, e tou talitali ki ai mo le loto kataki fualoa.

²⁶ Ti e tokoi mai foki le Laumalie kia tatou i lotatou gaegae, talie e leaise tou iloa le nea leia e malie ke tou kole i atatou faikole. Kae e faikole le Laumalie totonu kia tatou i ni tagi e leaise mafai ke fakasa e ni kupu.

²⁷ Ti ko le Atua leia e tio ki loto, e iloa ia le manatu a le Laumalie, talie e ulufaki e ia le kau sagato o mulimuli ki le finegalo o Atua.

Le alofa lee gato o le Atua kia tatou

²⁸ Ti e tou iloa e gaoi a nea fuli ki le malie o latou e alofa ki le Atua, o latou kua kalagai o mulimuli ki lana fakatuutuu.

²⁹ Talie ko latou ala na iloa fakatomua e ia, na fakatuutuu fakatomua foki e ia latou ke tatau mo le paaki o lona Alo, o tupu ke liliu lona Alo ko le uluaki tupu o ni fetaina toka api.

³⁰ Ti ko latou ala na fakatuutuu fakatomua e ia, na kalagai foki e ia latou ; ti ko latou ala na kalagai e ia, na fakamatatonu foki e ia latou ; ti ko latou ala na fakamatatonu e ia, na fakakololia foki e ia latou.

³¹ Kolea loa ke tou pati ki nea ana ? Kapau e kau le Atua mo tatou, ko ai loa ka fakafesagai mai kia tatou ?

³² a ia leia na leaise saofaki ia lona Alo totonu, kae na soli e ia a ia o tupu ko tatou fuli, pe feaki ke aua na soli mai loa e ia kia tatou a nea fuli foki mo ia ?

³³ Ko ai ka fakalakasala ia loa le kau filifiliia a le Atua ? Ko le Atua leia e fakamatatonu ia !

³⁴ Ko ai ka tautea ia loa latou ? Ko Kilisito leia na mate ; ti kua toe tuuake foki a ia, ti kua nofo a ia i le fetuu atamai o le Atua, ti e faikole a ia kia tatou !

³⁵ Ko ai ka fakamavae ia loa tatou mei le alofa o Kilisito ? Pe ko le masaki loa, pe ko le mamae, pe ko le fakaveliveli, pe ko le fia kai, pe ko le mativa, pe ko le tutamaki, pe ko le seleta ?

³⁶ Ofaipe le nea leia e tuu i le Tosi : Se tupu ko koe, e tuku ai matou ki le mate i le aso fuli, Ti e tio ai kia matou ofaipe ni ovi ke ave ki le fale tamate manu.

³⁷ Kae i nea fuli ana, e motou malo lasi i leia e alofa kia tatou.

³⁸ Talie e kau iloa papau e leaise ko le mate, pe ko le mauli, pe ko le kau aselo, pe ko le kau tominasio, pe ko nea o le sekulo nei, pe ko nea o le sekulo ka au,

³⁹ pe ko makeke, pe ko le taualuga, pe ko le loloto, pe ko se tasi ake a nea na fakatupu, e mafai ia loa ke fakamavae ia tatou i se aso mei le alofa o le Atua, leia kua fakasa kia tatou ia Sesu-Kilisito lotatou Aliki.