Loma 7 - Tosi Tapu

Kua lauatea le kilisiteano i le lao

¹ Fetaina, pe leaise kotou iloa, e kau masau ki ni tagata ala e iloa ia le lao, e pule le lao ki le tagata i le temi leia e mauli ai ?

² Koia e sai le fafine avaga ki lona avaga e le lao i le temi katoa e mauli ai lona avaga ; kae kapau e mate le tagata, e lauatea loa le fafine mei le lao leia na sai ia a ia ki lona avaga.

³ Kapau loa, i le koi mauli o lona avaga, e liliu le fafine lena ko le avaga o se tasi ake tagata, e fakaigoa loa a ia ko le fafine tono ; kae kapau e mate le tagata, e lauatea loa le fafine mei le lao ; e leaise tono loa a ia i lana toe liliu ko le avaga o se tasi ake tagata.

⁴ Koia, ei oku fetaina, ko koutou foki, kua kotou mamate, i le tino o Kilisito, ki nea o le lao, o tupu ke kotou fakalogo ki se tasi ake, ki leia kua toe tuuake mei le kau mate, talie ke tou maua ni fua ki le Atua.

⁵ Talie, i le temi leia na tou mauli ai i le kanofi, ko oli fakavale o agasala, ala na tupu mei le lao, na gaoi i otatou koga tino, ke tou maua ai ni fua ki le mate.

⁶ Kae i le temi nei, kua fakamavae tatou mei le lao, talie kua tou mamate ki le lao lena na tou pikiia ai, o tupu ke tou tausi i se loto foou, kae e leai i le matai tosi leia kua matua.

Le uiga o le Lao

⁷ Kolea loa latatou pati ? Pe agasala le lao ? Leai ai ! Kae ka na aua le lao, na leaise kau iloa le agasala. Talie na leaise mafai ke kau iloa le manumanu, mo ka na leaise pati le lao : Aua na ke manumanu loa.

⁸ Ti ko le agasala, i lana too le faigamalie, na fakatupu iate au o tupu ko le fakatotonu o le lao, a manumanu kesekese fuli ; talie sala lao e mate le agasala.

⁹ Kiate au, i le temi leia na kau nofo ai i mua sala lao, na kau mauli ; kae i le temi leia na au ai le fakatotonu, na toe mauli le agasala, ti ko au, na kau mate.

¹⁰ Koia, ko le fakatotonu leia na taki ia ki le mauli, na ave ia au ki le mate.

¹¹ Talie ko le agasala, i lana too le faigamalie o le fakatotonu, na fakasese ia au, ti na tamate ia au.

¹² Koia e maokioki ai le lao, ti e maokioki le fakatotonu, mo totonu, ti mo malie.

¹³ Pe kua liliu le nea leia e malie ko se mateaga kiate au ? E leai ai ! Kae ko le agasala, o tupu ke sa a ia ko le agasala i lana tuku mai kiate au le mate i le nea e malie, e liliu o toe asilisili agasala.

Le lao o le agasala

¹⁴ Io, e tou iloa ko le lao e fakalaumalie ; kae ko au, e kau kanofi, ti kua fakatau au ke popula ki le agasala.

¹⁵ Talie e leaise kau matala ki le nea leia e kau fai : E leaise kau fai le nea leia e kau loto ki ai, ti e kau fai le nea leia e kau vesia ki ai.

¹⁶ Ti kapau e kau fai le nea leia e leaise kau loto ki ai, e kau fakamaoki e malie le lao.

¹⁷ Koia e leaise ko au leia koi fai ia le nea lena, kae ko le agasala leia e nofo iate au.

¹⁸ E kau iloa e leaise nofo iate au le nea e malie, ko lona uiga i loku kanofi : Talie e kau maua ia le loto fia fai ki le nea e malie, kae e leai le mafai.

¹⁹ Talie e leaise kau fai ia le malie leia e kau loto ki ai, kae e kau fai ia le veli leia e leaise kau loto ki ai.

²⁰ Ti kapau e kau fai le nea leia e leaise kau loto ki ai, e leaise ko au loa leia e fai ia a ia, kae ko le agasala leia e nofo iate au.

²¹ Koia e kau maua iate au le lao leinei : Ka kau loto ke fai le nea e malie, e kau fai fua le veli.

²² Talie e kau maua loku fiafia i le lao a le Atua i loku loto totonu ;

²³ kae e kau tio i oku koga tino ki se tasi ake a lao leia e tau ki le lao o loku loto, ti e fakapopula ia au ki le lao o le agasala leia e nofo i oku koga tino.

²⁴ Tagata fakaaloalofa ko au ! Ko ai e saofaki ia loa au mei le tino mate leinei ?…

²⁵ Ke fakafetai ki le Atua ia Sesu-Kilisito lotatou Aliki !… Koia, i loku loto e kau popula ki le lao a le Atua, kae i loku kanofi e kau popula ki le lao o le agasala.