Loma 6 - Tosi Tapu

Mate mo Kilisito ke toe tupu mo Kilisito

¹ Kolea loa latatou pati ? Pe tou nonofo loa i le agasala, o tupu ke lasi ai le kalasia ?

² E leai ai ! Ko tatou ala kua mate ki le agasala, e feaki loa ke tou toe mauli i le agasala ?

³ Pe leaise kotou iloa ko tatou fuli ala kua papitema ia Sesu-Kilisito, kua papitema tatou i lona mate ?

⁴ Koia i le papitema kua tou tanu fakatasi mo ia i lona mate, o tupu, i le toe tuuake o Kilisito mei le kau mate i le kololia o le Tamana, ke tou saele, mo tatou foki, i se mauli foou.

⁵ Talie, kapau kua tou liliu ko se laakau e tasi mo ia i latatou fakatatau ki lona mate, e tou toe fenaaki foki i latatou fakatatau ki lona toe tuuake ;

⁶ o tou iloa na tutuki i le koluse lotatou tagata afea mo ia, o tupu ke puli le makeke o le tino o le agasala, ti ke aua na tou toe popula ki le agasala ;

⁷ talie ko leia kua mate kua lauatea a ia i le agasala.

⁸ Koia kapau kua tou mate ai mo Kilisito, e tou tui e tou toe mauli loa foki mo ia,

⁹ o tou iloa e leaise toe mate Sesu-Kilisito leia na toe tuuake mei le kau mate, ti e leaise toe maua e le mate se pule kiate ia.

¹⁰ Talie na mate a ia, ti na mate tua tasi a ia o tupu ko le agasala ; ti ko leinei kua toe liliu a ia ki le mauli, ti e mauli a ia ki le Atua.

¹¹ Koia ko koutou totonu, ke kotou tio ai kia koutou kua kotou mate maoki ki le agasala, ti kua kotou mauli ki le Atua ia Sesu-Kilisito.

¹² Ke aua na toe pule le agasala i lokoutou tino mate, ti ke aua na kotou fakalogo ki ona olioli.

¹³ Ke aua na kotou tuku ki le agasala okoutou koga tino, ofaipe ni nea gaoi o le agasala, kae ke kotou tuku koutou totonu ki le Atua, ofaipe ni tagata mauli kua sao mei le mate, ti ke kotou momoli ki le Atua okoutou koga tino ofaipe ni nea gaoi a le maokioki.

¹⁴ Talie e leaise maua loa e le agasala se pule kia koutou, talie e leaise kotou nonofo i le lao, kae i le kalasia.

¹⁵ E a koia ! Pe tou agasala loa talie e leaise tou nonofo i le lao, kae i le kalasia ? Leai ai !

¹⁶ Pe leaise kotou iloa ka kotou tuku koutou ke tausi ki se tasi o fakalogo kiate ia, e kotou popula ki leia e kotou fakalogo ki ai : pe ki le agasala leia e taki ia ki le mate, pe ki le fakalogo leia e taki ia ki le faitotonu ?

¹⁷ Kae ke tuku a fakafetai ki le Atua, talie, i le oki o lokoutou popula ki le agasala, kua kotou fakalogo i le loto ki le lekula o le akonaki leia na tuku atu kia koutou.

¹⁸ Kua oki koutou i le fakalauatea mei le agasala, kua kotou liliu o popula ki le faitotonu.

¹⁹ E kau masau ofaipe se tagata, o tupu ko le gaegae o lokoutou kanofi. Ofaipe lakotou tuku ia okoutou koga tino ke popula ki le mauli fakalialia mo le agaveli, o kotou kaku ai ki le mauli maveuveu, ke kotou tuku foki, i le temi nei, okoutou koga tino ke popula ki le agatonu, ke kotou kaku ai ki le maokioki.

²⁰ Talie, i le temi leia na kotou popula ai ki le agasala, na kotou lauatea mei le faitotonu.

²¹ Koa a fua ala na kotou maua loa ? Ko ni fua ala kua kotou luma ki ai i le temi nei. Talie ko le fakaokiaga o nea ana, ko le mate.

²² Kae i le temi nei, i lokoutou lauatea mei le agasala, o popula ki le Atua, e kotou maua a fua o le maokioki ti mo le fakaokiaga ko le mauli lee gato.

²³ Talie ko le totogi o le agasala, ko le mate ; kae ko le nea alofa soli noa o le Atua, ko le mauli lee gato ia Sesu-Kilisito lotatou Aliki.