Loma 5 - Tosi Tapu

Fua o le faitotonu i le tui

¹ Koia i lotatou fakamatatonu i le tui, e tou maua ai le tokamalie mo le Atua i lotatou Aliki ko Sesu-Kilisito,

² iate ia kua mafai ai i le tui ke tou ulu ki le kalasia lena, leia e tou tuu makeke i ai, ti e tou fiafia i le amanaki malie ki le kololia o le Atua.

³ Ti e leaise gato i ai, e tou fiafia foki i mamae, talie e tou iloa e tupu mei le mamae le kataki fualoa,

⁴ mei le kataki fualoa le malo i le asiasi, ti mei le malo le amanaki malie.

⁵ Ti e leaise kaka le amanaki lena, talie kua liligi le alofa o le Atua ki otatou loto e le Laumalie Maokioki leia kua soli mai kia tatou.

⁶ Talie, i le temi leia na tou nonofo ai sala makeke, na mate Kilisito ki le kau agaveli, i le temi leia na fakatuutuu ki ai.

⁷ E faigataa ai le mate ki se tagata agatonu ; e lagi feala loa ke mate se tasi ki se tagata agamalie.

⁸ Kae na fakamaoki e le Atua lona alofa kia tatou, i leia koi tou nonofo ko nea agasala, na mate Kilisito kia tatou.

⁹ Koia, i le temi leinei kua tou fakamatatonu ai e lona toto, e toe asilisili saofaki loa e ia tatou mei le sausau.

¹⁰ Talie kapau, i le temi leia na tou fefiliaki ai, na fakatokatoka tatou mo le Atua i le mate o lona Alo, e toe tasi ake loa lotatou saofaki e lona mauli i le oki o lotatou fakatokatoka mo le Atua.

¹¹ E leaise gato fua i ai, kae e tou fiafia foki i le Atua i lotatou Aliki ko Sesu-Kilisito, leia kua tou maua ai le fakatokatoka i le temi nei.

Le agasala mo le kalasia

¹² Koia, ofaipe le ulu o le agasala ki le malama nei i se tagata e toka tasi, ti i le agasala le mate, o kaku ai loa le mate ki tagata fuli talie na agasala tagata fuli…

¹³ Talie na nofo le agasala i le malama nei o kaku ki le lao. Kae na leaise lau le agasala, talie na leaise lao.

¹⁴ Kae na pule le mate meia Atama o kaku mai kia Moisese, kia latou fuli foki ala na leaise agasala i se maumau e tatau mo leia a Atama, leia ko le paaki o leia na tonu ke au.

¹⁵ Kae e leaise tatau le sala mo le soli noa ; talie, kapau i le sala a se toka tasi na mamate ai se toka api, e toe feaki ake loa le lasi o le liligi ki se toka api o le kalasia o le Atua ti mo le soli noa o le kalasia, i se fa tagata e toka tasi, ko Sesu-Kilisito.

¹⁶ Ti e leaise fakatatau le soli noa o le kalasia ki le nea na soko i le agasala a se tagata e toka tasi ; talie na oki le sala e tasi malie, ti na liliu le fakamaau o tautea, kae ko le soli o le kalasia e liliu o fakamatatonu i le oki o ni sala mauke ai.

¹⁷ Kapau na pule le mate i le sala a se fa toka tasi, e feaki ake loa le pule o le mauli ia latou e tali ia a koloa mauke ai o le kalasia ti mo le nea alofa o le faitotonu ia Sesu-Kilisito toka tasi.

¹⁸ Koia, i le sala a se tagata e toka tasi, ko Atama, na tupu ai le tautea o tagata fuli, i le gaoi faitotonu foki a se toka tasi, ko Sesu-Kilisito, na mafola ai le fakamatatonu leia e soli ia le mauli ki tagata fuli.

¹⁹ Talie, i le patigataa a se tagata e toka tasi, na liliu se toka api o agasala, i le fakalogo foki a se tagata e toka tasi, e liliu loa se toka api o faitotonu.

²⁰ Kae na ulu mai le lao ke asilisili ai le agasala, kae i le ganea leia na lasi ai le agasala, na toe lasi ake ai le kalasia,

²¹ o tupu, ke faipe le agasala leia na pule ki le mate, ke toe pule foki le kalasia i le faitotonu leia e taki ia ki le mauli ia Sesu-Kilisito ko lotatou Aliki.