Loma 3 - Tosi Tapu

Faigamalie o le kau Sutea

¹ Kolea loa le malie leia e maua e le Sutea, ti kolea le aoga o le silikosisio ?

² E lasi ai le malie i nea fuli ; uluaki na tuku le folafola a le Atua ki le kau Sutea.

³ Kolea koia ! Kapau na leaise tui ni iki, pe fakapuli loa e lolatou tui gataa le agatonu o le Atua ?

⁴ E leai ai ! Ke maoki le Atua, kae loi tagata fuli, o mulimuli ki le nea leia kua tosi : O tupu ke maua a koe e faitotonu i au masau, Ti ke ke malo i lou fakamaau.

⁵ Kae kapau e sa i latatou lee faitotonu le faitotonu a le Atua, kolea loa latatou pati ? Pe leaise faitotonu le Atua mo ka liligi e ia lona sausau ? (E kau masau ofaipe masau a tagata).

⁶ E leai ai ! Talie kapau ko ia, pe feaki loa le fakamaaui e le Atua le malama nei ?

⁷ Ti kapau, i laku loi, e toe sa lasi ake ai le maoki o le Atua mo lona kololia, kolea koi fakamaaui ai au ofaipe se tagata agasala ?

⁸ Ti kolea e leaise tou fai ai loa le veli o tupu ke soko ai se malie, ofaipe le pati a ni iki ala e lauveli mai kia matou ? E tonu le tautea o kakai ana.

E agasala tagata fuli

⁹ Kolea koia ! Pe tou malie ake ia latou ? E leai ai. Talie kua oki i lamatou fakamaoki e nonofo tagata fuli, Sutea mo Keleka, i le makeke o le agasala,

¹⁰ o mulimuli ki le nea leia kua tosi : E leai se tagata agatonu, Eleai se toka tasi fua ;

¹¹ E leai se tasi fua e poto, Eleai se tasi fua e afa ia le Atua ; Kua lotou sese fuli, kua lotou fakalialia fuli ;

¹² E leai se toka tasi e fai ia le malie, Eleai se toka tasi fua.

¹³ E fai olatou fatakia pe ni tanuma mavaa, Elotou fakaaoga olatou alelo ki le kaka ; Elotou maua i olatou laugutu se vai kona o le gata velo.

¹⁴ E apele lolatou gutu i le tutuku mo le fakamalaia kona.

¹⁵ E lotou maua ni vae maamaa ki le liligi o le toto,

¹⁶ E nofo le maumau mo le malaia i olotou ala,

¹⁷ E leaise lotou iloa le ala o le tokamalie.

¹⁸ E leaise maua le i ki le Atua i olatou mua.

¹⁹ Ti e tou iloa ko nea fuli ala e pati ki ai le lao e fakasa e ia kia latou ala e mauli i le lao, o tupu ke tapono a gutu fuli ti ke iloa kua agasala le malama nei katoa i mua o le Atua.

²⁰ Talie e leaise fakamatatonu loa se tasi i mua o le Atua e gaoi o le lao, talie e tupu mei le lao le iloa o le agasala.

Faitotonu i le tui kia Kilisito

²¹ Kae ko leinei, sala mo le lao kua fakasa e le Atua lana faitotonu, o fakamaoki ki ai le lao mo le kau polofeta,

²² le faitotonu o le Atua i le tui kia Sesu-Kilisito kia latou fuli ala e tui.

²³ E leaise kese se tasi : Talie kua agasala a tagata fuli ti kua lotou sala i le kololia o le Atua ;

²⁴ ti kua fakamatonu fakaalofa latou e lona kalasia, i le totogi leia e maua ia Sesu-Kilisito.

²⁵ Ko ia leia kua fakatuutuu e le Atua ko le failaulau fakamolemole o agasala kia latou ala e tui loa ki lona toto, o tupu ke fakasa ai lana faitotonu, talie na leaise fakatuaa e ia a agasala ala na fai i mua, i le temi o lona kataki fualoa.

²⁶ Kae i le temi nei e fakasa e ia lona faitotonu, o tupu ke iloa e faitotonu a ia, ti e toe fakamatatonu e ia leia e tui kia Sesu.

²⁷ Kofea loa le tupuaga o le fakakololia ? Kua oki a ia i le too. E le lao fea ? E le lao o gaoi ? Leai, kae kua too a ia e le lao o le tui.

²⁸ Talie e tou tuku e fakamatatonu le tagata i le tui, sala mo gaoi o le lao.

²⁹ Pe ko le Atua, ko le Atua fai a ia o le kau Sutea ? Pe leaise ko le Atua foki a ia o le kau pagani ? E io, ko le Atua foki a ia o le kau pagani,

³⁰ talie ko le Atua fai e tasi, leia e fakamatatonu ia loa i le tui le kau silikosisio mo le kau lee silikosisio.

³¹ Pe tou fakapuli ai loa le lao i le tui ? E leai ai ! Kae, e motou fakamaoki ki le lao.