Loma 2 - Tosi Tapu

Le fakamaau a le Atua

¹ Ei tagata, ko ai a koe, a koe leia e fakamaau, e leaise ke sao loa ; talie, i lau fakamaaui ala ake, e ke fakamaaui a koe totonu, talie ko koe leia e fakamaaui e toe fai ia a nea ana.

² Koia, e tou iloa ko le fakamaau a le Atua kia latou ala e fai ia a nea ana e mulimuli ki le maoki.

³ Pe ke pati loa, ei tagata, leia e fakamaaui ia latou ala e fai ia a nea ana, ti e toe fai ia latou, e ke sao loa i le fakamaau a le Atua ?

⁴ Pe ke fakanoai loa a koloa o lona agamalie, mo lona kataki fualoa ti mo lona manavaalofa faifualoa, o leaise ke iloa e ekenaki a koe e le agamalie o le Atua ki le fakasemala ?

⁵ Kae, i lau fakafefeka ti mo lou loto lee fakasemala, e ke tanaki ai kiate koe se koloa o le sausau ki le aso o le sausau ti mo le fakasa o le fakamaau totonu a le Atua,

⁶ leia e totogi ia loa ki tagata taki toka tasi o mulimuli ki ana gaoi :

⁷ Ko le mauli kia latou ala, i lalatou kataki fualoa o fai le nea e malie, e afa ia le kololia, mo le fakamauiga, ti mo le mauli lee mate ;

⁸ kae ko le sausau mo le mamae lasi kia latou ala e agatuu, mo patigataa ki le maoki kae patigaofie ki le agasala.

⁹ Ko le tautea mo le mamae ki tagata fuli ala e fai ia le veli, o muamua ki le Sutea ti mo le Keleka foki !

¹⁰ Ko le kololia, mo le fakamauiga, ti mo le tokamalie, ki leia e fai ia le malie, o muamua ki le Sutea ti mo le Keleka foki !

¹¹ Talie e leaise fakakese e le Atua se tasi i ona mua.

¹² Ko latou fuli ala na agasala sala lao e mamate loa sala lao, ti ko latou fuli ala na agasala i le lao e fakamaaui loa e le lao.

¹³ Talie e leaise ko latou ala e fakalogo ki le lao e faitotonu i mua o le Atua, kae ko latou ala e fai ia le lao e faitotonu.

¹⁴ Ka fai e le kau Pagani, ala e leaise maua ia le lao, le nea leia e tuu i le lao, e lotou liliu, latou ala e leaise maua ia le lao, ko se lao kia latou totonu ;

¹⁵ e lotou fakasa kua tosi le gaoi a le lao i olatou loto, ti e fakamaoki foki ki ai olatou loto, o valoki mo fakatonuia latou e alatou manatu.

¹⁶ E sa loa le nea lena i le aso leia e fakamaaui ai loa e le Atua ia Sesu-Kilisito a gaoi fakapulipuli a tagata, o mulimuli ki laku Evaselio.

Le kau Sutea mo le Lao

¹⁷ A koe, leia e ke fakaigoa a koe ko le Sutea, e ke fanaki katoa ki le lao, e ke nekenekea i le Atua,

¹⁸ e ke iloa ia lona finegalo, e ke tio malama ki le nea leia e mauiga talie kua akoi a koe e le lao

¹⁹ e ke pati ko le tagata takitaki a koe o le kau kivi, ko le malama a koe o latou ala e nonofo i le fakapouli,

²⁰ ko le toketa a koe o le kau vale, ko le pule a koe o le kau valelea, talie e ke maua i le lao le lekula o le poto ti mo le maoki ;

²¹ Koia ko koe, leia e ke ako ia ala ake, e leaise ke ako fua a koe totonu ! Ko koe, leia e ke akonaki ke aua na kaia, e ke kaia !

²² Ko koe, leia e ke pati ke aua na tono, e ke tono ! Ko koe, leia e ke fakalialia ki taulaatua, e ke kai a nea tapu !

²³ Ko koe, leia e ke nekenekea i lau maua le lao, e ke fakamatagafua le Atua i lau maumaui ia le lao !

²⁴ Talie kua lauvelii le suafa o le Atua i le kau pagani o tupu ko koutou, ofaipe lona tuu i le Tosi.

²⁵ E aoga le silikosisio mo kapau e ke fai le lao, kae kapau e ke maumaui le lao, e leaise uiga o lou silikosisio.

²⁶ Koia kapau e fai e le lee silikosisio a fakatotonu o le lao, pe leaise lau loa lona lee silikosisio ko se silikosisio ?

²⁷ Ko le tagata leia e lee silikosisio i lona tino kae fai ia le lao, pe leaise fakamaaui loa e ia a koe, leia e maumaui ia a ia, kae e ke maua ia le tosi totonu o le lao mo le silikosisio i lou tino ?

²⁸ Ko le Sutea, e leaise ko ia leia e maua ia a agaaga, ti ko le silikosisio e leaise ko ia leia e sa i le kanofi.

²⁹ Kae ko le Sutea, ko ia leia e nofo i le loto, ti ko le silikosisio ko leia o le loto, i le Laumalie, kae e leai i le matai tosi. E leaise au le fakavikiviki a le Sutea lena mei tagata kae mei le Atua.