Loma 13 - Tosi Tapu

Le fakalogo ki pule fakamalama

¹ Ke fakataulalo a tagata fuli ki pule taualuga ; talie e leai se pule leia e leaise au mei le Atua, ti ko latou ala kua fakanofo, na fakanofo latou e le Atua.

² Ko leia e agatuu ki le pule, e agatuu ki le fakatuutuu a le Atua, ti ko latou ala e agatuu, e aumai ia loa kia latou le tautea.

³ Talie e leaise i ki le kau taki i se nea e malie, kae i se nea e veli. Kapau e ke loto ke aua na ke i ki le pule, fai le nea e malie, ti e fakamaoki loa a ia kiate koe.

⁴ Ko le pule ko le tagata fakasausau a ia a le Atua o uiga mo lou malie. Kae kapau e ke fai le veli, ke ke i ; talie e leaise too noa e ia le seleta : ko ia ko le tagata fakasausau a le Atua, ke fai ia le lagavaka ti mo tautea ia leia e fai ia le veli.

⁵ Koia e aoga ai ke fakataulalo, o leaise tupu fua ko le i ki le tua, kae o tupu foki ko le loto.

⁶ Ko le tupuaga foki lena o lakoutou totogi a tukusau. Talie ko pule ko tagata fakasausau latou a le Atua, ke tokaga ki le gaoi lena.

⁷ Ke kotou liufaki ki tagata fuli le nea leia e tonu ke maua e ia : le tukusau ki leia e tonu ke kotou ui ki ai, le totogi ki leia e tonu ke kotou totogi ki ai, le i ki leia e tonu ke kotou i ki ai, le fakaapaapa ki leia e tonu ke kotou fakaapaapa ki ai.

Le alofa fakatautaina

⁸ Aua na kotou tuu maua ki se tasi, kae ke kotou maua fealofani i okoutou vasaa, talie ko leia e alofa ki la ake kua fai ia le lao.

⁹ Koia ko fakatotonu : Aua na ke tono loa, aua na ke tukipo loa, aua na ke kaia loa, aua na ke manumanu loa, ti mo iki atu fakatotonu, e fakatoetoe fuli i le folafola leinei : E ke alofa loa ki lou oloi ofaipe koe totonu.

¹⁰ E leaise fai e le alofa se veli ki le oloi : koia ko le alofa ko le katoaaga a ia o le lao.

Mauli alaala

¹¹ E mauiga le nea a ia talie kua kotou iloa foki le temi kua tou nofo ai : ko le ola leinei ke kotou alaala ai mei le moe, talie i le temi nei kua toe asilisili ofi mai kia tatou le saofaki i le temi leia na tou tui ai.

¹² Kua vave fua le oki o le pouli, kua ofi fua le ao. Koia ke tou tiaki ai a gaoi o le pouli, kae ke tou tui a masafu o le malama.

¹³ Ke tou saele agatonu, ofaipe le saele i le ao, o mamao mei kai fakavale, mo le kona, mo fiafia fakavale, mo fai feauaki, mo le fefele ti mo le finenonofo.

¹⁴ Kae ke kotou kofu ki le Aliki ko Sesu-Kilisito, ti ke aua na kotou tokaga ki le tino o mulimuli ki ona olioli.