Loma 10 - Tosi Tapu

Ko le tui gataa ko le tupuaga a ia o le taofi o fakapapau ki Iselaele

¹ Fetaina, ko le fakaamu o loku loto ti ko laku kole ki le Atua o uiga mo latou, ke lotou saofaki.

² Talie e kau fakamaoki kia latou, e lotou maua le alofa ki le Atua, kae sala atamai :

³ I lolatou fakapouli ki le faitotonu a le Atua, ti mo lalatou faiga ke fakatuu lalatou faitotonu, kua leaise lotou fia fakalogo ki le faitotonu a le Atua ;

⁴ talie ko Kilisito ko le fakaokiaga o le lao, ke fakamatatonu ai latou fuli ala e tui.

⁵ Koia na fakasa ai e Moisese le faitotonu leia e au mei le lao : Ko le tagata leia e fai ia a nea ana, e mauli loa ia latou.

⁶ Kae ko leinei le masau a le faitotonu leia e au mei le tui : Aua na ke pati i lou loto : Ko ai ka pale loa ki lagi ? Ko le fakaifo mai a ia o Kilisito ;

⁷ pe : Ko ai ka ifo loa ki le vanu ? Ko le paleaki ake a ia o Kilisito mei le kau mate.

⁸ Kolea le pati a le faitotonu ? E ofi le folafola kiate koe, i lou gutu mo lou loto. Ti ko le folafola o le tui, leia e motou fakasa.

⁹ Kapau e ke kofesio i lou gutu le Aliki Sesu, ti ka ke tui i lou loto kua toe fakatuuake a ia e le Atua mei le kau mate, e saofaki loa a koe.

¹⁰ Talie i le tui i le loto e kaku ai ki le faitotonu, ti i le fakasa i le gutu e kaku ai ki le mauli, ofaipe lona fakasa e le Tosi :

¹¹ E leaise luma loa leia e tui kiate ia.

¹² E leaise fai kesekese ki le Sutea mo le Keleka, talie e la Aliki toka lua ki le Aliki e tasi, leia e mou koloa kia latou fuli e kalaga kiate ia.

¹³ Talie ko leia e kalaga loa ki le suafa o le Aliki e saofaki loa.

E tonu ke fakasa le Evaselio ki le malama nei katoa

¹⁴ E feaki loa ke lotou kalaga ki leia na leaise lotou tui ki ai ? Ti e feaki loa ke lotou tui ki leia na leikiaise lotou logo ki ai ? Ti e feaki loa ke lotou logo kiate ia, mo kapau e leaise tasi leia e akonaki ?

¹⁵ Ti e feaki loa ke maua ni tagata fai akonaki, mo kapau e leaise kakau latou ? Ofaipe lona tuu i le Tosi : E lotou fulumalilie ai Avae o latou ala e fakasa ia le tokamalie Olatou ala e fakasa ia ni logo malilie.

¹⁶ Kae na leaise fakalogo a tagata fuli ki le logo malie. Koia na pati ai Esaia : Aliki, Ko ai na tui ki lamatou akonaki ?

¹⁷ Koia e au ai le tui mei le nea leia e logo ki ai, ti ko le nea leia e logo ki ai, e au mei le folafola a Kilisito.

¹⁸ Kae e kau pati : Pe na leaise lotou logo ? E io ! Kua taka olatou leo i le malama nei katoa, Ti kua kaku alatou folafola ki potupotu o le malama nei.

¹⁹ Kae e kau pati : Pe na leaise iloa e Iselaele le nea lena ? Na fuafuaki pati Moisese : E kau fakaliliu loa koutou ke finenonofo ki le nea leia e leaise ko se puleaga ; E kau fakaliliu loa koutou ke itaita ki se puleaga sala atamai.

²⁰ Ti na toa Esaia, o fakasa : Kua maua au e latou ala na leaise afa ia au, Kua fakasa au kia latou ala na leaise vesili kiate au.

²¹ Kae na pati a ia ki Iselaele : Na kau folasi oku lima i le aso katoa ki se kakai patigataa Ti mo taugutu.