Loma 1 - Tosi Tapu

Manatu a Paulo ki kilisiteano i Loma

¹ Paulo, tagata fakasausau a Sesu-Kilisito, kua filifili ke apositolo, ti kua vaei kese ki le fakasa o le Evaselio a le Atua -

² Evaselio leia na fakapapau i mua e le Atua i lana kau polofeta i le Tosi tapu ;

³ Evaselio leia e masau ki lona Alo, leia na au mei le sakoga o Tavite, i le kanofi,

⁴ leia na fakasa fakamakeke ko le Alo o le Atua e le Laumalie Maokioki i lana toe tuuake mei le kau mate, Sesu-Kilisito, lotatou Aliki ;

⁵ Ko ia leia na motou tali mei ai le kalasia mo le gaoi fakaapositolo, ke aumai i lona suafa ki le fakalogo o le tui a puleaga pagani fuli,

⁶ ala na kotou kau foki i ai, koutou ala kua kalagai e Sesu-Kilisito -

⁷ kia latou fuli i Loma ko alofaaga o le Atua, ala kua kalagai ke maokioki ki le vokasio : Ke soli atu kia koutou le kalasia mo le tokamalie e le Atua, lotatou Tamana, ti mo le Aliki ko Sesu-Kilisito !

⁸ E kau fuafuaki fakafetai ki loku Atua ia Sesu-Kilisito o uiga mo koutou fuli, talie kua logologona lakoutou tui i le malama nei katoa.

⁹ Ko le Atua, leia e kau fakasausau ki ai i loku laumalie, o fakasa le Evaselio o lona Alo, e fakamaoki kiate au e kau manatui tuumau koutou i aku faikole ;

¹⁰ e kau kole ke maua, mo kapau ko le finegalo o le Atua, se faigamalie ke kau natu ai kia koutou.

¹¹ Talie e kau oli mamae ai ke kau tio kia koutou, o tupu ke kau tuku atu kia koutou ni nea alofa fakalaumalie ke kotou loto makeke ai,

¹² ti ke fakapelepelei ai tatou fakatasi i loto malie o koutou i le tui leia e tou fakatasi ai, koutou mo au.

¹³ Fetaina, e kau loto ke kotou iloa kua tua lasi ai laku fakatuutuu ke kau natu kia koutou, o tupu ke kau maua ni fua ia koutou ofaipe i la ake puleaga ; kae na tau taofi au o kaku mai ki le aso nei.

¹⁴ E kau maua ki le kau Keleka mo le kau pagani, ki le kau poto mo le kau vale.

¹⁵ Koia e tupu ai loku oli mamae ke fakasa atu le Evaselio kia koutou foki ala e nonofo i Loma.

Faitotonu i le tui

¹⁶ Talie e leaise kau luma ai ki le Evaselio : Ko le makeke a ia mei le Atua ke fakamauli ai leia e tui, o uluaki le Sutea, ti mo le Keleka foki,

¹⁷ talie i le Evaselio e fakasa ai le faitotonu o le Atua i le tui ti ki le tui, o mulimuli ki le nea leia e tuu i le Tosi : E mauli loa le tagata agatonu i le tui.

Asaga o le kau pagani

¹⁸ E fakasa mei le lagi le sausau o le Atua ki agasala fuli mo veli fuli a tagata ala e taofi ia le gaoi a le maoki,

¹⁹ talie kua sa malie kia latou a nea ala e feala ke iloa i le Atua, talie kua fakasa e le Atua kia latou.

²⁰ Koia, kua lotou tio mata ai ki malilie fakapulipuli o le Atua, mo lona mafimafi, mo lona natula fakaatua, talu mei le kamataaga o le malama nei, mo kapau e lotou tio ki ana gaoi. Koia e leaise lotou maua ai se solaaga.

²¹ Talie kua lotou iloa le Atua, kae na leaise lotou fakakololia kiate ia ko le Atua, ti na leaise lotou fakafetai kiate ia ; kae na lotou sese i ni fakakaukau vaiga, ti kua apele olatou atamai valelea i le fakapouli.

²² I lalatou pati e lotou poto, kua lotou liliu o valea ;

²³ ti kua lotou fetogi le kololia o le Atua ki ni paaki o ni tagata agasala, mo ni manu lele, mo ni manu vae fa, ti mo ni manu totolo.

²⁴ Koia kua tuku ai latou e le Atua ki le mauli fakalialia o mulimuli ki manumanu o olatou loto ; koia kua lotou fakamatagafua ai e latou totonu olatou tino ;

²⁵ latou ala kua fetogi ia le maoki o le Atua ki le loi, ti kua atolasio mo tausi ki le nea leia na fakatupu e le Atua, kae tuku le Tupuaga leia e tonu ke lotou fakakololia ki ai o lee gato. Amene !

²⁶ Koia kua tuku ai latou e le Atua ki ni oli veli fakalumaluma : talie kua fetogi e olatou fafine totonu a felavei fakanatula ki ni felavei ala e fakafesagai ki le natula ;

²⁷ ti toe tatau mo tagata, kua lotou tiaki le fakaaoga masani o le fafine, kae kua lotou vela i le feoliveliaki ia latou, o lotou fai, e tagata mo tagata, ni nea fakalumaluma, ti kua lotou tali i ai, e latou totonu, le totogi leia e feauga mo lolatou sese.

²⁸ O tupu na leaise lotou loto ke iloa le Atua, kua tuku latou e le Atua ki olatou loto fakapouli ke lotou fai ni nea ala e leaise gali mo latou.

²⁹ Kua lotou apele i nea veveli fuli, mo fai feauaki, mo agaveli, mo manumanu ; ti kua lotou tukumanava fai ki le loto veli, mo le tukipo, mo le fefele, mo le kaka, mo le fatituu ;

³⁰ Ko latou ko nea gutu mumusu, mo fatufatu, mo vesia ki le Atua, mo fakamakeke, mo fia sa, mo viki tonu, mo fakatupu veli, mo patigataa ki matua, mo sala atamai,

³¹ mo sala poto, mo sala taofi fakapapau, mo sala alofa fakatagata, ti mo sala manavaalofa.

³² Ti e logo ai e lotou iloa le fakamaau faitotonu a le Atua, leia kua fakasa ia e tonu ke mate latou ala e fai ia a nea ana, e leaise gato fua e lotou fai latou, kae e lotou toe fakamaoki foki kia latou ala e fai ia a nea ana.