Levitiko 8 - Tosi Tapu

Fakatapu o Alone mo ona vosa

¹ Na masau loa le Eteleno kia Moisese, o pati :

² Ave Alone mo ona vosa ki le uluaga o le falela tapu ; ti toe ave foki ki ai a kofu tapu, mo le lolo tapu, mo le pipi tagata ki le agasala, mo ovi tagata e lua, ti mo le kete leia e tanaki ai a pane sala fakatupu ;

³ Ti toe fakatasi ake foki ki le ganea lena le kakai katoa o Iselaele.

⁴ Na fai loa e Moisese le nea leia na fakatotonu ake e le Eteleno kiate ia, ti na fakatasi ake loa le kakai o Iselaele ki le matapa o le falela tapu.

⁵ Na pati loa Moisese ki le kakai : ko leinei le nea leia na fakatotonu e le Eteleno ke fai.

⁶ Ti na too loa e Moisese a Alone mo ona vosa, o fakamea latou ki se vai.

⁷ Ti na fakatui loa e ia kia Alone le kofu loto tea, ti na nonoa loa e ia a ia ki le kie nonoa, ti na tui loa e ia le kofu usi mo le efote i aluga, ti na nonoa loa e ia i le tua a va o le efoti.

⁸ Ti na teki loa e ia kiate ia le peketolale, ti na tuku loa e ia ki le peketolale le ulimi mo le tumini.

⁹ Ti na teki loa e ia le tiale ki lona fa ulu, ti na fakapipiki loa e ia ki ai le fakamailoga tapu, le pala aulo, ki mua o le tiale, o mulimuli ki le fakatotonu a le Eteleno.

¹⁰ Ti na too loa e Moisese le lolo tapu, ti na pani loa e ia le aletale mo ona nea gaoi fuli ala na tuku i ai, ke fakatapui ai latou.

¹¹ Ti na afusi loa e ia o tua fitu le lolo ki le aletale, mo ona nea gaoi fuli, mo le tanoa fakamea mo lona tuuaga, ke fakatapui ai latou.

¹² Ti na liligi loa e ia le lolo tapu ki le fa ulu o Alone, ke fakatapui ai a ia.

¹³ Ti na too loa e Moisese a vosa o Alone, ti na fakatui loa e ia kia latou a kofu tea, ti na nonoa loa e ia kia latou a kie nonoa, ti na fakapipiki loa e ia kia latou a tiale, o mulimuli ki le fakatotonu a le Eteleno.

¹⁴ Ti na avake loa e ia le pipi tagata ki le agasala ; ti na teki loa e Alone mo ona vosa olatou lima ki le fa ulu o le pipi tagata ki le agasala.

¹⁵ Ti na tamate loa e Moisese le pipi tagata, ti na too loa e ia le toto, o pooi ki ai a tala o le aletale ki lona maikao, ke fakamea ai a ia ; ti na liligi loa e ia le toe o le toto ki le vae o le aletale. Ko lena le nea leia na fai loa e ia ke fakatapui ai le aletale, o tupu ke feala ai lona fakaaoga ki le fai o sakilifisio fakamolemole o agasala.

¹⁶ Ti na too loa e ia le gako katoa leia na kofu ia tootooga o le manu, mo le laui ate maokioki lasi, mo ifiifi e lua, mo le gako leia na pipiki i ai, ti na tutu loa e ia a nea fuli ana i aluga o le aletale.

¹⁷ Na tutu loa e ia le toe o le manu, mo lona kili, mo lona tino, ti mo ona faikauga, i le afi i fafo o le nofolaga, o mulimuli ki le fakatotonu leia na tuku e le Eteleno kia Moisese.

¹⁸ Ti na avake loa e ia le ovi tagata o le failaulau. Ti na teki loa e Alone mo ona vosa olatou lima ki le fa ulu o le ovi tagata.

¹⁹ Ti na tamate loa e Moisese le ovi tagata, ti na liligi loa e ia lona toto i le takatakai katoa o le aletale.

²⁰ Ti na tuutuu fakainati loa e ia le ovi tagata, ti na tutu fakatasi loa e Moisese a inati o le ovi mo lona fa ulu mo le gako.

²¹ Ti na fakamea loa e ia ki le vai a vava mo vae, ti na tutu loa e ia a nea fuli o le akeno tagata i aluga o le aletale. Ko se failaulau lena, ko se sakilifisio tutu katoa a ia, ti ko se nea manogi malie a ia ki le Eteleno, o mulimuli ki le fakatotonu leia na tuku e le Eteleno kia Moisese.

Le afusi o le toto

²² Ti na avake loa e ia le lua o ovi tagata, le ovi o le fakanofo, ti na teki loa e Alone mo ona vosa olatou lima ki le fa ulu o le ovi tagata.

²³ Ti na tamate loa e Moisese le ovi tagata, ti na too loa e ia le toto, o pooi ki ai le taliga atamai o Alone, mo le maikao matua o le lima atamai, mo le maikao matua o le vae atamai.

²⁴ Ti na fakafeofi ake loa kiate ia a vosa o Alone, ti na pooi loa e Moisese ki le toto a taliga atamai, mo maikao matua o lima atamai, mo maikao matua o vae atamai, ti na liligi loa e Moisese le toe o le toto i le takatakai katoa o le aletale.

²⁵ Ti na too loa e ia le gako, mo le siku, mo le gako fuli leia na kofu ia a tootooga, ti mo le laui ate maokioki lasi, mo ifiifi e lua, o fakatasi mo le gako leia na pipiki i ai, ti mo le alaga mua atamai.

²⁶ Ti na too loa e ia le kete pane sala fakatupu, leia na tuku i mua o le Eteleno, mo se fa keke sala fakatupu, mo se fa keke loloi, mo se fa pane maninifi, ti na teki loa e ia a nea ana ki aluga o le gako mo le alaga mua atamai.

²⁷ Ti na teki loa e ia a nea fuli ana ki lima o Alone mo ona vosa, ti na pati loa a ia kia latou ke lotou liliaki a nea ana i mua o le Eteleno.

²⁸ Ti na too loa e Moisese a nea ana mei olatou lima, o tutu loa e ia latou i aluga o le aletale, i aluga o le failaulau : ko le sakilifisio a ia o le fakanofo, ko se sakilifisio tutu a ia, ti ko se nea manogi malie a ia ki le Eteleno.

²⁹ Na too loa e Moisese le vakavaka o le ovi tagata o le fakanofo, ti na liliaki loa e ia a ia i mua o le Eteleno : ko le vaega loa a ia o Moisese, o mulimuli ki le fakatotonu a le Eteleno kia Moisese.

³⁰ Ti na too loa e Moisese le lolo o le fakatapu mo le toto leia na teki i aluga o le aletale, ti na fai loa e ia ki ai le afusi o Alone mo ona kofu tapu, ti mo vosa o Alone mo olatou kofu tapu.

³¹ Ti na pati loa Moisese kia Alone mo ona vosa : kotou fakamoso le kanomate o le lua ovi tagata i le uluaga o le falela tapu, talie ko lena le ganea leia e tonu loa ke kotou kai ai a ia, mo le pane leia na tuku i le kete leia na teuteui ki le fakanofo, o mulimuli ki le nea leia na kau fakatotonu atu kia koutou, o pati : e kai loa a ia e Alone mo ona vosa.

³² Ti kotou tutu loa i le afi le nea leia e toe loa i le inati mo le pane.

³³ I aso e fitu e leaise kotou mavae loa mei le uluaga o le falela tapu, o kaku ki le oki o aso o lokoutou fakanofo ; talie e fai loa lokoutou fakanofo i aso e fitu.

³⁴ Ko le Eteleno totonu leia na fakatotonu ia ke fai feneeki le tootooga leinei i aso anei, o tupu ke fakamolemole ai akoutou agasala.

³⁵ Ti e tonu ke kotou nonofo loa i le uluaga o le falela tapu i le aso mo le pouli, i le vasaa katoa leinei, o fai le gaoi leia kua tuku atu e le Eteleno kia koutou, ti e leaise kotou mamate ai loa. Ko le nea lena na fakatotonu mai e le Eteleno kiate au.

³⁶ Na fai loa e Alone mo ona vosa a nea fuli ala na fakatotonu e le Eteleno kia latou ia Moisese.