Levitiko 7 - Tosi Tapu

Lao o le sakilifisio o le fakamolemole

¹ Ko lao ki sakilifisio o le faisala : Ko se moliga maokioki lasi a ia.

² E tamate loa le vikitima ki le sakilifisio o le faisala i le ganea leia e tamate ai a failaulau. Ti e liligi loa le toto o le vikitima i le takatakai o le aletale.

³ Ti e momoli loa lona gako katoa, mo le siku, mo le gako leia e kofu ia a tootooga,

⁴ mo ifiifi e lua, mo le gako leia e kofu ia laua, mo le gako leia e pipiki i vakavaka, ti mo le magai ate maokioki lasi leia e tatala loa o ofi ki ifiifi.

⁵ E tutu loa e le tagata faisakilifisio a nea ana i aluga o le aletale ofaipe se sakilifisio tutu i mua o le Eteleno. Ko se sakilifisio a ia ki le agasala.

⁶ E kai loa ki ai a tagata fuli i le kau faisakilifisio ; kae tonu ke kai loa a ia i se ganea tapu ; talie ko se nea maokioki lasi a ia.

⁷ E tatau le sakilifisio ki le faisala mo le sakilifisio ki le agasala : ko le lao e tasi kia laua : e tuku loa le vikitima ki le tagata faisakilifisio leia e momoli ia le sakilifisio o le fakamolemole.

⁸ Ko le tagata faisakilifisio leia e momoli ia se failaulau a se tagata, e maua ia loa le kili o le vikitima leia na momoli e ia.

⁹ Ko moliga nea kai fuli ala na fakamoso i le gutuumu, mo le fakapaku, mo le laui ukamea, e maua loa e le tagata faisakilifisio leia na momoli ia le sakilifisio.

¹⁰ Kae vae fakatatau loa a moliga nea kai fuli ala na leaise fakamoso i vosa o Alone, tatau fai a moliga ala kua fakatasi mo le lolo ti mo la e malo.

Lao o le sakilifisio fakafetai

¹¹ Ko leinei le lao ki le sakilifisio fakafetai leia e tonu ke momoli ki le Eteleno.

¹² Kapau e momoli e se tagata se sakilifisio fakafetai mo se katiko fakafetai, e ave fakatasi loa e ia mo le sakilifisio fakafetai, ni keke sala fakatupu ala na lusi mo le lolo, mo ni pane maninifi ala na pani ki le lolo, ti mo ni keke ala na fai ki le falina tea ti na lusi ki le lolo.

¹³ E toe ave loa e ia se moliga ko ni pane fakatupu, o fakatasi mo le moliga fakafetai.

¹⁴ E too loa e ia i moliga ana se nea e tasi i nea fuli ana ki le Eteleno ; kae maua loa le toe e le tagata faisakilifisio leia na liligi ia le toto o le vikitima o le komunio.

¹⁵ E kai loa le kanofi o le sakilifisio fakafetai i le aso leia na momoli ai a ia, e leaise tuku loa se nea ke kaku ki le usu.

¹⁶ Ti kapau e fai e se tasi se sakilifisio fakafetai ki le soko o se fakaamu pe i lona loto malie, e kai loa le vikitima i le aso leia e momoli ai loa e ia a ia, ti e kai loa le nea leia e toe loa i leia ake aso.

¹⁷ Kae tutu loa i le afi le nea leia e toe loa i le tino o le sakilifisio i le tolu o aso.

¹⁸ Kae kapau e soko loa kua kai e se tagata le kanofi o lana sakilifisio komunio i le tolu o aso, e leaise tali loa e le Eteleno le sakilifisio ; e ano noa loa lana sakilifisio kiate ia, talie kua veli le inati ki nea fakalotu. Ko leia e kai loa ki le nea lena e agasala loa.

¹⁹ Ti kapau na lave loa le kanoi manu lena ki se nea kelekele, e leaise kai loa a ia, kae ti loa a ia ki le afi. E tonu ke mea le tagata leia e kai loa ki le tino o le sakilifisio.

²⁰ Ti kapau e kai loa se tagata kelekele ki le sakilifisio komunio leia na momoli ki le Eteleno, e motusi loa le tagata lena mei lona kakai.

²¹ Ti e tatau foki ki le tagata leia e lave loa ki se tasi leia e kelekele, pe ko se manu leia e kelekele, pe ko se nea leia e kelekele : e motusi loa a ia mei lona kakai.

²² Na masau loa le Eteleno kia Moisese, o pati :

²³ Masau ki le kakai o Iselaele, o ke pati kia latou : Aua na kotou kai loa le gako o le pipi, mo le ovi, mo le koti.

²⁴ E feala ke fakaaoga le gako o se manu leia na mate masaki, pe na tamate e se tasi ake a manu, ki ni iki ake a nea, kae e leaise kotou kai loa a ia.

²⁵ Talie ko le tagata leia e kai ia loa le kanomate o manu ala na momoli ki le Eteleno i ni sakilifisio tutu, e tuuti loa mei lona kakai.

²⁶ E leaise kotou kai loa se toto, mo ni manu lele, mo ni manu lalasi, i ganea fuli ala e kotou nonofo ai loa.

²⁷ Ko leia e kai ia loa se toto o se nea mauli, e tuuti loa a ia mei lona kakai.

²⁸ Na masau loa le Eteleno kia Moisese, o pati :

²⁹ Masau ki fanau a Iselaele, o ke pati kia latou : Ko leia e momoli ia loa se sakilifisio komunio, e ave loa e ia lana moliga ki le Eteleno.

³⁰ E too loa e ia i ona lima totonu le nea leia e tonu ke tutu e le afi i mua o le Eteleno ; e ave loa e ia le gako mo le vakavakapu, ti e liliaki loa e ia le vakavakapu i mua o le Eteleno.

³¹ E tutu loa e le tagata faisakilifisio le gako i aluga o le aletale, kae tuku loa e ia le vakavakapu kia Alone mo ona vosa.

³² I akoutou sakilifisio komunio fuli, e kotou too loa le alaga mua atamai o le manu, o soli a ia ki le tagata faisakilifisio.

³³ Talie ko le alaga mua atamai ko le vaega a ia leia e tonu ke soli ki le vosa o Alone leia e momoli ia le toto mo le gako o le sakilifisio komunio.

³⁴ Ko le Eteleno totonu leia e tuku ia le fakatotonu leinei kia koutou ko fanau a Iselaele, ke kotou vaei kese le vakavakapu mo le alaga mua atamai o sakilifisio komunio fuli ala na liliaki i mua o le Eteleno, o kotou soli loa laua ki le tagata faisakilifisio ko Alone ti mo ona vosa. E soli loa a inati ana kia latou o lee gato.

³⁵ Ko le vaega lena o le fakanofo o Alone, mo le fakanofo o ona vosa, i failaulau tutu ki le Eteleno.

³⁶ Ko le nea lena na fakatotonu e le Eteleno ki fanau a Iselaele ke lotou soli kia latou i le aso leia e fakanofo ai latou. Ko le fakatotonu lena e tonu ke taupau tuumau.

³⁷ Ko le lao lena ki sakilifisio tutu, mo sakilifisio nea kai, mo sakilifisio fakamolemole, mo sakilifisio fakamalie, mo sakilifisio o le fakanofo, ti mo sakilifisio o le komunio.

³⁸ Na tuku latou e le Eteleno kia Moisese i le mauga o Sinai, i le toafa, i le aso leia na fakatotonu ai e ia ki fanau a Iselaele ke lotou momoli ni sakilifisio kiate ia.