Levitiko 4 - Tosi Tapu

Sakilifisio o le totogi o agasala

¹ Na folafola loa le Eteleno kia Moisese, o pati :

² Masau ki vosa o Iselaele, o ke pati : Kapau e agasala loa se tagata kae na leaise loto a ia ki ai, o fai e ia se nea leia na tapui e se lao e tasi o lao a le Eteleno, e tonu loa ke fai fakafeneeki :

³ Kapau na agasala le tagata faisakilifisio leia kua pani ki le lolo tapu, ti kua agasala loa i ai le kakai, e tonu loa ke momoli e ia ki le Eteleno, o uiga mo lana agasala, se pipi tagata lee mele.

⁴ E ave loa e ia le pipi tagata ki le matapa o le falela tapu, ki mua o le Eteleno ; ti e teki loa e ia lona lima ki le fa ulu o le pipi tagata ; ti e tamate loa e ia le pipi i mua o le Eteleno.

⁵ E too loa e le tagata faisakilifisio leia kua pani ki le lolo tapu se koga o le toto o le pipi tagata, o ave ki le falela tapu ;

⁶ E tooi loa e ia lona maikao ki le toto, ti e afusi loa e ia a ia o tua fitu ki le fetuu o le lito tapu leia e sa mai ki tafa, i mua o le Eteleno.

⁷ E pani loa e le tagata faisakilifisio ki le toto a tala o le aletale o kaloni fakamanogi, leia e tuu i mua o le Eteleno i le falela tapu ; ti e liligi loa e ia le toto katoa o le pipi tagata ki le vae o le aletale o failaulau leia e tuu i le matapa o le falela tapu.

⁸ E tatala loa e ia le gako katoa o le pipi tagata leia na momoli ki le agasala, le gako leia e kofu ia a tootooga, mo le gako leia e piki i aluga o tootooga,

⁹ mo ifiifi e lua, mo le gako leia e kofu ia laua, mo le gako leia e piki i vakavaka, ti mo le magai ate maokioki lasi leia e tatala loa e ia o ofi ki ifiifi.

¹⁰ E tatala loa e le tagata faisakilifisio a koga fuli ana ofaipe lana tatala ia ala o le sakilifisio fakafetai ; e tutu loa latou e le tagata faisakilifisio i le aletale o failaulau.

¹¹ Kae ko le kili o le pipi tagata, mo lona tino katoa, mo lona fa ulu, mo ona vae, mo ona vava, mo ona faikauga,

¹² Ti mo le pipi tagata katoa, e ave loa e ia ki fafo o le nofolaga ki se ganea mea leia e laku ki ai a mugalafu, ti e tutu loa e ia le pipi tagata i le afi i aluga o ni fafie. Talie e tonu ke tutu a ia i aluga o le tuuga mugalafu.

¹³ Ti kapau na agasala fakafuanoa le fakatasi katoa o Iselaele o fai e ia se nea leia na tapui e se lao e tasi a le Eteleno, e agasala loa i ai le kakai katoa o Iselaele, logo ai na leaise iloa e ia.

¹⁴ I le temi fai leia e iloa ai le sala leia na lotou fai, e momoli loa e le fakatasiga se pipi tagata muli ko se sakilifisio ki le agasala, ti e lotou ave loa a ia ki mua o le falela tapu.

¹⁵ E teki loa e le kau fakamatuatua o le kakai o Iselaele olatou lima ki le fa ulu o le pipi tagata i mua o le Eteleno, ti e tamate loa le pipi tagata i mua o le Eteleno.

¹⁶ E ave loa e le tagata faisakilifisio, leia kua pani ki le lolo tapu, se koga o le toto o le pipi tagata ki le falela tapu.

¹⁷ E tooi loa e le tagata faisakilifisio lona maikao ki le toto, ti e afusi loa e ia le toto o tua fitu ki le fetuu o le lito tapu leia e sa mai ki tafa, i mua o le Eteleno.

¹⁸ Ti e pooi loa e ia ki le toto a tala o le aletale leia e tuu i mua o le Eteleno i loto o le falela tapu ; ti e liligi loa e ia le toto fuli ki le vae o le aletale o failaulau, leia e tuu i le uluaga o le falela tapu.

¹⁹ Ti e tatala loa e ia le gako katoa o le pipi tagata o tutu i aluga o le aletale.

²⁰ Ti e fai loa e ia ki le pipi tagata lena ofaipe lana fai ki le pipi tagata leia na momoli e ia ki lana agasala totonu. Ko lena le nea leia e tonu ke fai e le tagata faisakilifisio ki le kakai o Iselaele ki le fakamolemole o lana agasala, ti e fakamolemole loa a ia kia latou e le Atua.

²¹ E ave loa e le tagata faisakilifisio le pipi tagata ki fafo o le nofolaga, o tutu a ia i ai ofaipe lana tutu le uluaki pipi tagata. Ko le sakilifisio a ia ki le agasala o le kakai.

²² Ti kapau e agasala loa se tagata pule, o fai fakafuanoa loa e ia se nea leia na tapui e se lao a le Eteleno, ko lona Atua, ti e agasala loa a ia i le nea lena.

²³ Ka iloa loa e ia le sala leia na fai e ia, e momoli loa e ia se koti tagata lee mele.

²⁴ E teki loa e ia lona lima ki le fa ulu o le koti tagata, ti e tamate loa e ia le koti tagata i le ganea leia e tamate ai a failaulau i mua o le Eteleno. Ko se sakilifisio a ia ki le agasala.

²⁵ E tooi loa e le tagata faisakilifisio lona maikao ki le toto o le vikitima leia na momoli ki le agasala, ti e pooi loa e ia ki le toto a tala o le aletale o failaulau, ti e liligi loa e ia le toto katoa ki le vae o le aletale o failaulau.

²⁶ Ti e tutu loa e ia le gako katoa i aluga o le aletale, ofaipe le sakilifisio fakafetai. Ko lena loa le nea leia e tonu ke fai e le tagata faisakilifisio ki le tagata pule ke fakamolemole ai lana agasala, ti e fakamolemole loa a ia e le Eteleno.

²⁷ Ti kapau ko se tagata o le kakai leia na agasala fakafuanoa, o fai e ia se nea leia na tapui e se lao a le Eteleno, o tupu ai loa lana agasala.

²⁸ Kapau e iloa loa e ia le agasala leia na fai e ia, e tonu loa ke momoli e ia se koti fafine lee mele, ki le agasala leia na fai e ia.

²⁹ E teki loa e ia lona lima ki le fa ulu o le vikitima leia e momoli ki lana agasala ; ti e tamate loa e ia le vikitima ki le agasala i le ganea leia e tamate ai a failaulau.

³⁰ E tooi loa e le tagata faisakilifisio lona maikao ki le toto o le vikitima, ti e pooi loa e ia ki le toto a tala o le aletale o failaulau, ti e liligi loa e ia le toto katoa ki le vae o le aletale.

³¹ E tatala loa e ia le gako fuli, ofaipe lana tatala le gako o le sakilifisio fakafetai, ti e tutu loa e ia le gako lena i aluga o le aletale, ti ko se nea a ia e manogi malie loa ki le Eteleno. Ko lena le nea leia e tonu ke fai e le tagata faisakilifisio o uiga mo le fakamolemole o le agasala a le tagata lena, ti e fakamolemole loa a ia kiate ia e le Eteleno.

³² Ti kapau e momoli e ia ki le Eteleno se ovi fafine ki le fakamolemole o lana agasala, e tonu ke ave loa e ia se ovi fafine lee mele.

³³ E teki loa e ia lona lima ki le fa ulu o le vikitima leia e momoli ki le agasala, ti e tamate loa e ia le vikitima o le sakilifisio ki le agasala i le ganea leia e tamate ai a failaulau.

³⁴ Ti e tooi loa e le tagata faisakilifisio lona maikao ki le toto o le vikitima ki le agasala, ti e pooi loa e ia ki le toto a tala o le aletale o failaulau, ti e liligi loa e ia le toto fuli ki le vae o le aletale.

³⁵ Ti e tatala loa e ia le gako fuli, ofaipe le tatala o le gako o le akeno i le sakilifisio fakafetai, ti e tutu loa e ia a ia i aluga o le aletale, ofaipe se sakilifisio tutu i mua o le Eteleno. Ko lena le nea leia e tonu ke fai e le tagata faisakilifisio ki le tagata lena, o tupu ke fakamolemole ai lana agasala na fai, ti e fakamolemole loa a ia kiate ia e le Eteleno.