Levitiko 26 - Tosi Tapu

Ko tapuakina

¹ Aua na kotou fai loa ni taulaatua loi, aua na kotou fakatuu loa kia koutou ni fakatata togi, ti aua na kotou fakatuu loa i lokoutou fenua se fakatata fatu, ke kotou punou loa i ona mua ; talie ko au ko le Eteleno, ko lokoutou Atua.

² Kotou tausi loa aku sapato, ti kotou fakaapaapa loa ki loku sagatualio. Ko au ko le Eteleno.

³ Kapau e kotou mulimuli loa ki aku lao, ti kapau e kotou tausi loa aku folafola ti mo fai loa latou,

⁴ E kau kakau mai loa kia koutou ni ua i olatou temi, ti e soli loa e le kele ona magiti, ti e soli loa e laakau fua o faisaga olatou fua.

⁵ E leikiaise oki loa lakoutou sasa ia le fulumeto kae kua kotou tau loa le vite, ti e kaku loa le tatao o le vino ki le muluki o fakaili. E kotou kai loa lakoutou pane o makona ti e kotou nofo loa i lokoutou fenua i le fimalie.

⁶ E kau tuku loa le tokamalie ki le fenua, ti e kotou momoe loa i le tokamalie, e leaise kotou tuania ia loa se tagata. E kau fakamamao loa mei le fenua a manu veveli, ti e leaise toe au loa le seleta ki lokoutou fenua.

⁷ E kotou kapu loa okoutou fili, ti e lotou mamate loa i le seleta i okoutou mua.

⁸ E kapu loa e se toka lima o koutou le tino lelau o le fili, ti e kapu loa e le tino lelau o koutou a tino afe e tino agafulu, ti e mamate loa okoutou fili i le seleta i okoutou mua.

⁹ E kau tokaga loa kia koutou o tapuakii koutou, mo fakafanaunau koutou, ti e kau taofi mau loa laku sai kia koutou.

¹⁰ E kotou kai loa a taukai afea ti e kotou too loa latou o tupu ke maua ni ganea ala ke tanaki ai a taukai foou.

¹¹ E kau fakatuu loa loku nofoaga i loto malie o koutou, ti e leaise vesia loa loku laumalie kia koutou.

¹² E kau saele loa i loto malie o koutou, ti e kau liliu loa ko lokoutou Atua, ti e kotou liliu loa ko loku kakai.

¹³ Ko au ko le Eteleno, ko lokoutou Atua, leia na fakamavae ia koutou mei le fenua o Esipito, o tupu ke aua na kotou toe liliu o popula kia latou. Na kau motusi a tini o Esipito ala na sai ia koutou, ti na kau fakasaele ia koutou i le fia tagata.

Ko malaia

¹⁴ Kae kapau e leaise kotou fakalogo loa kiate au, ti kapau e leaise kotou mulimuli loa ki aku folafola fuli,

¹⁵ Ti kapau e kotou tiaki loa aku fakatotonu, ti kapau e vesia loa okoutou laumalie ki aku fakatotonu, o leaise kotou mulimuli loa ki aku folafola fuli ti e kotou motusi loa laku sai,

¹⁶ ko leinei le nea leia e kau fai loa kia koutou : E kau tuku loa kia koutou le i, mo le mate, mo le taumasaki, ke lotou kai ia okoutou mata mo okoutou mauli. E kotou to loa akoutou faisaga, kae e leaise kotou maua loa se fua kia koutou, talie e too loa e okoutou fili a taukai.

¹⁷ E kau fakafesagai loa kia koutou, ti e kotou lava loa i okoutou fili ; ti e pule loa kia koutou latou ala e vesia kia koutou, ti e kotou sosola loa kae na leaise tuli koutou e se tasi.

¹⁸ Ti kapau e logo ai le nea lena, e leaise kotou fakalogo aifai kiate au, e kau toe liuga loa o tua fitu le tautea o lakoutou agasala.

¹⁹ E kau fatii loa lokoutou loto lasi : e kau fakaliliu loa le lagi i okoutou aluga ke fefeka ofaipe le ukamea, ti e leaise toe to loa se ua ki okoutou kele, ala e fefeka loa ofaipe le sila.

²⁰ E maumau noa loa okoutou makeke, kae e leai sona fua : e leaise soli loa e le kele ona magiti, ti e leaise soli loa e laakau olatou fua.

²¹ Ti kapau e kotou fakatutuu aifai kiate au, ti kapau e leaise kotou fia fakalogo aifai kiate au, e kau toe liuga loa kia koutou o tua fitu le tautea o lakoutou agasala.

²² E kau kakau mai loa kia koutou a manu fekai o le vao, ti e lotou tamate loa okoutou fanau, ti e lotou kai loa akoutou kau manu, ti e lotou fakateiki loa koutou, ti e lavaki loa okoutou ala.

²³ Ti kapau e leaise feauga le nea lena ki lokoutou fakatonutonu, ti kapau e kotou soko atu aifai lakoutou fakatutuu kiate au,

²⁴ e kau toe soko atu loa laku fakatutuu kia koutou, ti e kau toe liuga loa kia koutou o tua fitu le tautea o lakoutou agasala.

²⁵ E kau lagai loa se tau ki lokoutou fenua, ke tautea ai koutou, o tupu ko lakoutou motusi ia laku sai ; e kotou sosola loa ki kolo, kae e kau fakasoko loa se taumasaki veli ke kotou vilo ai ki lima o okoutou fili.

²⁶ E kau fakamativa loa koutou i le pane ; ko fafine e kau agafulu e tao ia loa lakoutou pane i se gutuumu e tasi, ti e lotou aumai loa kia koutou se ga nea noa fua ke kotou kai, kae e leaise lelu ai lokoutou fia kai.

²⁷ Ti kapau i le nea lena, e leaise kotou fakalogo aifai kiate au, kae e kotou soko atu aifai lakoutou fakatutuu mai kiate au :

²⁸ e kau toe soko atu aifai laku fakatutuu makeke kia koutou, ti e kau toe liuga loa kia koutou o tua fitu le tautea o lakoutou agasala.

²⁹ E kotou kai loa a tino okoutou vosa, ti e kotou kai loa a tino okoutou taineliki.

³⁰ E kau maumaui loa okoutou ganea tapu, e kau maumaui loa okoutou aletale tutu kaloni, e kau tanaki loa okoutou mate i aluga o okoutou taulaatua.

³¹ E kau fakaliliu loa okoutou kolo o toafa, ti e kau maumaui loa okoutou fale tapu, o tupu ke aua na kau toe sauga ki le manogi malie o okoutou kaloni.

³² E kau maumaui loa le fenua, e au totonu ; ti e punamauli loa okoutou fili ala e nonofo loa i ai.

³³ E kau lagai loa se tau kia koutou ti e kau fakamavetevete loa koutou i atu puleaga : e maumaui loa lokoutou fenua, ti e lavaki loa okoutou kolo.

³⁴ Ti e maua loa e le fenua ona sapato, i le temi katoa lena e kotou mavetevete ai i atu puleaga kesekese ala e ave loa koutou ki ai e okoutou fili ; ti e malolo loa le fenua, mo fakafiafia ki ona sapato.

³⁵ I le temi katoa leia e maumaui ai loa a ia, e maua loa e ia le malolo leia na leaise maua e ia i okoutou sapato, i le temi leia na kotou nofoi ai a ia.

³⁶ E kau fakagaegae ia loa a loto o latou ala o koutou e mauli loa i fenua o olatou fili ; e lotou sosola loa i le ga pakaka fua o se lau laakau i le matagi ; e lotou fesolaki loa ofaipe le fesolaki i mua o le fili i le tau, ti e lotou sisiga loa ki le kele kae e leaise tuli latou e se tasi.

³⁷ E lotou sisiga loa o fetaotaomiaki ofaipe le sosola i mua o le seleta, kae e leaise tuli latou e se tasi. E leaise lotou tutuu loa i mua o le fili.

³⁸ E kotou mamate loa i atu puleaga, o kai loa koutou e le fenua o okoutou fili.

³⁹ Ti ko latou ala e sao loa i le mate i fenua ana, e tautea loa ki le gaegae o tupu ko alatou agasala ti mo agasala o olotou tupuna.

⁴⁰ Kae kapau e kofesio loa e latou ana na toe alatou agasala ti mo agasala o alatou tamana, ti mo agatuu ala na lotou fai kiate au ti mo le fakatutuu leia na lotou fai mai kiate au,

⁴¹ e lotou matala loa i ai na kau fakatutuu kia latou ti na kau ave ia loa latou o fakapopulai i fenua o latou fili. E lotou fakasemala loa ki alatou agatuu ti e lotou tali loa le tautea o alatou agasala.

⁴² E kau toe manatui loa laku fakapapau kia Sakopo, mo Isaake, mo Apalaamo, ti e kau toe manatui loa le fenua.

⁴³ I le temi leia e lotou puli ai loa i le fenua, e malolo loa le fenua. I le temi lena, e lotou totogi ai loa le tua o alatou agaveli, talie na lotou tiaki aku fakatotonu ti na vesia olatou laumalie ki aku lao.

⁴⁴ Kae, kapau e lotou nonofo loa i le fenua o olatou fili, e leaise kau tiaki oki loa latou, ti e leaise kau vesia oki loa kia latou o kaku ki laku fakapuli oki loa latou, o kaku ki laku tuuti oki loa laku sai kia latou ; talie ko au ko le Eteleno, ko lolatou Atua.

⁴⁵ E kau toe manatui loa loku alofa kia latou, ti mo laku sai i mua, leia na tupu ai laku fakamavae latou mei le fenua o Esipito, i mata o atu puleaga, o tupu ke kau liliu ko lolatou Atua. Ko au ko le Eteleno.

⁴⁶ Ko na lekula, mo fakatotonu, mo lao ala na tuku e le Eteleno ki fanau a Iselaele, i aluga o le mauga ko Sinai, ia Moisese.