Levitiko 25 - Tosi Tapu

Le fetuu o le Sapato

¹ Na masau loa le Eteleno kia Moisese i le mauga o Sinai, o pati :

² Masau ki vosa o Iselaele, ti ke pati loa kia latou : Ka kotou ulu loa ki le fenua leia e kau soli loa kia koutou, e malolo loa le kele : ko se sapato loa a ia ki le Eteleno.

³ I fetuu e ono e ke to loa lau faisaga, i fetuu e ono e ke koti loa lau vite ; ti e ke tau loa le fua.

⁴ Kae ko le fitu o fetuu ko se sapato loa a ia, ko se fetuu malolo ki le kele, ko se sapato ki le Eteleno : Aua na ke to loa lau faisaga ti mo ke koti loa lau vite.

⁵ Aua na ke tuuti ia loa le nea leia kua tupu mei fuai fulumeto ala na vivilo ki le kele o sosomo toka tasi, ti aua na ke tau loa a fui vite ala e leleu loa i le vite leia na leaise koti, talie ko se fetuu malolo katoa lena ki le kele.

⁶ Kae e kotou kai loa le nea leia e fakatupu loa e le kele i le lolotoga o lona sapato, e koe, mo lau tagata fakasausau, mo lau fafine fakasausau, mo lau tagata gaoi, mo le matapule leia e nofo mo koe,

⁷ mo lau kau manu, ti mo manu fuli ala e maua i lou fenua ; e kotou kai loa le fua katoa o le fenua.

Le fetuu o le supileo

⁸ E ke lau loa ni fetuu sapato e fitu, o liuga fitu a fetuu e fitu, ko lona katoa ko fetuu e kau fa tupu iva.

⁹ I le aso kau agafulu o le masina fitu, e ke fakatatagi loa le leo makeke o le fakatagi pupusi ; i le aso lasi o le fakamalie, e kotou pupusi loa le fakatagi pupusi i le fenua katoa.

¹⁰ Ti e kotou fakatapui loa le kau lima fetuu, ti e kotou fakasa loa le lauatea ki kakai fuli o le fenua : ko le supileo loa a ia kia koutou ; e toe liliu loa le tagata taki toka tasi ki lona kele mo lona famili.

¹¹ Ko le kau lima fetuu e liliu loa kia koutou ko le supileo : aua na kotou to loa akoutou faisaga, pe kotou tuuti loa le nea leia e fakatupu toka tasi loa e faisaga, ti aua na kotou tau loa a vite vaoa.

¹² Talie ko le supileo a ia : e kotou fakaapaapa loa ki lona tapu. Kae e kotou kai loa le fua o akoutou faisaga.

¹³ I le fetuu lena o le supileo, e toe liliu loa le tagata taki toka tasi o koutou ki lona kele.

¹⁴ Kapau e kotou totogi pe kotou fakatau se kele ki se tagata o lou kakai, ke aua na kakaai loa e se tasi o koutou lona taina.

¹⁵ E ke fakatau loa mei lou oloi, o lau a fetuu mei le supileo ; ti e totogi atu loa e ia kiate koe, o lau a fetuu o taukai ala koi toe ki le supileo foou.

¹⁶ Ka lasi loa a fetuu ala koi toe, ti e toe lasi loa le totogi ; ti ka ikiiki loa a fetuu, ti e toe ikiiki loa le totogi : talie e fakafuafua loa le totogi ki le lasi o taukai.

¹⁷ Ke aua na kakai loa e se tasi o koutou lona taina, kae e ke fakaapaapa loa ki lou Atua ; talie ko au ko le Eteleno, ko lokoutou Atua.

¹⁸ Kotou mulimuli ki aku lao, ti kotou tausi aku fakatotonu, ti kotou fai latou ; ti e kotou mauli loa i le fimalie i le fenua.

¹⁹ E soli atu loa e le fenua ona fua kia koutou, ti e kotou kai loa o makokona, ti e kotou nonofo loa i ai i le fimalie.

²⁰ Kapau e kotou pati : Kolea le nea leia e motou kai loa i le fitu o fetuu, talie ko leinei e leaise motou to loa amatou faisaga, ti e leaise motou tuuti loa le taukai o amatou faisaga ?

²¹ E kau tuku atu loa kia koutou laku tapuaki i le ono o fetuu, ti e soli loa e ia se taukai ki fetuu e tolu.

²² E kotou to loa akoutou faisaga i le valu o fetuu, ti e kotou kai loa le taukai afea o kaku ki le iva o fetuu ; talie e kotou maua loa ni tokonaki feauga o kaku ki le taukai o le iva o fetuu.

Le toe totogi o kele mo kau popula

²³ Aua na ke fakatau loa se kele o tukupau : talie ko le fenua a aku, talie e kotou nonofo i loku kaiga ofaipe ni matapule, mo ni iki ala e nonofo fakatemi.

²⁴ I le fenua katoa leia ka kotou maua ia loa, e kotou fakatuu loa ki le kele le lao o le toe totogi.

²⁵ Kapau e liliu loa o mativa lou taina ti e fakatau loa e ia se koga o lona kele, e au loa lona famili ofi o toe totogi le kele o lona taina.

²⁶ Ti kapau e leaise maua loa e se tagata se tasi o lona famili ke toe totogi ia lona kele, kae maua loa e ia le paaga ke toe totogi ai e ia totonu lona kele,

²⁷ e fakafuafua loa e ia le lasi o le totogi leia e tonu ke tuku ki leia na fakatau ia, o mulimuli ki le lasi o fetuu ala koi toe ki le Supileo, ti e tuku loa e ia le paaga lena, kae toe too loa e ia lona kele.

²⁸ Ti kapau e leaise maua e ia le paaga ke toe totogi ai, ti e nofo loa le kele mo le tagata leia na totogi ia a ia o kaku ki le fetuu o le supileo. I le temi lena e toe too loa e le tagata leia o ona le kele lona kele.

²⁹ Kapau e fakatau e se tagata se fale nofo i se kolo na takatakai ki se kaua fatu, e maua loa e ia le toe totogi o kaku ki le katoa o se fetuu e tasi mei le aso o le fakatau ; e fetuu tasi fai lona toe totogi.

³⁰ Ti kapau na leaise toe totogi le fale i le fetuu lena, e maua oki loa a ia e le tagata lena na totogi ia a ia ti mo ana fanau. E leaise toe liufaki loa a ia i le fetuu o le supileo.

³¹ Kae ko fale o kolo liliki ala e leaise a fatu e mulimuli loa ki le lao o kele o le fenua : e feala loa ke toe totogi latou, ti e mavae loa le tagata leia na totogi ia a ia i le fetuu o le supileo.

³² Kae ki kolo o le kau Levi ti mo fale ala e lotou maua loa, e lotou maua loa le toe totogi i temi fuli.

³³ Ko leia e totogi ia loa mei le kau Levi se fale, e mavae loa a ia i le supileo mei le fale leia na totogi e ia ti mo le kolo leia na tuu ai le fale. Talie ko fale ana ko le gatoaga a ia o nea ala e maua e le tagata Levi i le fenua o Iselaele.

³⁴ E leaise feala loa ke fakatau a faisaga ala e tuu i tafatafa o kolo o le kau Levi ; talie ko olatou tofiga ana o lee gato.

Le taina mativa

³⁵ Kapau e liliu loa lou taina o mativa, ti e gaegae loa lona lima i ou tafa, e ke tokoi loa kiate ia ; e ke fai fakatatau loa ki leia e matapule ti e nofo i le fenua, o tupu ke mauli a ia mo koe.

³⁶ Aua na ke too loa se totogi iate ia pe ko se tupu, e ke i loa ki lou Atua, ti e mauli loa lou taina mo koe.

³⁷ Aua na ke tuku lau paaga kiate ia mo se tupu, ti aua na ke tuku lau nea kai kiate ia mo se totogi.

³⁸ Ko au ko le Eteleno, ko lou Atua, leia na fakamavae ia koutou mei le fenua o Esipito, ke soli atu kia koutou le fenua o Kanaane, o tupu ke kau liliu ko lokoutou Atua.

³⁹ Kapau e liliu loa lou taina o mativa i ou tafa, ti e fakatau loa a ia totonu kiate koe, aua na ke fakagaoi loa a ia ke tatau mo se tagata popula.

⁴⁰ E nofo loa a ia i lou fale ofaipe se tagata gaoi totogi, ofaipe se tagata gaoi fakatemi ; e gaoi loa a ia kiate koe o kaku ki le fetuu o le supileo.

⁴¹ I le fetuu o le supileo, e mavae loa a ia mei lou fale, a ia mo ana fanau, ti e toe liliu loa a ia ki lona famili, i le kele o ona tamana.

⁴² Talie ko aku tagata fakasausau latou ala na kau fakamavae mei le fenua o Esipito ; Aua na ke fakatau loa latou ofaipe ni kau popula.

⁴³ Aua na ke pule fakamakeke loa kiate ia, kae ke ke i loa ki lou Atua.

⁴⁴ Ko puleaga ala e takatakai ia koutou e ke too loa mei ai lau tagata fakasausau mo lau fafine fakasausau ala e fakalogo loa kiate koe : ko puleaga ana ala e ke totogi loa mei ai le tagata fakasausau mo le fafine fakasausau.

⁴⁵ E feala foki ke kotou totogi latou i fanau o kakai matapule ala e nonofo loa i lokoutou fenua, ti mo olatou famili ala e lotou fakatupu loa i lokoutou fenua ; ti e lotou fakalogo loa kia koutou.

⁴⁶ E kotou tuku tofiga loa latou ki okoutou fanau, ke lotou maua latou ma latou. E kotou taupau loa latou o lee gato. Kae ki okoutou fetaina, fanau a Iselaele, ke aua ai na pule fakamakeke loa se tasi o koutou ki lona taina.

⁴⁷ Kapau e mou koloa loa se matapule leia e nofo i lokoutou fenua, ti e liliu loa o mativa se tasi i ou fetaina, o totogi loa a ia totonu ki le tagata matapule pe ki se tasi o le famili o le matapule lena,

⁴⁸ e fai loa ki lokoutou taina le lao o le toe totogi : e feala loa ki se tasi o fetaina o le tagata lena ke toe totogi ia a ia.

⁴⁹ E feala loa ke toe totogi a ia e se taina o lona tamana, pe ko sona taina mataitama, pe ko se tasi o lona famili. E feala foki kiate ia totonu ke toe totogi e ia a ia mo kapau e maua loa e ia le totogi.

⁵⁰ E lau loa e ia mo lona pule mei le fetuu leia na totogi ai a ia o kaku ki le fetuu o le supileo ; ti e fuafua loa le totogi leia e tonu ke ui e le tagata lena ki le lasi o fetuu, ti e fuafua loa le totogi o le fetuu ki le totogi o aso gaoi o le tagata gaoi.

⁵¹ Kapau koi toe ni fetuu mauke, e ui loa e ia ki lona toe totogi se paaga o fakafuafua ki le totogi leia na totogi ai a ia e lona pule.

⁵² Kapau e toe ni fetuu teiki o kaku ki le supileo, e lau loa e ia a fetuu ana ti e ui loa e ia ki lona toe totogi se paaga o fakafuafua ki le totogi leia na totogi ai a ia e lona pule.

⁵³ E fai loa a ia pe se tagata gaoi totogi i le fetuu i le fale o lona pule, leia e leaise pule fakamakeke loa kiate ia i ou mata.

⁵⁴ Kapau e leaise toe totogi a ia e se nea i nea ana, e mavae loa a ia i le fetuu o le supileo, a ia mo ona fanau.

⁵⁵ Talie ko le kakai o Iselaele ko aku tagata fakasausau latou ; ko aku tagata fakasausau ala na kau fakamavae mei le fenua o Esipito. Ko au ko le Eteleno, ko lokoutou Atua.