Levitiko 24 - Tosi Tapu

Le lolo o le satelie (tuuaga malama)

¹ Na masau loa le Eteleno kia Moisese, o pati :

² Fakatotonu ki fanau a Iselaele ke aumai kiate koe le lolo olive mea leia na tuki ki le tuuaga malama, o tupu ke ula malie ai a malama i temi fuli.

³ E teuteui loa e Alone le tuuaga malama aulo i le falela tapu, i mua o le lito leia e tapono ia le aleka o le fakapapau, o tupu ke mu sosoko a malama mei le afiafi o kaku ki le usu i mua o le Eteleno. Ko se lao a ia ke tuku sosoko ki okoutou tautupu.

⁴ E fakatuutuu loa e Alone a malama i oku mua, i le tuuaga malama aulo, ke lotou ulaula sosoko i mua o le Eteleno.

Pane tapu

⁵ E ke too loa se falina mea, ti ke fai loa ki ai ni fa pane lalapa e kau agafulu tupu lua, o kilo ono le fa pane.

⁶ Ti e ke teki loa latou ki oku mua, i aluga o le laupapa aulo, i ni tuuga e lua ala e taki fa pane ono.

⁷ I aluga o le tuuga pane e ke teki loa se iseso mea, leia e tutu loa e le afi i mua o le Eteleno, o fetogi ia a pane, ofaipe se nea fakamanatu.

⁸ I sapato fuli, e fakafoou loa a pane ana i mua o le Eteleno. Ko se fakapapau a ia ke tuku sosolo ti e tonu ke taupau e fanau a Iselaele.

⁹ E maua loa a pane e Alone mo ona vosa, ti e lotou kai loa latou i se ganea tapu ; talie ko se nea maokioki a ia kia latou, ko se vaega a ia o moliga tutu i mua o le Eteleno. Ko se lao a ia ke tuku sosolo.

Tuaa o le lauveli ki le Atua

¹⁰ Ko le vosa o se fafine Iselaele mo se tagata Esipito, leia na au ki loto malie o fanau a Iselaele, na fefele loa i le nofolaga mo se tagata o Iselaele.

¹¹ Na lauveli loa le vosa o le fafine Iselaele, o takua noa ki le suafa o le Atua. Ti na ave loa a ia kia Moisese. Ko le igoa o lona tinana ko Selomite, le taine o Tipeli, mei le faasiga o Tane.

¹² Na tuku loa a ia ki le pilisoni, o kaku ki le fakasa e Moisese o le nea leia e fakatotonu loa e le Eteleno.

¹³ Na masau loa le Eteleno kia Moisese, o pati :

¹⁴ Fakamavae mei le nofolaga le tagata leia na lau veli. Ti ko latou fuli ala na logo kiate ia ke lotou teki loa olatou lima ki lona ulu, ti ke tuki fatui loa a ia e le kakai katoa.

¹⁵ E ke masau loa ki le kakai o Iselaele, o ke pati loa : ko leia e takua noa loa ki lona Atua e amo loa e ia lana agasala.

¹⁶ Ko leia e lauveli loa ki le suafa o le Eteleno e tautea loa a ia ki le mate : e tuki fatui loa a ia e le kakai katoa.

Tuaa o le tukipo mo agamakeke

¹⁷ Ko leia e tamate ia loa se tasi e tautea loa a ia ki le mate.

¹⁸ Ko leia e taai ia loa se manu o mate e fetogi loa e ia a ia : ko le mauli ki le mauli.

¹⁹ Kapau e lavea loa se tagata i se tasi, e toe liufaki loa kiate ia le lavea lena :

²⁰ Fati ki le fati, mata ki le mata, nifo ki le nifo ; e liufaki loa kiate ia le nea leia na fai e ia ki se tasi.

²¹ Ko leia e tamate ia loa se manu, e toe fetogi loa e ia a ia, kae ko leia e tamate ia loa se tagata, e tautea loa a ia ki le mate.

²² E kotou maua loa le lao e tasi ki le tagata matapule mo le tagata totonu o le fenua ; talie ko au ko le Eteleno, ko lokoutou Atua.

²³ Na masau loa Moisese ki fanau a Iselaele ; ti na lotou fakamavae loa le tagata leia na lauveli mei le nofolaga, ti na lotou tuki fatui loa a ia. Na mulimuli loa fanau a Iselaele ki le fakatotonu leia na tuku e le Eteleno kia Moisese.