Levitiko 23 - Tosi Tapu

Aso o le Eteleno ; le sapato

¹ Na masau loa le Eteleno kia Moisese, o pati :

² Masau ki fanau a Iselaele, o pati kia latou : Ko aso lalasi o le Eteleno, ala e tonu ke kotou fakasa loa, ko ni fakatasi tapu. Ko nei loa oku aso lalasi :

³ E gaoi loa i aso e ono ; kae ko le fitu o aso ko le sapato a ia, ko le aso malolo : e kotou fai loa i ai se fakatasi tapu. E leaise kotou fai loa se gaoi : ko le sapato a ia o le Eteleno, i okoutou fale fuli.

Pasikate : aso o pane sala fakatupu

⁴ Ko nei a aso lalasi o le Eteleno, ko fakatasi tapu, ala e kotou fakasa loa i lolatou temi.

⁵ I le uluaki masina, i le aso kau agafulu tupu fa o le masina, i le afiafi, ko le Pasikate loa a ia o le Eteleno.

⁶ Ti ko le aso kau agafulu tupu lima o le masina lena, ko le aso loa a ia o pane sala fakatupu ki le Eteleno. E kotou kai loa i aso e fitu ni pane sala fakatupu.

⁷ I le uluaki aso, e kotou fai loa se fakatasi tapu : aua na kotou fai loa se gaoi masani.

⁸ E kotou momoli loa ki le Eteleno, i aso e fitu, ni sakilifisio tutu e le afi. I le fitu o aso, e kotou fai loa se fakatasi tapu : aua na kotou fai loa se gaoi fua e tasi.

Aso o uluaki fua

⁹ Na masau loa le Eteleno kia Moisese, o pati :

¹⁰ Masau ki fanau a Iselaele, o pati kia latou : Ka kotou ulu loa ki le fenua leia e kau soli atu loa kia koutou, ti kotou fai loa le tuuti o le fulumeto, kotou ave loa ki le tagata faisakilifisio le uluaki fuiga fulumeto leia e kotou tuuti loa.

¹¹ E siki loa e le tagata faisakilifisio a ia i mua o le Eteleno i le apogipogi o le sapato, o tupu ke kotou maua lona kalasia.

¹² I le aso leia e kotou fakatapui ai loa le fuiga fulumeto, kotou momoli loa se failaulau ki le Eteleno, ko se akeno fetuu tasi mo lee mele.

¹³ Ti kotou ave loa a ia mo se moliga nea kai, ko ni kilo falina e ono ala kua lusi ki le lolo, ofaipe se moliga tutu e le afi, ko se nea manogi malie a ia ki le Eteleno ; ti e kotou fai loa se moliga vino, ko se liti e tasi mo se vaelua.

¹⁴ Aua na kotou kai loa se nea o le tau fulumeto lena, pe ko se pane, pe ko ni fui fulumeto tunu pe mata, i mua o le aso leia e kotou ave ai loa le fuiga fulumeto o momoli ki le Eteleno. Kotou tausi loa le fakatotonu lena, e koutou mo okoutou sakoga, i temi fuli, ti mo ganea fuli ala e kotou nonofo ai loa.

Penikosite

¹⁵ E kotou lau loa ni vasaa katoa e fitu mei le apogipogi o le sapato leia na kotou fakatapui ai le uluaki fuiga fulumeto.

¹⁶ Ko le temi lena ko aso e kau lima, e kaku loa ki le apogipogi o le fitu o sapato, i le aso a ia e kotou toe fai loa ki le Eteleno se moliga foou :

¹⁷ E kotou ave loa i okoutou fale ni fa pane e lua ke momoli ki le Eteleno ; e teuteui loa le fa pane e tasi ki ni kilo falina e tolu ti e tao loa a ia mo se fakatupu. Ko uluaki fua ana ki le Eteleno.

¹⁸ E kotou toe momoli loa ni failaulau ki le Eteleno, ke fakalasi ai le moliga pane : ko ni akeno e fitu ala e fetuu taki tasi mo lee mele, mo se pipi tagata muli, ti mo ni ovi tagata e lua ; ti kotou ave latou mo olatou moliga falina, mo moliga vino masani. Ko ni sakilifisio tutu latou e le afi, ko se nea manogi malie a ia ki le Eteleno.

¹⁹ E kotou momoli loa mo se koti tagata ki le sakilifisio fakamalie, ti mo ni akeno e lua ala e fetuu taki tasi mo lee mele ki le sakilifisio fakafetai.

²⁰ E fai loa e le tagata faisakilifisio le siki tapu o vikitima ana i mua o le Eteleno, mo le fa pane o uluaki fua, ti mo akeno e lua : e fakatapui loa latou ki le Eteleno, ti e maua loa latou e le tagata faisakilifisio.

²¹ I le aso fai lena, e kotou fakasa loa le aso lasi, ti e kotou fai loa se fakatasi tapu : aua na kotou fai loa se gaoi masani. Ko se lao tuku sosolo a ia ki okoutou tautupu, i ganea fuli ala e kotou nonofo ai loa.

²² Ka kotou fai loa le tuuti o le fulumeto i lokoutou fenua, e ke tuku loa se ga koga o lou faisaga leia e leaise ke tuuti loa, ti aua na ke tae loa le nea leia e toe. E ke tuku loa a ia ki le mativa mo le matapule. Ko au ko le Eteleno, ko lokoutou Atua.

Aso o le fakatagi pupusi

²³ Na masau loa le Eteleno kia Moisese, o pati :

²⁴ Masau ki fanau a Iselaele, o pati kia latou : I le fitu o masina, i le uluaki aso o le masina, e kotou taupau loa se aso malolo, leia e fakasa loa ki ni fakatagi pupusi, ti e kotou fai loa se fakatasi tapu.

²⁵ Aua na kotou fai loa se gaoi masani, ti e kotou momoli loa ki le Eteleno ni sakilifisio tutu e le afi.

Aso o totogi

²⁶ Na masau loa le Eteleno kia Moisese, o pati :

²⁷ Ko le aso kau agafulu o le fitu o masina, ko le aso lasi loa a ia o le fakamalie : E kotou fai loa se fakatasi tapu, ti e kotou sesunio loa, ti e kotou momoli loa ki le Eteleno ni sakilifisio tutu e le afi.

²⁸ Aua na kotou fai loa se gaoi masani i le aso lena, talie ko le aso a ia o le fakamalie, leia e tonu ke fai ai kia koutou le fakamalie i mua o le Eteleno, ko lokoutou Atua.

²⁹ Ko le tagata leia e leaise sesunio loa i le aso lena e tuuti loa a ia mei lona kakai.

³⁰ Ti ko tagata fuli e fai ia loa i le aso lena se gaoi masani, e kau maumaui loa a ia i loto malie o lona kakai.

³¹ Aua na kotou fai loa se gaoi fua e tasi. Ko se lao a ia ke tuku sosolo i okoutou tautupu, i ganea fuli ala e kotou nonofo ai loa.

³² Ko se sapato loa a ia kia koutou, ko se aso malolo, ti e kotou sesunio loa. Mei le afiafi o le iva o aso o kaku ki le afiafi o le apogipogi, e kotou fai loa lokoutou sapato.

Aso o fale pola

³³ Na masau loa le Eteleno kia Moisese, o pati :

³⁴ Masau ki fanau a Iselaele, o pati kia latou : ko le aso kau agafulu o le masina fitu leinei, ko le aso lasi loa a ia o fale pola ki le Eteleno, i aso e fitu.

³⁵ I le uluaki aso, e fai loa se fakatasi tapu : aua na kotou fai loa se gaoi masani.

³⁶ I aso e fitu, e kotou momoli loa ki le Eteleno ni sakilifisio tutu e le afi. I le valu o aso, e kotou fai loa se fakatasi tapu, ti e kotou momoli loa ki le Eteleno ni sakilifisio tutu e le afi ; ko se fakatasi tapu loa a ia : aua na kotou fai loa se gaoi masani.

³⁷ Ko aso lalasi ana o le Eteleno, ko fakatasi tapu, ala e kotou fakasa loa, o tupu ke momoli ki le Eteleno ni sakilifisio tutu e le afi, mo ni moliga nea kai, mo ni sakilifisio fakafetai, mo ni moliga vino, o mulimuli ki le lao o le sakilifisio o le aso lasi.

³⁸ E kotou tausi kese fai a sapato o le Eteleno, ti kotou soko atu aifai le fai o akoutou moliga ki le Eteleno, mo akoutou sakilifisio ki le fakasoko o ni fakapapau, ti mo akoutou moliga i le loto alofa.

³⁹ I le aso kau agafulu tupu lima o le fitu o masina, ka kotou tuuti loa a fua o le fenua, e kotou fai loa se aso lasi ki le Eteleno, i ni aso e fitu : ko le uluaki o aso ko se aso malolo loa a ia, ti ko le valu o aso ko se aso malolo loa a ia.

⁴⁰ I le uluaki aso, e kotou too loa ni fuai laakau malilie, mo ni lau palemie, mo ni taaulu laakau lalasi, ti mo ni taaulu laakau ko le sole ; ti kotou fakafiafia loa i mua o le Eteleno, ko lokoutou Atua, i ni aso e fitu.

⁴¹ E kotou fai loa le aso lasi lena ki le Eteleno i fetuu fuli, i aso e fitu, i le fitu o masina. Ko se lao a ia ke tuku sosolo ki okoutou tautupu i temi fuli. E kotou fai loa a ia i le fitu o masina.

⁴² E kotou nonofo loa i ni fale pola i le lolotoga o aso ana e fitu : E nofo loa a kakai fuli o le fenua o Iselaele i ni fale pola,

⁴³ o tupu ke iloa e okoutou tautupu muli na kau fakanonofo le kakai o Iselaele i ni fale pola, i le oki o laku fakamavae latou mei le fenua o Esipito. Ko au ko le Eteleno, ko lokoutou Atua.

⁴⁴ Ko le masau lena na tuku e Moisese ki fanau a Iselaele o uiga mo aso lalasi o le Eteleno.