Levitiko 22 - Tosi Tapu

¹ Na masau loa le Eteleno kia Moisese, o pati :

² Masau kia Alone mo ona vosa ke lotou fakaapaapa ki nea tapu ala kua momoli mai kiate au e fanau a Iselaele, ti ke aua na lotou fakakelekele loku suafa tapu. Ko au ko le Eteleno.

³ Pati kia latou : Ko tagata fuli i okoutou tautupu mo okoutou sakoga, leia e fakafeofi loa ki nea tapu ala kua fakatapui kiate au e fanau a Iselaele, kae maua loa iate ia se kelekele, e tuuti loa a ia mei oku mua. Ko au ko le Eteleno.

⁴ Ko tagata fuli o le faasiga o Alone, leia e maua ia loa le kilia pe ko se masaki fakatagata, e leaise kai loa e ia a nea tapu o kaku ki lona mea. E toe tatau ki leia e lave loa ki se tasi leia kua kelekele i se mate, pe ko leia na sali lona sua vai fakatagata i le pouli,

⁵ pe ko leia e lave loa ki se manu totolo o tupu ai lona kelekele, pe ko se tagata leia kua maua e se nea kelekele fua o kelekele ai.

⁶ Ko leia e lave loa ki nea ana e kelekele loa a ia o kaku ki le afiafi ; e leaise kai loa e ia ni nea tapu, kae fufulu loa e ia lona tino i le vai.

⁷ I le vilo o le laa, e mea loa a ia, ti e kai loa e ia a nea tapu, talie ko lana nea kai a ia.

⁸ E leaise kai loa e ia se manu masaki pe na tamate e se manu, o tupu ke aua na kelekele loa i ai. Ko au ko le Eteleno.

⁹ E lotou tausi loa aku fakatotonu, o tupu ke aua na lotou amo ia le tua o lalatou agasala ti ke lotou mamate, talie na lotou fakakelekele a nea tapu. Ko au ko le Eteleno, leia e fakamaokioki ia latou.

¹⁰ E leaise kai loa e se tagata kese se nea kai tapu ; e leaise kai loa a nea kai tapu e le tagata leia e nofo i le fale o le tagata faisakilifisio pe ko se tagata leia e gaoi totogi kiate ia.

¹¹ Kae kapau kua totogi paaga e se tagata faisakilifisio se tagata fakasausau, e kai loa e le tagata lena le nea kai a le tagata faisakilifisio, ti e tatau mo le tagata fakasausau leia kua tupu i le fale o le tagata faisakilifisio.

¹² E leaise kai loa e le taine o se tagata faisakilifisio leia kua avaga mo se tagata seka a nea kai ala kua momoli i le siki tapu.

¹³ Kae ko le taine o se tagata faisakilifisio, leia kua nofo lokonui pe kua mavete mo lona avaga ti e sala fanau, ti kua toe liliu loa o nofo i le fale o lona tamana ofaipe mua o lona avaga, e kai loa a ia ki le nea kai a lona tamana. E leaise kai loa se tagata seka ki nea kai a le tagata faisakilifisio.

¹⁴ Kapau e kai fakafuanoa loa e se tagata se nea tapu, e liufaki loa e ia ki le tagata faisakilifisio le tatau o le nea tapu lena, o toe fakalasi a ia ki lona vaega lima.

¹⁵ Aua na fakakelekele loa e le kau tagata faisakilifisio a nea tapu ala kua momoli e fanau a Iselaele, ti kua lotou momoli ki le siki tapu ki le Eteleno :

¹⁶ Kapau e lotou kai loa a moliga tapu kae e leaise lotou mea, e lotou teki loa ki fanau a Iselaele se agasala leia e tonu ke totogi : talie ko au ko le Eteleno, leia e fakatapui ia a moliga.

Manu lee mele ki sakilifisio

¹⁷ Na masau loa le Eteleno kia Moisese, o pati :

¹⁸ Masau kia Alone mo ona vosa, ti mo fanau fuli a Iselaele, o pati kia latou : Ko le tagata fuli ai o le fale o Iselaele mo le matapule fuli ai leia e mauli i Iselaele, e fai ia loa sana failaulau ki le Eteleno, i lona loto malie pe tupu ko le fakasoko o se fakapapau,

¹⁹ e too loa e ia se manu tagata lee mele i lana kau pipi, pe ko lana kau akeno, pe ko lana kau koti, o tupu ke tali malie lana vikitima.

²⁰ E leaise kotou momoli loa se manu leia e maua ia se mele, talie e leaise tali malie loa a ia.

²¹ Ti kapau e momoli loa ki le Eteleno e se tagata se manu lasi pe ko se manu ikiiki i ni sakilifisio fakafetai, o tupu ko le fakasoko o se fakapapau, pe ko lona loto alofa, e tonu ke too loa e ia se manu lee mele, o tupu ke tali malie loa a ia ; ke aua ai na maua loa e le manu se ga mele fua e tasi.

²² Aua na kotou momoli loa se manu leia e kivi, pe kito, pe lavea, pe tonaa, pe kamaa ; ke aua na kotou fai loa ki a nea ana se sakilifisio tutu e le afi i aluga o le aletale i mua o le Eteleno.

²³ E feala loa ke ke momoli se sakilifisio alofa ki se pipi tagata pe ko se akeno leia e nofo mo se vae leia e loa pe toetoe ; kae e leaise ke momoli loa aia o tupu ke fakasoko ai se fakapapau.

²⁴ Aua na kotou momoli loa ki le Eteleno se manu tagata leia kua sala fa kou, pe kua lalai, pe kua tatai pe kua motusi. Aua na kotou fai loa kia latou ni sakilifisio i lokoutou fenua.

²⁵ Aua na kotou tali mei lima o se tagata matapule se manu fua e tasi i manu ana, ke momoli ai se nea kai ki lokoutou Atua ; talie kua puli se koga o manu ana, ti kua lotou nofo mo se mele : e leaise tali malie loa latou.

²⁶ Na masau loa le Eteleno kia Moisese :

²⁷ Ka fanaui loa se uviki pipi, pe ko se akeno, pe ko se uviki koti, e nofo loa a ia mo lona tinana i ni aso e fitu ; kae kamata atu loa i le valu o aso, e feala loa ke momoli a ia i se sakilifisio tutu e le afi ki le Eteleno.

²⁸ Aua na kotou tamate loa se manu mo lona uviki i le aso e tasi, le uviki pipi, mo le uviki ovi, ti mo le uviki koti.

²⁹ Kapau e kotou momoli loa ki le Eteleno se sakilifisio fakafetai, kotou mulimuli loa ki le lekula o tupu ke tali malie a ia.

³⁰ E kai loa le vikitima i le aso fai lena ; aua na kotou tuku loa se nea ke kaku ki le usu. Ko au ko le Eteleno.

³¹ Kotou tausi loa aku fakatotonu, ti kotou fai loa latou. Ko au ko le Eteleno.

³² Aua na kotou fakakelekele loa loku suafa tapu, talie e kau loto ke iloa e fanau a Iselaele loku maokioki. Ko au ko le Eteleno, leia e fakamaokioki ia koutou,

³³ ti na fakamavae ia koutou mei le fenua ko Esipito ke kau liliu ko lokoutou Atua. Ko au ko le Eteleno.