Levitiko 21 - Tosi Tapu

Lekula ki le kau faisakilifisio

¹ Na pati loa le Eteleno kia Moisese : masau ki le kau faisakilifisio, vosa o Alone, o pati kia latou : E leaise fakakelekele loa le tagata faisakilifisio i lona kakai o tupu ko se mate,

² gato fuai mo kapau ko se tasi o lona famili totonu, ofaipe lona tinana, mo lona tamana, mo lona vosa, mo lona taine, mo lona taina totonu,

³ ti mo lona tuagaane leia koi taupoou, leia koi kau ki lona famili totonu, talie e leikiaise avaga a ia.

⁴ Ko le tagata faisakilifisio ko le pule a ia o lona kakai, koia e leaise tonu ai ke fakakelekele a ia, talie e matagafua loa a ia i ai.

⁵ E leaise fai loa e le kau tagata faisakilifisio ni tosula, mo ni ma, ti mo ni masikasika i olatou tino.

⁶ E lotou maokioki loa ki lolatou Atua ; ti e leaise lotou fakamatagafua loa le suafa o lolatou Atua, talie e lotou momoli ki le Eteleno a failaulau tutu e le afi, le nea kai o lolatou Atua : e lotou maokioki loa.

⁷ E leaise lotou avaga loa mo se fafine faiaga pe kua maumaui, e leaise lotou too loa se fafine leia kua kapu e lona avaga, talie e lotou maokioki ki lolatou Atua.

⁸ E ke tio loa ki le tagata faisakilifisio e maokioki, talie e momoli e ia le nea kai o lona Atua ; e maokioki loa a ia kiate koe, talie e kau maokioki, a au, ko le Eteleno, leia e fakamaokioki ia koutou.

⁹ Kapau e faiaga loa se taine o se tagata faisakilifisio, e fakamatagafua loa e le taine lena a ia totonu, ti e toe fakamatagafua e ia mo lona tamana : e tutu loa a ia i le afi.

¹⁰ Ko le tagata faisakilifisio lasi, leia kua fakanofo ko le pule o ona fetaina, leia kua fakatapui e le lolo tapu i le aso leia na kamata ai lana gaoi, ti kua tui ia a kofu tapu, e leaise veuki loa e ia lona lau ulu, ti e leaise sae loa e ia ona kofu.

¹¹ E leaise ano loa a ia ki se mate ; e leaise fakakelekele loa a ia o tupu ko lona tamana mo lona tinana.

¹² E leaise mavae loa a ia i le sagatualio, ti e leaise fakakelekele loa e ia le sagatualio o lona Atua ; talie kua fakatapui a ia e le lolo tapu o lona Atua. Ko au ko le Eteleno.

¹³ E avaga loa a ia mo se taine taupoou.

¹⁴ E leaise too loa e ia se fafine lokonui, pe ko se fafine na kapu, pe ko se fafine faiaga, pe ko se fafine leia kua maumaui lona taupoou ; kae e avaga loa a ia mo se taine taupoou i lona kakai.

¹⁵ O tupu ke aua na fakaulu loa e ia se sakoga kese ki lona famili. Ko au ko le Eteleno leia e fakamaokioki ia a ia ke tausi kiate au.

¹⁶ Na masau loa le Eteleno kia Moisese, o pati :

¹⁷ Masau kia Alone, o pati kiate ia : ko le tagata fuli ai i lou lanu mo ou sakoga, leia e maua ia loa se mele i lona tino, e leaise fakafeofi loa a ia o momoli le nea kai o lona Atua.

¹⁸ E leaise feala loa ke fakafeofi a tagata fuli ala e maua ia loa se maimoa : se kivi, mo se kito, mo leia e maua ia se maimoa i lona isu pe ko ona mata ;

¹⁹ se tagata leia e vae fati pe lima fati ;

²⁰ se piko, mo se tagata pakisikisi, mo se tagata leia e maua ia se fa pule i lona mata, mo se tagata kama, mo se tagata leia kua maumau ona fa kou.

²¹ Ko tagata fuli o le faasiga o Alone, leia e maua ia loa se maimoa fakatino, e leaise fakafeofi loa o momoli ki le Eteleno a sakilifisio tutu e le afi ; e maua e ia se maimoa fakatino : e leaise fakafeofi loa a ia o momoli le nea kai o lona Atua.

²² E feala loa ke kai e ia le nea kai o lona Atua, ni nea maokioki lasi mo ni nea tapu.

²³ Kae e leaise ano loa a ia ki le lito, ti e leaise fakafeofi loa a ia ki le aletale, talie e maua e ia se maimoa fakatino ; e leaise fakakelekele loa e ia oku sagatualio, talie ko au ko le Eteleno, leia e fakamaokioki ia latou.

²⁴ Na tuku loa e Moisese a folafola ana kia Alone, mo ona vosa, ti mo fanau fuli a Iselaele.