Levitiko 20 - Tosi Tapu

Ni iki a lao mo tua

¹ Na masau loa le Eteleno kia Moisese, o pati :

² E ke pati loa ki fanau a Iselaele : kapau e soli loa e se tagata o fanau a Iselaele pe ko se matapule leia e mauli i Iselaele se tasi o ana fanau kia Moloke, e tautea loa le tagata lena ki le mate : e tuki fatui loa a ia e le kakai o le fenua.

³ Ti ko au, e kau tagaki loa oku mata ki le tagata lena ti e kau tuuti loa a ia mei lona kakai, talie kua momoli e ia lana fanau kia Moloke, ti kua fakakelekele e ia loku sagatualio, ti kua fakamatagafua e ia loku suafa tapu.

⁴ Kapau e tapono a mata o le kakai o le fenua ki le tagata lena, leia e se soli ia ona fanau kia Moloke, ti kapau e leaise lotou tamate le tagata lena,

⁵ E kau fulusi loa, e au, oku mata ki le tagata lena mo lona famili, ti e kau tuuti loa a ia mei lona kakai, mo latou fuli ala na kau mo ia ki le tausi fakalialia kia Moloke.

⁶ Kapau e masau se tagata ki le kau mate mo laumalie veli, o faiaga mo latou, e kau tagaki loa oku mata ki le tagata lena, ti e kau tuuti loa a ia mei lona kakai.

⁷ E kotou fakamaokioki loa koutou ti e kotou maokioki loa, talie ko au ko le Eteleno, ko lokoutou Atua.

⁸ Kotou tausi aku lao fuli, ti kotou fai loa latou. Ko au ko le Eteleno leia na filifili ia koutou ke kotou liliu ko se kakai maokioki.

⁹ Kapau e lauveli loa se tagata ki lona tamana pe ki lona tinana, e tautea loa a ia ki le mate : talie kua lauveli a ia ki lona tamana mo lona tinana : e vilo loa lona toto kiate ia.

¹⁰ Kapau e fai loa e se tagata se tono mo se fafine avaga, kapau e fai loa e ia se tono mo le avaga o lona oloi, e tautea loa ki le mate le tagata mo le fafine ala na tono.

¹¹ Kapau e momoe loa se tagata mo le avaga o lona tamana, ti e sufegi loa e ia le telefua o lona tamana ; e tautea loa ki le mate le tagata mo le fafine. E vilo loa lola toto kia laua.

¹² Kapau e momoe loa se tagata mo le avaga o lona vosa, e tautea loa laua toka lua ki le mate, talie kua la fai ia se nea fakalumaluma : e vilo loa lola toto kia laua.

¹³ Kapau e momoe loa se tagata mo se tasi tagata ofaipe le momoe mo se fafine, kua la fai loa se agasala fakalialia ; e tautea loa laua ki le mate. E vilo loa ola toto kia laua.

¹⁴ Kapau e avaga loa se tagata mo se taine mo le tinana, ko se nea veli lasi a ia : e tutu loa latou i le afi, le tagata mo fafine toka lua, o tupu ke aua na toe fai loa le veli lena i loto malie o koutou.

¹⁵ Kapau e momoe loa se tagata mo se manu, e tautea loa a ia ki le mate ; ti e kotou tamate loa le manu.

¹⁶ Kapau e fakafeofi loa se fafine ki se manu, ke momoe mo ia, e tamate loa le fafine mo le manu.

¹⁷ Kapau e momoe loa se tagata mo lona tuagaane totonu, le taine totonu o lona tamana pe o lona tinana, ko le nea fakalumaluma a ia ; e tuuti loa laua i mata o fanau o lola kakai : kua momoe le tagata lena mo lona tuagaane, e amo loa e ia lana agasala.

¹⁸ Kapau e momoe loa se tagata mo se fafine i lona menise, o tio ki lona telefua, ti kapau e tio le tagata ki le sali o le toto, ti kapau e tio foki le fafine ki le sali o lona toto, ko se nea veli a ia ; e tuuti loa laua toka lua mei lola kakai.

¹⁹ Aua na ke momoe loa mo le taina o lou tinana, pe ko le tuagaane o lou tamana, talie ko lou famili totonu. Ko latou ala e fai ia loa le nea lena, e amo ia loa le veli o le agasala lena.

²⁰ Kapau e momoe loa se tagata mo le avaga o le taina o lona tamana, e fakamatagafua loa e ia lona tamana ; e tonu loa ke la amo le veli o le agasala lena, ti e la mamate loa sala fanau.

²¹ Kapau e avaga loa se tagata mo le avaga o lona taina, e fai loa e ia se nea fakalialia. E leaise maua loa e le taumatua lena sola fanau, talie kua fakamatagafua e le tagata lena lona taina totonu.

²² E kotou tausi loa aku lao fuli mo aku fakatotonu. Ti e leaise luluai loa koutou e le fenua leia e kau taki loa koutou ki ai ke koutou nofoi.

²³ Aua na kotou mulimuli loa ki aga o puleaga ala ka kau kapu ia loa i okoutou mua ; talie kua fai e puleaga ana ni aga fakalialia, o tupu ai laku fakalialia kia latou.

²⁴ Kua kau pati atu kia koutou : ko koutou ala e maua ia loa lolatou fenua ; e kau soli loa a ia kia koutou ke kotou pule ki ai : ko se fenua a ia leia e tafe ai le sua manu mo le sua meli. Ko au ko le Eteleno, ko lokoutou Atua, leia kua filifili ia koutou i atu puleaga.

²⁵ Kotou tokaga loa o fakakesekese a manu mea mo manu kelekele, a manu lele mea mo manu lele kelekele, o tupu ke aua na kotou kelekele loa i le lave ki ni manu, mo ni manu lele, ti mo ni manu totolo i le kele. Na kau fai le fakatuutuu lena ke kotou popoto i le iloa o nea ala e kelekele.

²⁶ E kotou maokioki loa kiate au, talie e kau maokioki, a au, ko le Eteleno ; kua kau fakamavae koutou mei atu puleaga, o tupu ke kotou liliu ko loku tofiga totonu.

²⁷ Kapau e maua e se tagata pe ko se fafine le laumalie o se mate pe ko le laumalie o le kikite, e tautea loa laua ki le mate ; e tuki fatui loa laua : e vilo loa ola toto kia laua.