Levitiko 2 - Tosi Tapu

Moliga falina

¹ Kapau e fai loa e se tagata sana moliga nea kai ki le Eteleno, e fai loa e ia lana moliga ki le falina tea ; ti e liligi loa e ia se lolo ki aluga, ti e toe tuku loa e ia ki ai se iseso.

² E ave loa e ia le moliga ki le kau faisakilifisio, vosa o Alone ; ti e too loa e ia ki lona lima se ga lukuga i le falina lena, leia kua fakasusu ki le lolo, mo le iseso katoa, ti e tutu loa e le tagata faisakilifisio a nea fuli ana i aluga o le aletale ofaipe se fakamanatu. Ko se moliga tutu a ia e le afi, ti ko se nea manogi malie a ia ki le Eteleno.

³ E tuku loa le potu leia na toe i le moliga kia Alone mo ona vosa ; ko se vaega maokioki lasi a ia i sakilifisio ala kua tutu e le afi i mua o le Eteleno.

⁴ Kapau e ke fai se moliga ki se nea leia kua fakamoso i le gutuumu, ti e ke fakaaoga ata le falina tea, ti e ke fai ni keke ala kua lusi ki se lolo ti e sala fakatupu, ti mo ni pane maninifi sala fakatupu ti kua pani ki le lolo.

⁵ Ti kapau ko lau moliga ko se nea kua fakamoso i le fakapaku, ti e ke fai loa a ia ki se falina tea leia kua lusi ki se lolo ti e sala fakatupu.

⁶ E ke tofi loa a ia, ti e ke liligi loa i aluga se lolo : ko se moliga nea kai a ia.

⁷ Ti kapau ko lau moliga ko se nea leia kua tunu i le ukamea vagavaga, e ke fai loa a ia ki le falina tea leia kua lusi ki le lolo.

⁸ E ke ave loa le moliga leia kua fai ki nea ana ki le Eteleno ; e ke tuku loa a ia ki le tagata faisakilifisio, leia e ave ia loa a ia ki le aletale.

⁹ E too loa e le tagata faisakilifisio i ai le nea leia e tonu ke momoli ki le fakamanatu, kae tutu loa e ia a ia i aluga o le aletale. Ko se moliga a ia kua tutu e le afi, ti ko se nea manogi malie a ia ki le Eteleno.

¹⁰ E tuku loa le nea leia e toe i le moliga kia Alone mo ona vosa ; ko se vaega tapu a ia i sakilifisio ala kua tutu e le afi i mua o le Eteleno.

¹¹ Aua na kotou fai loa ki le Eteleno se moliga mo se fakatupu ; aua na kotou tutu loa i se aso se nea leia e maua ai se fakatupu pe ko se meli i moliga ala kua tutu e le afi i mua o le Eteleno.

¹² E feala ke kotou fai loa se moliga leia e maua ai se fakatupu mo se meli i le aso leia e kotou momoli ai a uluaki fua, kae aua na ke momoli loa a ia i le aletale ofaipe se moliga leia e manogi malie ki le Eteleno.

¹³ E ke liligi loa se patai ki au moliga nea kai fuli ; e leaise ke tuku loa lau moliga ke sala patai, talie ko le patai ko le fakamailoga a ia o le sai leia kua fai e le Atua mo koutou. Koia e tonu ai ke ke tuku se patai i aluga o au moliga fuli.

le moliga o uluaki fua

¹⁴ Kapau e kotou fai loa ki le Eteleno se moliga ki uluaki fua o le kele, ti e kotou momoli loa ni fui fulumeto foou, ala kua tunu i le afi ti kua tuki ke malu, ko se moliga a ia o fua foou.

¹⁵ E ke liligi loa se lolo i aluga, ti e ke toe teki loa ki aluga se iseso. Ko se moliga nea kai a ia.

¹⁶ E tutu loa e le tagata faisakilifisio se potu o fui fulumeto leia kua tuki fakamaluu, mo le lolo, ti mo le iseso katoa. Ko se moliga a ia kua tutu e le afi i mua o le Eteleno.