Levitiko 18 - Tosi Tapu

Lao o uiga mo le mauli

¹ Na masau loa le Eteleno kia Moisese, o pati :

² Masau ki le kakai o Iselaele, o pati loa kia latou : ko au ko le Eteleno, ko lokoutou Atua.

³ Ke aua na kotou fai loa le nea leia e fai i le fenua o Esipito, leia na kotou nofo ai, ti ke aua na kotou fai loa le nea leia e fai i le fenua o Kanaane leia e kau ave koutou ki ai : Ke aua na kotou mulimuli loa ki alatou aga fakafenua.

⁴ Kotou fai loa aku fakatotonu, ti kotou tausi loa aku lao, ti kotou mulimuli loa ia latou. Ko au ko le Eteleno, ko lokoutou Atua.

⁵ Kotou tausi loa aku lao mo aku fakatotonu : ko le tagata leia e fai ia loa latou e mauli loa ia latou. Ko au ko le Eteleno.

⁶ Aua na fakafeofi loa se tasi o koutou ki lona kaiga totonu, ke sufegi lona telefua. Ko au ko le Eteleno.

⁷ Aua na ke sufegi loa le telefua o lou tamana, pe ko le telefua o lou tinana. Ko lou tinana a ia : aua na ke sufegi loa lona telefua.

⁸ Aua na ke sufegi loa le telefua o le avaga o lou tamana. Ko le telefua a ia o lou tamana.

⁹ Aua na ke sufegi loa le telefua o lou tuagaane, taine o lou tamana pe taine o lou tinana, leia na tupu i le fale pe i fafo o le fale.

¹⁰ Aua na ke sufegi loa le telefua o le taine o lou vosa pe ko le taine o lou taine. Talie ko lou telefua a ia.

¹¹ Aua na ke sufegi loa le telefua o le taine o le avaga o lou tamana, leia na tupu mei lou tamana. Ko lou tuagaane a ia.

¹² Aua na ke sufegi loa le telefua o le tuagaane o lou tamana. Ko le famili totonu a ia o lou tamana.

¹³ Aua na ke sufegi loa le telefua o le taina o lou tinana. Ko le kaiga totonu a ia o lou tinana.

¹⁴ Aua na ke sufegi loa le telefua o le taina o lou tamana. Aua na ke fakafeofi loa ki lona avaga. Ko lou tinana a ia.

¹⁵ Aua na ke sufegi loa le telefua o lou fugao. Ko le avaga a ia o lou vosa : aua na ke sufegi loa lona telefua.

¹⁶ Aua na ke sufegi loa le telefua o le avaga o lou taina. Ko le telefua a ia o lou taina.

¹⁷ Aua na ke sufegi loa le telefua o se fafine mo lona taine. Aua na ke too loa le taine o lona vosa, pe ko le taine o lona taine, ke sufegi ola telefua. Ko ou kaiga totonu laua : ko se nea veli a ia.

¹⁸ Aua na ke sufegi loa le telefua o le taina o lou avaga, i le temi leia e mauli ai lou avaga. Ko le nea lena e fakatupu veli.

¹⁹ Aua na ke sufegi loa le telefua o se fafine i lona menise, talie e kelekele a ia.

²⁰ Aua na ke sufegi loa le telefua o le avaga o lou oloi, talie ko le nea lena e fakakelekele ia a koe.

²¹ Aua na ke tuku loa ke momoli i le afi se tasi o au fanau kia Moloke, ti aua na lau veli loa ki le suafa o lou Atua : ko Au ko le Eteleno.

²² Aua na ke momoe loa mo se tagata ofaipe le momoe mo se fafine ; ko se nea fakalialia a ia.

²³ Aua na ke momoe loa mo se manu, ke fakakelekele ai a koe. Ti aua na fakafeofi loa se fafine ki se manu, ke momoe mo ia : ko se nea fakalialia a ia.

²⁴ Ke aua na fakakelekele loa koutou e se nea fua e tasi o nea ana. Talie ko nea fuli ana ala na fakakelekele ia a puleaga ala e kau kapu loa i okoutou mua.

²⁵ Kua kelekele le fenua ia latou ; e tautea loa lana agaveli, ti e luluai loa e le fenua lona kakai.

²⁶ Koia, kotou tausi loa aku lao mo aku fakatotonu, ti e leaise kotou fai loa se nea fakalialia e tasi i nea ana, e leia o le fenua mo le matapule leia e nofo i loto malie o koutou.

²⁷ Talie na fai a nea fakalialia fuli ana e tagata o le fenua, ala na nofo i ai i mua o koutou ; ti na kelekele i ai le fenua.

²⁸ Kotou tokaga na luluai loa koutou e le fenua, mo kapau e kotou fakakelekele loa a ia, ofaipe lana luluai latou ala na nonofo i ai i mua o koutou.

²⁹ Talie ko latou fuli ala e fai ia loa se nea fakalialia i nea fuli ana, e tuuti loa mei lolatou kakai.

³⁰ Kotou tausi loa aku fakatotonu ; ti aua na kotou fai loa se aga fakalialia e tasi i nea fakalialia ala na fai i mua o koutou, ti e leaise kotou kelekele loa. Ko au ko le Eteleno, ko lokoutou Atua.