Levitiko 16 - Tosi Tapu

Aso lasi o le totogi o agasala

¹ Na masau loa le Eteleno kia Moisese i le oki o le mate o vosa e lua o Alone, ala na ano ki mua o le Eteleno mo se kaloni kese, o tupu ai lola mate.

² Na pati loa le Eteleno kia Moisese : Masau ki lou taina ko Alone, ke aua na ulu fakalaluvale ki le sagatualio, ki leia atu fetuu o le lito tapono, leia e tuku ai le aleka mo lona tapono tapu ; talie e kau sa loa i ai i le ao, i aluga o le tapono tapu o le aleka, ti e feala loa ke mate ai a ia.

³ Ko leinei le nea leia e tonu ke fai e Alone, ti o ulu loa a ia ki le sagatualio : e too loa e Alone se pipi tagata ki le sakilifisio o le fakamalie ki le Atua, mo se akeno tagata ki le failaulau.

⁴ E tui loa e ia ki lona tino se kofu lino loa, ti mo se vavae loto lino ; e toi loa e ia se kilipipi lino ti e uufi loa e ia lona fa ulu ki se puloga lino ; kae e tonu ke maanu loa a ia i mua o le tui o nea ana, talie ko kofu tapu latou.

⁵ E tuku loa kiate ia e le kakai o Iselaele ni koti tagata e lua ki le sakilifisio o le fakamolemole, mo se ovi tagata e tasi ki le failaulau.

⁶ Ti e ave loa e Alone le pipi tagata leia e tonu ke momoli ki lana agasala totonu, ti e fai loa e ia le sakilifisio o le fakamolemole kiate ia totonu mo lona famili.

⁷ Ti e ave loa e ia a koti tagata e lua ki mua o le Eteleno, i le uluaga o le falela tapu,

⁸ Ti e toso loa e ia ke iloa le koti tagata leia e tonu ke momoli ki le Eteleno, mo le koti tagata leia e tonu ke tuku kia Asasele.

⁹ Ti e ave loa e ia le koti tagata leia kua fakasa e le toso ke tuku ki le Eteleno, ti e momoli loa e ia a ia ki le fakamalie.

¹⁰ Kae ki le koti tagata leia e tuku kia Asasele, e fakaaoga loa a ia ki le tootooga o le fakamolemole o agasala : e fakatuu loa le koti tagata mauli lena i mua o le Eteleno, i mua o lona kapu ke ano kia Asasele i le toafa.

¹¹ E momoli loa e Alone lana pipi tagata fakamolemole kiate ia totonu mo mo lona famili. E tamate loa e ia lana pipi tagata fakamolemole.

¹² E too loa e ia se tanakiaga malala leia kua apele i le malala kaka o le aletale leia e tuu i mua o le Eteleno, mo ni lukuga kaloni fakamanogi e lua na ali ki lona alofilima ; ti e ave loa e ia a nea ana ki loto o le lito tapono, ki le potu taputapu.

¹³ E liligi loa e ia le pauta fakamanogi ki aluga o le malala kaka, o tupu ke uufi e le afu o le kaloni le tapono o le manava alofa leia e teki i le aleka, ti e leaise mate loa Alone.

¹⁴ E too loa e ia le toto o le pipi tagata, ti e fai loa e ia le afusi ki lona maikao ki mua o le tapono tapu ki le fetuu esite ; ti e fai loa e ia ni afusi o le toto, tua fitu, ki mua o le tapono o le manava alofa.

¹⁵ Ti e tamate loa e ia le koti tagata ki le fakamolemole o agasala a le kakai, ti e ave loa e ia se toto ki loto o le lito tapono, o fai ai ni afusi ki le toto i aluga o le tapono o le manava alofa ti mo mua o le tapono o le manava alofa.

¹⁶ E fai fenaaki loa e ia le fakamalie i le sagatualio o tupu ko kelekele a fanau a Iselaele mo maumau fuli ala na lotou agasala ai. E toe fai fenaaki loa e ia ki le falela tapu, leia e nofo mo latou i loto malie olatou kelekele.

¹⁷ E leaise nofo loa se tasi i le falela tapu i le temi leia e ulu ai loa Alone o fai le fakamalie i le potu taputapu, o kaku ki lana toe ulu ake ki fafo. E fai loa e ia le fakamolemole kiate ia totonu, mo lona famili, ti mo le kakai katoa o Iselaele.

¹⁸ I lana mavae mei ai, e ano loa a ia ki le aletale leia e tuu i mua o le Eteleno, ti e fai loa e ia le fakamalie ki le aletale ; e too loa e ia se toto o le pipi tagata mo le koti tagata, ti e pooi loa e ia ki ai a tala o le aletale i le takatakai katoa.

¹⁹ E fai loa e ia ki lona maikao ni afusi o le toto e fitu ki aluga o le aletale ; e fakamea loa e ia a ia ti e fakamaokioki loa e ia a ia, o tupu ko kelekele o fanau a Iselaele.

Le koti o le totogi

²⁰ Ka oki loa le fai e Alone o le fakamalie ki le sagatualio, mo le falela tapu, ti mo le aletale, e fakafeofi ake loa e ia le koti tagata mauli.

²¹ E teki loa e Alone ona lima e lua ki le fa ulu o le koti tagata mauli, ti e kofesio loa e ia kiate ia a ga sala fuli, mo maumau fuli, ti mo sala fuli o le kakai o Iselaele ; e teki loa e ia latou ki le fa ulu o le koti tagata, ti e kapu loa e ia le koti tagata ki le toafa, ki se tagata leia kua filifili ki le kauga lena.

²² E amo loa e le koti tagata lena a agasala fuli, o ave ki se kele kaka. E kapu loa le koti tagata ki le toafa.

²³ E ulu loa Alone ki le falela tapu ; e tatala loa e ia a kofu lino ala na tui e ia o ulu ki le sagatualio, ti e tuku loa e ia latou i ai.

²⁴ E fufulu loa e ia lona tino ki se vai i se ganea tapu, ti e toe tui loa e ia ona kofu. Ti e ulu loa a ia ki fafo, o momoli loa lana failaulau, mo le failaulau a le kakai, ti e fai loa e ia le fakamalie kiate ia totonu mo le kakai.

²⁵ E tutu loa e ia i aluga o le aletale le gako o le vikitima o le fakamalie.

²⁶ Ko leia na kapu ia le koti tagata kia Asasele, e tonu ke fo loa e ia ona kofu, ti ke fufulu loa e ia lona kuaga i le vai ; ti o ulu loa a ia ki le nofolaga.

²⁷ E ave loa ki fafo o le nofolaga le pipi tagata o le fakamalie mo le koti tagata o le fakamalie, ala kua ave ola toto ki le sagatualio ke fai ai le fakamalie, ti e tutu loa e le afi ola kili, mo ola tino, ti mo ola faikauga.

²⁸ Ko leia e tutu ia loa a nea ana, e tonu ke fo loa e ia ona kofu, ti ke fufulu loa e ia lona tino i le vai, ti o ulu loa a ia ki le nofolaga.

²⁹ Ko le lao leinei e kotou tausi loa o lee gato : i le aso kau agafulu o le masina fitu, e kotou sesunio loa, ti aua na kotou fai loa se gaoi fua e tasi, e koutou mo le tagata totonu o le fenua, ti mo le matapule leia e nofo mo koutou.

³⁰ Talie i le aso a ia e fai ai loa le fakamalie kia koutou, o tupu ke fakamea ai koutou : e kotou fakamea loa i akoutou agasala i mua o le Eteleno.

³¹ Ko se sapato loa a ia kia koutou, ko se aso malolo, ti e kotou sesunio loa. Ko se lao a ia leia ke fai tuumau loa i tautupu mo tautupu.

³² E fai loa le fakamalie e le tagata faisakilifisio leia kua pani ki le lolo tapu ti kua oki i le fakanofo o fetogi ia lona tamana i le tuulaga o le tagata faisakilifisio lasi. E tui loa e ia a kofu lino tapu,

³³ E fai loa e ia le fakamalie ki le sagatualio tapu, ti e fai loa e ia le fakamalie ki le falela tapu mo le aletale, ti e fai loa e ia le fakamalie ki le kau tagata faisakilifisio mo le fakatasi katoa.

³⁴ E tuu loa le nea lena kia koutou ko se lao lee gato : e fai tua tasi loa i le fetuu le fakamalie a fanau a Iselaele, o tupu ko alatou agasala. Ti na fai loa le nea leia na fakatotonu e le Eteleno kia Moisese.