Levitiko 15 - Tosi Tapu

Lao ki kelekele fakatino

¹ Na masau loa le Eteleno kia Moisese mo Alone, o pati :

² Kolua masau ki le kakai o Iselaele, o pati kia latou : Ka maua loa e se tagata se masaki fufula i lona tino fakatagata, e kelekele loa a ia i le nea lena e sali loa iate ia.

³ E kelekele le nea lena e sali loa mei lona tino fakatagata pe tapono ia a ia, ti e fakakelekele e ia a ia.

⁴ Ti e kelekele loa a moeaga fuli ala e moe ai loa le tagata lena mo ekeekeaga fuli ala e eke ai loa a ia.

⁵ Ti ko leia e lave loa ki le moeaga lena, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi.

⁶ Ti ko leia e eke loa i se ekeekeaga leia na eke ai se tagata masaki, e tonu ke fo loa e ia ona kofu, ti ke maanu a ia totonu ; ti e kelekele loa a ia o kaku ki le afiafi.

⁷ Ti ko leia e lave loa ki le tagata masaki, e tonu ke fo loa e ia ona kofu, ti ke maanu loa a ia totonu, ti e kelekele loa a ia o kaku ki le afiafi.

⁸ Ti kapau e anusi loa e le tagata masaki se tagata mea, e tonu ke fo loa e le tagata lena ona kofu, ti ke maanu loa a ia totonu ; ti e kelekele loa a ia o kaku ki le afiafi.

⁹ Ti ko ekeekeaga i manu fuli ala e fanoga ai loa le tagata masaki, e kelekele loa.

¹⁰ Ti ko latou fuli ala e lave loa ki se nea leia na tuku i lalo o le tagata masaki, e kelekele loa o kaku ki le afiafi. Ti ko leia e amo ia loa se nea leia na tuku i lalo o le tagata masaki, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi.

¹¹ Ko leia e lave loa ki ai le tagata masaki kae na leaise fufulu ona lima, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi.

¹² Ko ipu kele fuli ala e lave loa ki ai le tagata masaki e tonu ke maumaui loa, kae ko ipu laakau fuli, e tonu ke fufulu loa latou ki se vai matapuna.

¹³ Ka oki loa le sasali leia na fakakelekele ia le tagata, e tonu ke talitali loa le tagata lena i ni aso e fitu, ti o mea loa a ia ; e tonu ke fo loa e ia ona kofu, ti ke maanu loa a ia totonu i se vai matapuna, ti o mea loa a ia.

¹⁴ I le valu o aso, e too loa e ia ni kulukulu e lua pe ko ni lupe e lua, ti e ano loa a ia o tuku laua ki le tagata faisakilifisio, i mua o le Eteleno, i le uluaga o le falela tapu.

¹⁵ E momoli loa e le tagata faisakilifisio se manu lele e tasi ki le sakilifisio o le fakamolemole, ti mo se tasi manu lele ki le failaulau. Ti e fai loa e ia ki le tagata lena i mua o le Eteleno, le tootooga leia e fakamea ia loa a ia i lona masaki fakatagata.

¹⁶ Ka sali loa mei se tagata lona sua vai fakatagata, e tonu ke fakamea loa e ia lona tino katoa ; ti e kelekele loa a ia o kaku ki le afiafi.

¹⁷ Ko kofu fuli, mo kie kafu fuli, mo kili fuli ala e lave ki ai le sua vai fakatagata, e tonu ke fakamea loa ki se vai, ti e kelekele loa a ia o kaku ki le afiafi.

¹⁸ Ti kapau e momoe loa se tagata mo se fafine, e tonu ke la fakamea loa toka lua, ti e la kelekele loa o kaku ki le afiafi.

Lao ki kelekele fakatino o le fafine

¹⁹ Ka menise loa se fafine, o sali se toto mei lona tino, e kelekele loa a ia i ni aso e fitu. Ti ko leia e lave loa kiate ia, e toe liliu loa a ia o kelekele, ti e kelekele loa a ia o kaku ki le afiafi.

²⁰ Ko moeaga fuli ala e moe ai loa a ia mo ekeekeaga fuli ala e eke ai loa a ia, i lona menise, e kelekele loa.

²¹ Ko leia e lave loa ki lona moeaga, e tonu ke fo loa e ia ona kofu, ti ke maanu loa a ia totonu, ti e kelekele loa a ia o kaku ki le afiafi.

²² Ti ko leia e lave loa ki se nea leia na eke ai a ia, e tonu ke fo loa e ia ona kofu, ti ke maanu loa a ia totonu, ti e kelekele loa a ia o kaku ki le afiafi.

²³ Ti kapau na teki loa se nea i lona moeaga, pe i le nea leia na eke ai a ia, ko leia e lave loa ki le nea lena, e kelekele loa a ia o kaku ki le afiafi.

²⁴ Ti kapau e momoe loa se tagata mo le fafine lena i lona menise, e maua loa e le tagata lena le kelekele o le fafine : ti e kelekele loa le tagata i ni aso e fitu, ti ko moeaga fuli ala e moe ai loa le tagata e liliu loa o kelekele.

²⁵ Kapau e sali loa se toto i se fafine o fakalaka i aso o lona menise, ti e kelekele loa a ia i aso fuli ala e sali ai le toto, ofaipe le temi o lona menise.

²⁶ Ti ko moeaga fuli ala e moe ai loa le fafine lena mo ekeekeaga fuli ala e eke ai loa a ia, e kelekele loa, ofaipe le temi o lona menise.

²⁷ Ti ko leia e lave loa ki le moeaga lena pe ko le ekeekeaga lena, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi.

²⁸ Ka oki loa le sali o le toto, e talitali loa le fafine i ni aso e fitu, ti o mea loa a ia.

²⁹ I le valu o aso, e too loa e ia ni kulukulu e lua pe ko ni lupe e lua, ti e ave loa e ia laua ki le tagata faisakilifisio, i le uluaga o le falela tapu.

³⁰ E momoli loa e le tagata faisakilifisio se manu lele e tasi ki le sakilifisio o le fakamolemole, ti ko le tasi manu lele ki le failaulau. Ti e fai loa e ia ki le fafine, i mua o le Eteleno, le sakilifisio ke fakamea ai loa a ia i lona masaki toto.

³¹ Kolua fakamamao mei le sagatualio le kakai o Iselaele mo ka e lotou kelekele ; ti e leaise lotou mamate loa o tupu ko le fakakelekele o loku nofoaga leia e tuu i loto malie o latou.

³² Ko le lao lena ki le tagata leia e maua ia loa se masaki fakatagata leia e sali, mo se sua vai fakatagata leia e sali,

³³ Ti mo le fafine leia e menise, mo le tagata leia e momoe mo le fafine i lona kelekele.