Levitiko 14 - Tosi Tapu

Lao le fakamea o le kilia

¹ Na masau loa le Eteleno kia Moisese, o pati :

² Ko leinei le lao ki le fakamea o le tagata kilia. E ave loa a ia ki le tagata faisakilifisio.

³ E mavae loa le tagata faisakilifisio mei le nofolaga. Ti kapau e tio loa le tagata faisakilifisio kua malie le kilia o le tagata kilia,

⁴ Ti e fakatotonu loa e le tagata faisakilifisio ke aumai ni manu lele e lua mauli mo mea, ti mo se fafie sete, mo se fului ovi kula, ti mo se taulu isopa.

⁵ Ti e tamate loa e le tagata faisakilifisio le tasi manu lele i aluga o le ipu kele leia e tuku ai se vai matapuna.

⁶ Ti e too loa e ia le manu lele mauli, mo le fafie sete, mo le fului ovi kula, ti mo le taulu isopa ; ti e ukui loa e ia latou, o fakatasi mo le manu lele mauli, ki le toto o le manu lele leia na tamate i le vai matapuna.

⁷ Ti e fai loa e ia ni afusi e fitu ki le tagata leia e tonu ke fakamea i lona kilia. Ti e fakasa loa e ia kua mea le tagata lena, ti e tuku loa e ia le manu lele mauli ke ano ki le aloalo o le fenua.

⁸ E fo loa e le tagata lena ona kofu, ti e tele loa e ia ona fulufulu fuli, ti e maanu loa a ia ke mea. Ti o feala loa ke ulu a ia ki le nofolaga, kae e nofo loa a ia i fafo o lona falela i ni aso e fitu.

⁹ I le fitu o aso, e toe tele loa e ia ona fului ulu, mo lona kaukava, mo ona tua mata, ti mo ona fulu fuli, ti e toe fo loa e ia ona kofu, ti e toe maanu loa a ia ke mea, ti o mea loa a ia.

¹⁰ I le valu o aso, e too loa e le tagata lena ni akeno lee mele e lua, mo se ovi fafine fetuu tasi mo lee mele, ti mo se moliga nea kai ko kilo falina e iva ala kua lusi ki le lolo ti mo se vaeluai liti lolo.

¹¹ E fakatuu loa e le tagata faisakilifisio leia e fai ia le fakamea, le tagata lena mo ana moliga, i mua o le Eteleno, i le uluaga o le falela tapu.

¹² Ti e too loa e le tagata faisakilifisio le akeno leia e tonu ke momoli ki le sakilifisio fakamalie ti mo le vaeluai liti lolo, ti e momoli loa e ia a nea ana ki le Eteleno.

¹³ E tamate loa e ia le akeno i le ganea leia e tonu ke tamate ai a vikitima ki le fakamolemole ti mo failaulau, i se ganea tapu ; talie i le sakilifisio ki le fakamalie, ofaipe le sakilifisio ki le fakamolemole, e maua loa le vikitima e le tagata faisakilifisio ; ko se nea maokioki lasi a ia.

¹⁴ E too loa e le tagata faisakilifisio se toto o le vikitima o le fakamalie ; ti e pooi loa e ia ki ai le taliga atamai o le tagata leia e fakamea, mo le maikao matua o lona lima atamai mo lona vae atamai.

¹⁵ Ti e too loa e le tagata faisakilifisio le lolo, o liligi se ga lolo ki lona alofilima sema ;

¹⁶ Ti e tooi loa e ia ki ai lona maikao tusi, ti e fai loa e ia ni afusi e fitu i mua o le Eteleno.

¹⁷ Ti e pani loa e ia ki le lolo leia na toe i lona lima le taliga atamai o le tagata lena, mo le maikao matua o lona lima atamai ti mo lona vae atamai, i le ganea leia na pooi ai le toto o le akeno.

¹⁸ Ti e liligi loa e ia le toe o le lolo leia e tuku i lona lima ki le fa ulu o le tagata lena ; ti e fai loa e le tagata faisakilifisio le fakamea, i mua o le Eteleno.

¹⁹ Ti e momoli loa e le tagata faisakilifisio le sakilifisio ki le fakamolemole ; ti e fai loa e ia le fakamolemole ki le tagata leia e fakamea i lona kelekele. Ti ka oki loa a ia, e tuuti loa e le tagata faisakilifisio le ua o le manu ki le failaulau.

²⁰ Ti ka oki loa a ia, e tamate loa e ia le manu o le failaulau. Ti e tutu katoa loa e ia le manu i aluga o le aletale, o fakatasi mo le moliga falina. Ti e fai loa e ia ki le tagata lena le fakamolemole, ti e mea loa a ia.

Fakamea o se tagata kilia mativa

²¹ Kapau e mativa le tagata lena ti e leaise maua e ia se nea leia ke totogi ai a moliga ala e aoga, e too loa e ia se akeno e tasi ki le sakilifisio fakamalie, ti e momoli loa e ia a ia ki le Eteleno o uiga mo lona fakamea. Ti e too loa e ia se moliga nea kai ko kilo falina e tolu ala kua lusi fakatasi mo le lolo, ti mo se vaeluai liti lolo.

²² Ti e toe too loa e ia ni kulukulu e lua pe ko ni lupe e lua, o mulimuli ki le nea leia e maua e ia, ko se tasi ki le sakilifisio o le fakamolemole, ti ko se tasi ki le failaulau.

²³ I le valu o aso, e ave loa e ia a moliga ana ki le tagata faisakilifisio, i le matapa o le falela tapu, i mua o le Eteleno, ki le tootooga o le fakamea.

²⁴ E too loa e le tagata faisakilifisio le akeno mo le lolo, o momoli ki le Eteleno ki le fakatapu masani.

²⁵ E tamate loa e ia le manu, ti e too loa e ia se toto i le toto o le manu, o pooi ki ai le taliga atamai o le tagata lena, mo le maikao matua o lona lima atamai, mo lona vae atamai.

²⁶ Ti e liligi loa e ia se lolo ki lona alofilima sema :

²⁷ Ti e fai loa e ia ki le maikao lasi o lona lima atamai ni afusi e fitu o le lolo i mua o le Eteleno ;

²⁸ Ti e toe pooi loa e ia ki le lolo le taliga atamai o le tagata lena, mo le maikao matua o lona lima atamai, mo lona vae atamai, i le ganea leia na pooi i mua ki le toto o le akeno.

²⁹ Ti e liligi loa e ia le lolo leia e toe i lona lima ki le fa ulu o le tagata lena, ti e fai loa e ia le fakatapu ki lona fakamea i mua o le Eteleno.

³⁰ E too loa e le tagata faisakilifisio se kulukulu pe ko se lupe, o fakalogo ki le nea na avake kiate ia e le tagata lena,

³¹ Ti e momoli loa e ia a ia ki le fakamolemole ; ti e momoli loa e ia le manu lele ki le failaulau, o fakatasi mo le moliga falina. Ti e fai loa e ia ki le tagata lena le fakatapu ki lona fakamea, i mua o le Eteleno.

³² Ko lena le lao ki le fakamea o le tagata leia na kilia ti na leaise maua ia a nea masani ala e tonu ke momoli ki le fakamea.

Fakamea o se fale sekaseka

³³ Na masau loa le Eteleno kia Moisese mo Alone, o pati :

³⁴ Ka kotou ulu loa ki le fenua o Kanaane, leia e kau soli loa kia koutou ke kotou maua, kapau e kau fakaea loa se sekaseka i se fale o lokoutou fenua foou,

³⁵ Ko le tagata leia o ona le fale, e ano loa o fakasa le nea lena ki le tagata faisakilifisio : ko leinei kua kau tio ki se sekaseka i loku fale.

³⁶ Ti e fakatotonu loa e le tagata faisakilifisio ke fakalauatea le fale lena i mua o lana ulu ki ai o tioi le sekaseka ; e fai loa le nea lena o tupu ke aua na kelekele loa a nea fuli ala e tuku i loto o le fale. Ti ka oki, e ulu loa le tagata faisakilifisio ki le fale o tioi a ia.

³⁷ E tioi loa e le tagata faisakilifisio le pulepule : kapau e sa loa i le pulepule ni ga mafaa sesega pe kulakula, o sakinake kua lotou ulu loloto ki le paa o le fale,

³⁸ E ulu loa le tagata faisakilifisio ki fafo, ti e tapono loa e ia le fale i ni aso e fitu.

³⁹ I le fitu o aso, e toe liliu loa le tagata faisakilifisio ki le fale. Kapau e tio loa a ia kua sosolo le pule sekaseka i le paa o le fale,

⁴⁰ E fakatotonu loa e le tagata faisakilifisio ke too a fatu ala kua piki ai le sekaseka, ti ke laku latou ki se ganea kelekele, i fafo o le kolo.

⁴¹ Ti e fakatotonu loa e ia ke ali le fakamomole o paa fuli i loto o le fale, ti ke laku le fakamomole lena ki le ganea kelekele, i fafo o le kolo.

⁴² Ti oki, ti e toe too loa ni iki ake a fatu foou o fetogi ai a uluaki fatu, ti e toe fai loa se tasi ake a sima foou, o toe fakamomole ai le fale.

⁴³ Ti kapau e toe sa loa le sekaseka lena i le fale, i le oki o le too o fatu veveli, mo le ali, ti mo le fakafoou o le fakamomole o paa o le fale,

⁴⁴ E ano loa le tagata faisakilifisio o toe tioi foou a ia : ti kapau kua toe sa maoki le pulepule sekaseka, ti ko le fakasa loa a ia e leaise feala ke toe tamate le sekaseka o le fale ; ti e kelekele loa le fale lena.

⁴⁵ E tonu loa ke maumaui le fale lena, tatau a koga fuli ala e fatu mo koga fuli ala e laakau, ti ke fetuku loa a nea fuli ana mo le sima fakamomole, ki se ganea kelekele, i fafo o le kolo.

⁴⁶ Ti ko leia na ulu ki le fale i lona tapono, e kelekele loa a ia o kaku ki le afiafi.

⁴⁷ Ti ko leia na moe i le fale lena, pe na kai i ai se nea, e fo loa e ia ona kofu.

⁴⁸ Ti kapau, i le oki o lona toe tioi, e tio loa le tagata faisakilifisio e leaise toe sa loa le pule sekaseka i le oki o le fakamomole foou o le fale, ti e fakasa loa e ia e mea le fale lena, talie kua puli le pule sekaseka.

⁴⁹ Ki le tootooga o le fakamea o le fale, e too loa e le tagata faisakilifisio ni manu lele e lua, mo se sete, mo se fului ovi kula, ti mo se isopa.

⁵⁰ Ti e tamate loa e ia se manu lele e tasi i aluga o se ipu kele leia e tuku ai se vai matapuna.

⁵¹ Ti e too loa e ia le sete, mo le isopa, mo le fului ovi kula, mo le lua o manu lele, ti e ukui loa e ia a nea ana ki le toto o le manu lele leia kua tamate ti mo le vai matapuna, ti e fai loa e ia le afusi o le fale lena o tua fitu.

⁵² E fakamea loa e ia le fale ki le toto o le manu lele, mo le vai matapuna, mo le manu lele mauli, mo le sete, mo le isopa, ti mo le fului ovi kula.

⁵³ E tuku loa e ia ke ano le manu lele mauli i fafo o kolo, ki le aloalo o le fenua. Ko lena loa le nea leia ke fai ki le fakamea o le fale, ti e mea loa a ia.

⁵⁴ Ko le lao lena ki kilia kesekese, mo kama kesekese,

⁵⁵ Ti mo kilia o kofu, mo pule sekaseka o fale,

⁵⁶ Ti mo tona, mo fakafufula, ti mo tane :

⁵⁷ E fakasa e ia le temi leia e kelekele ai se nea, pe mea ai a ia. Ko le lao a ia ki le kilia.