Levitiko 12 - Tosi Tapu

Fakamea o le fafine fanau

¹ Na masau loa le Eteleno kia Moisese, o pati :

² Masau ki fanau a Iselaele, o pati kia latou : ka tinae loa se fafine, ti ka fanaui loa e ia se tama, e kelekele loa a ia i aso e fitu ; e kelekele loa a ia ofaipe le temi o lona menise.

³ I le aso valu, e silikosisio loa le toe.

⁴ Ti e toe nofo kelekele loa le fafine i ni iki a aso e kau tolu ke fakamea ai a ia i lona toto ; e leaise lave loa a ia ki se nea leia e tapu, pe ano loa a ia ki le sagatualio, o kaku ki le oki o le temi katoa o lona fakamea.

⁵ Ti kapau e fanaui loa e ia se taine, e kelekele loa a ia i vasaa e lua, ofaipe le temi o lona menise ; ti e nofo loa a ia o fakamea i lona toto i aso e kau ono tupu ono.

⁶ Ti ka oki loa a aso o lona fakamea, tatau fai ki le tama mo le taine, e ave loa e ia ki le tagata faisakilifisio i le matapa o le falela tapu, se akeno fetuu tasi ki le failaulau, ti mo se lupe pe ko se kulukulu ki le sakilifisio o le fakamolemole.

⁷ E ave loa laua e le tagata faisakilifisio ki mua o le Eteleno, ti e fai loa e ia le fakamalie ; ti e mea loa le fafine i lona toto. Ko le lao a ia ki le fafine leia na fanaui ia se tama pe ko se taine.

⁸ Ti kapau e leaise maua e ia se nea leia ke totogi ai se akeno, e too loa e ia ni kulukulu e lua pe ko ni lupe muli e lua, ko se tasi ki le failaulau, ti ko se tasi ki le sakilifisio o le fakamolemole. E fai loa e le tagata faisakilifisio kiate ia le fakamalie, ti e mea loa a ia.