Levitiko 11 - Tosi Tapu

Lao ki manu mea mo manu kelekele

¹ Na masau loa le Eteleno kia Moisese mo Alone, o pati kia laua :

² Kolua masau ki fanau a Iselaele, o pati kia latou : I manu fuli ala e mauli i aluga o le kele, ko nei loa latou ala e feala ke kotou kai.

³ E feala ke kotou kai a manu fuli ala e maua ia ni taga vae paisi lua, ti e kai lamulamu.

⁴ Kae e leaise kotou kai loa a manu ala e maua ia fua ni taga vae paisi lua, pe kai lamulamu fua. Koia kotou tio ai ki manu anei e kelekele : le kamelo, leia e kai lamulamu kae e leaise maua ia ni vae paisi lua, e kelekele loa a ia ;

⁵ Le tamani, leia e kai lamulamu kae e leaise maua ia ni vae paisi lua, e kelekele loa a ia ;

⁶ Le lapino vao, leia e kai lamulamu kae e leaise maua ia ni vae paisi lua, e kelekele loa a ia ;

⁷ Le puaka, leia e maua ia ni vae paisi kae e leaise kai lamulamu, e kelekele loa a ia.

⁸ Ke aua na kotou kai olatou kanofi, ti ke aua na kotou lave fua ki olatou tino mate ; e lotou kelekele.

⁹ I manu fuli ala e mauli i le vai, mo vai tanaki o le fenua, mo le tai, ti mo vaitafe, ko nei a manu ala e feala loa ke kotou kai : E feala ke kotou kai a manu ala e maua ia ni kapoga mo ni unafi.

¹⁰ Kae e kotou fakalialia loa ki manu fuli ala e sala kapoga mo sala unafi, tatau latou ala e totolo i le vai pe mauli i le vai, pe ko atu tai pe ko liua.

¹¹ Kotou fakalialia ki manu ana : aua na kotou kai olatou kanofi ti aua na kotou lave ki olatou tino mate.

¹² Koia kotou fakamamao ai i le kai o manu fuli ala e mauli i le vai, ala e leaise maua ia ni kapoga mo ni unafi.

¹³ I manu lele fuli o le lagi, ko nei latou ala e tonu ke kotou fakalialia ki ai, ti e tonu ke aua na kotou kai loa : le akuila, mo le olefe, mo le akuila tai ;

¹⁴ Le milani, mo le fokoni, ti mo manu fuli ala e kau ki le famili o fokoni ;

¹⁵ Le kolopo mo manu fuli ala e kau ki le famili o kolopo ;

¹⁶ Le otulusi, mo le lulu, mo le gogo, mo le epelevie, ti mo manu fuli ala e kau ki olatou famili ;

¹⁷ Le lulu ikiiki, mo le amatuku, mo le lulu lasi,

¹⁸ Le sini, mo le pelikano, mo le kolomolani,

¹⁹ Le sikoni, mo le eloni, ti mo latou fuli ala e kau ki lona famili, mo le upe, ti mo le peka.

²⁰ Ke kotou fakalialia ki manu lele fuli ala e saele i ni vae e fa.

²¹ Kae e feala loa ke kotou kai a manu lele ala e maua ia ni vae ke soposopo ai i le kele.

²² Ko nei loa a manu lele ala e feala ke kotou kai : Le seseivaka, mo le solami, mo le alekoli, mo le akapi, ti mo manu lele fuli ala e kau ki olatou famili.

²³ Kae e kotou fakalialia loa ki manu lele fuli ala e maua ia ni kapakau mo ni vae e fa.

²⁴ E fakakelekele loa koutou e manu lele ana : ti ko leia e lave loa ki ni manu mate e kelekele loa a ia o kaku ki le afiafi,

²⁵ Ti ko leia e ave ia loa ni manu mate, e fo loa e ia ona kofu ti e kelekele loa a ia o kaku ki le afiafi.

²⁶ Ko nei loa a manu ala e tonu ke kotou iloa e kelekele : ko manu fuli ala e leaise paisi olatou taga vae ti mo latou fuli ala e leaise kai lamulamu : ko leia e lave loa kia latou e kelekele loa a ia.

²⁷ Ti mo manu vae fa fuli ala e saele ki le alofivae : ko leia e lave loa ki le tino o le manu mate e kelekele loa a ia o kaku ki le afiafi,

²⁸ Ti ko leia e ave ia loa se manu mate e fakamea loa e ia ona kofu, ti e kelekele loa a ia o kaku ki le afiafi.

²⁹ I manu ala e totolo i le kele, ko nei loa latou ala e tonu ke kotou iloa e kelekele : ko le tope, mo le kimoa, mo pili kesekese fuli,

³⁰ Le pili pipiki, mo le pili uli, mo le pili sega, mo le pili o le one, mo le kameleoni.

³¹ Ke kotou iloa ko manu ana e kelekele : ti ko leia e lave loa ki se manu mate e kelekele loa a ia o kaku ki le afiafi.

³² Ko nea fuli ala e vilo loa ki ai se manu mate, ofaipe se ipu laakau, pe se kofu, pe se kilii manu, pe se kete, pe se kulo, e kelekele loa a ia o kaku ki le afiafi, ti o toe mea loa a ia.

³³ Ko nea fuli ala e tuku i se ipu kele leia na vilo loa ki ai se nea kelekele, e kelekele loa, ti e tonu ke kotou maumaui loa le ipu kele.

³⁴ Ti kapau e liligi loa se vai leia na tuku i le ipu lena ki se nea kai leia e taga lona kai, e kelekele loa le nea kai lena ; ti kapau ko se nea inu leia e taga lona inu, e kelekele loa a ia, logo ai le mea o le nea leia na liligi a ia ki ai.

³⁵ Ko nea fuli ala e vilo loa ki ai se manu mate i manu fuli ana, e kelekele loa : ti kapau ko se gutuumu pe ko se tekiaga kulo, e tonu loa ke maumaui a ia talie kua kelekele a ia.

³⁶ Kae kapau e vilo loa se manu mate ki se matapuna pe ko se fa tane, e mea loa le vai, kae e kelekele loa leia e too ia loa le manu mate.

³⁷ Ti kapau e vilo loa se manu mate ki se pulapula leia e tonu ke to, e mea loa le pulapula a ia.

³⁸ Kae kapau e vilo loa a ia ki se pulapula leia na fakavai ke kai, e kelekele loa a ia.

³⁹ Ti kapau e mate loa se manu leia e feala ke kai, e kelekele loa leia e lave loa ki ai o kaku ki le afiafi.

⁴⁰ Ti ko leia e kai loa ki lona kanofi e fakamea loa e ia ona kofu, ti e kelekele loa a ia o kaku ki le afiafi ; ti e tatau mo leia e ave ia loa le manu mate, e fakamea loa e ia ona kofu, ti e kelekele loa a ia o kaku ki le afiafi.

⁴¹ Ke aua na kotou kai a manu fuli ala e totolo i aluga o le kele.

⁴² Ke aua na kotou kai a manu ala e totolo i olatou manava i aluga o le kele, ti mo latou ala e saele i ni vae e fa pe toe lasi atu.

⁴³ Ke aua na kotou fakafeofi ki se manu mate i manu ana, o kotou kavaia loa i ai, talie e kotou kelekele loa. Ti ke aua na kotou tuku a manu ana ke fakafeofi atu kia koutou, o feala ke kotou kavaia loa i ai, talie e kotou kelekele loa.

⁴⁴ Talie ko au ko le Eteleno, ko lokoutou Atua ; e kotou maokioki loa, talie e kau maokioki ; ti aua na kotou kelekele loa i se manu i manu fuli ana ala e totolo i aluga o le kele.

⁴⁵ Talie ko au ko le Eteleno, leia na fakamavae ia koutou mei le fenua o Esipito, o tupu ke kau liliu ko lokoutou Atua ; ke kotou maokioki talie e kau maokioki.

⁴⁶ Ko le lao lena ki manu o le kele, mo manu lele o le lagi, mo manu o le tai, ti mo manu totolo i aluga o le kele,

⁴⁷ O tupu ke kotou iloa kesekese ai a manu ala e mea mo manu ala e kelekele, a manu ala e feala ke kai mo manu ala e leaise feala ke kai.