Kolose 3 - Tosi Tapu

Le mauli foou ia Kilisito

¹ Koia kapau kua kotou toe tuuake mo Kilisito, kotou afa a nea o aluga, i le ganea leia kua nofo ai Kilisito i le lima atamai o le Atua.

² Kotou pipiki ki nea o aluga, kae aua ki nea ala i le malama nei.

³ Talie kua kotou mate, ti kua fufu lokoutou mauli mo Kilisito i le Atua.

⁴ Ka sa mai loa Kilisito, ko lokoutou mauli, e kotou sa loa mo ia i le kololia.

⁵ Koia ke kotou tamate le nea leia, i okoutou koga tino, e kau ki le malama nei, le fai feauaki, mo le aga fakakelekele, mo oli fakavale, mo oli veveli, ti mo le manumanu, leia ko se tausi taulaatua.

⁶ Talie ko nea ana e tupu ai le vilo o le sausau o le Atua ki vosa o le patigataa ;

⁷ ala na kotou saele ai foki i mua, i le temi leia na kotou mauli ai i agasala ana.

⁸ Kae i le temi nei, ke kotou fakafiti ki nea fuli ana, ki le itaita, mo le masau makeke, mo le agaveli, mo le fatufatu, ti mo masau veveli ala e feala ke au mei okoutou gutu.

⁹ Aua na kotou feloiaki, talie kua kotou tiaki le tagata afea mo ana gaoi,

¹⁰ ti kua kotou kofu le tagata foou leia e fakafoou i le poto o mulimuli ki le paaki o leia na fakatupu ia a ia.

¹¹ Koia e leaise i ai se Keleka i leinei pe ko se Sutea, mo se tagata silikosisio pe ko se lee silikosisio, mo se matapule pe ko se Site, mo se tagata popula pe ko se tagata lauatea ; kae ko Kilisito fuai i tagata fuli.

¹² Koia ko koutou, ofaipe se kau filifiliia a le Atua, kua maokioki mo alofaina, ke kotou kofu ni manatu loto o le manavaalofa, mo le agamalie, mo le fakataulalo, mo le agamalu, ti mo le kataki.

¹³ Ke kotou fekatakiaki i okoutou vasaa, ti kapau e mamae se tasi ki se tasi i se nea, ke kotou fefakamolemoleaki. Ke kotou fakamolemole foki ofaipe Kilisito leia na fakamolemole kia koutou.

¹⁴ Kae i aluga o nea fuli ana, kotou kofu le alofa, leia ko le sai o le malie tukupau.

¹⁵ Ti ke pule i okoutou loto le tokamalie o Kilisito, leia na kalagai koutou ki ai ke kotou fau se tino e tasi. Ti ke kotou loto fakafetai.

¹⁶ Ke nofo mau ia koutou le folafola a Kilisito i lona mou koloa katoa ; ke kotou feakonakiaki ti mo fetokoiaki i le poto katoa, ki ni pesalemo, mo ni imi, ti mo ni katiko fakalaumalie, o sua ki le Atua i lokoutou loto o tupu ko le kalasia.

¹⁷ I nea fuli ala e kotou fai, i masau mo gaoi, ke kotou fai fuli latou i le suafa o le Aliki Sesu, o fakafetai iate ia ki le Atua le Tamana.

Le mauli foou o le famili

¹⁸ Fafine avaga, kotou fakataulalo ki okoutou avaga, talie e malie le nea lena i le Aliki.

¹⁹ Tagata avaga, kotou alofa ki okoutou avaga, ti aua na kotou fakaitaita kia latou.

²⁰ Fanau, kotou fakalogo i nea fuli ki okoutou matua, talie e malie le nea lena ki le Aliki.

²¹ Tamana, aua na kotou fakakaekae akoutou fanau, talie ke aua na lotou loto gaegae.

²² Tagata fakasausau, kotou fakalogo i nea fuli ki okoutou pule i le kanofi, o leaise gato fua i olatou mua, o sakinake ke fakamatamalie ki tagata, kae i le loto faigaofie, o i ki le Aliki.

²³ Ko nea fuli ala e kotou fai, ke kotou fai latou i le loto malie, ofaipe ki le Aliki, kae leai ki ni tagata,

²⁴ o kotou iloa e kotou tali loa mei le Aliki le totogi ko le tofiga. Kotou tausi kia Kilisito, ko le Aliki.

²⁵ Talie ko leia e leaise agatonu i lana gaoi e tali ia loa o mulimuli ki lona lee agatonu, talie e leaise fakapalatasi ki le kakai.