Kolose 2 - Tosi Tapu

Tupu tagata o le Atua ia Kilisito

¹ Koia, e kau loto ke kotou iloa le lasi o le tau leia e kau fai o tupu ko koutou, ti mo latou ala e nofo i Laotise, ti mo latou fuli ala e leikiaise tio ki oku mata,

² o tupu ke apele olatou loto i le fakapelepele, ke lotou pipiki tasi i le alofa, ti ke lotou mou koloa i se atamai apele ke iloa le misitelio o le Atua, ko Kilisito,

³ misitelio leia e fufu ai a koloa fuli o le poto ti mo le iloa.

Valoki o akonaki loi

⁴ E kau fakasa le nea lena o tupu ke aua na kakai koutou e se tasi ki ni masau logologomalie.

⁵ Talie, kapau e kau puli i le tino, e kau nofo mo koutou i le laumalie, o tio mo fiafia ki le tokamalie leia e maua ia koutou, ti mo le makeke o lakoutou tui kia Kilisito.

⁶ Koia o tupu kua kotou tali le Aliki ko Sesu-Kilisito, kotou saele iate ia,

⁷ o tauaka mo fakatafito iate ia, mo tuu makeke i le tui, o mulimuli ki akonaki ala kua tuku atu kia koutou, ti mo tuputupua i le fakafetai.

Valoki o le filosofia mo le tausi fakalao

⁸ Kotou tokaga na fakasesei koutou e se tasi ki le filosofia ti mo se masau noa, o fanaki ki le talatisio a tagata, ti mo makeke fakalaumalie o le malama nei, kae leai kia Kilisito.

E maua nea fuli ia Kilisito

⁹ Talie e nofo fakatino iate ia le apeleaga katoa o le Atua.

¹⁰ E kotou maua nea fuli o apele iate ia, leia ko le ulu o pule fuli ti mo makeke fuli.

¹¹ Ti kua silikosisio foki koutou iate ia ki se silikosisio leia na leaise fai e le lima o tagata, kae ki le silikosisio a Kilisito, leia ko le fakamativa o le tino fakakanofi :

¹² Ti kua tanu fakatasi koutou mo ia i le papitema, ti kua kotou toe tuuake foki iate ia ti mo ia, i le tui ki le mafimafi o le Atua, leia na toe fakatuuake ia a ia mei le kau mate.

¹³ Ko koutou, ala na mamate i akoutou agasala ti mo le lee silikosisio o lokoutou kanofi, kua fakamauli fakatasi e ia koutou mo ia, i lana fakamolemole atatou agasala fuli ;

Na fakasoko e Kilisito a tausi fuli o le lao

¹⁴ Ti kua soloi e ia le tosi lima leia na tuu ai a nea fuli ala na tuku kia tatou, ti na taofi kia tatou ; ti kua fakapuli e ia a ia, o tutuki a ia ki le koluse ;

¹⁵ Ti kua maumaui e ia i le nea lena le makeke o le kau pule mo le kau makeke, ti kua tuku e ia latou ke manogii e le kakai, i lana malo ia latou i le koluse.

¹⁶ Koia, ke aua na fakamaau kotou e se tasi i le nea kai mo le nea inu, pe i se aso lasi, pe i se masina foou, pe i se sapato :

¹⁷ Ko nea fuli ana ko le ata o nea ala ka soko mai, kae ko le tino ko Kilisito.

Valoki o le atolasio mo le tausi ki aselo

¹⁸ Ke aua na kakai koutou e se tasi i le totogi o le makape, ki se agamalu i tafa ti mo se tausi ki le kau aselo ; talie e makita a ia i le fia nealasi vaiga i ana tio fakalaumalie, ti mo ana manatu fakakanofi,

¹⁹ kae e leaise pipiki a ia ki le ulu, leia e fagai ia mo fakatasi ia le tino katoa i ona sokoga mo ona nonoa, ti e tuku ia kiate ia le tutupu o mulimuli ki lona finegalo.

Valoki o sesunio mo fakamamae

²⁰ Kapau kua kotou mate mo Kilisito ki lao noa o le malama nei, kolea, o sakinake koi kotou mauli i le malama nei, e fakamaua ai kia koutou a lekula anei :

²¹ Aua na ke lave ! Aua na ke kai ! Aua na ke milisi !

²² lekula ala e liliu fuli o veli i le fakaaoga tuumau, ti e fakatafito fua ki ni fakatotonu mo ni akonaki a tagata ?

²³ E maoki, e lotou mata fakapotopoto, talie e lotou masau ki se fia lotu, mo se agamalu, ti mo se fakamamae o le tino ; kae e leai sona aoga, gato fua ki le fakafimalie o le kanofi.