Kolose 1 - Tosi Tapu

Fakaalofa

¹ Ko au Paulo, ko le apositolo a Sesu-Kilisito i le finegalo o le Atua, ti mo le taina ko Timoteo,

² ki le kau maokioki mo fetaina agatonu ia Sesu-Kilisito ala e nonofo i Kolose : Ko le kalasia mo le tokamalie ke soli atu kia koutou e le Atua ko lotatou Tamana !

Fakafetai mo le kole a Paulo

³ E ma fakafetai ki le Atua, le Tamana o lotatou Aliki ko Sesu-Kilisito, ti e leaise toe gato lama ulufaki koutou,

⁴ talu mei lama logo ki lakoutou tui kia Sesu-Kilisito ti mo lokoutou alofa ki le kau sagato fuli,

⁵ o tupu ko le amanaki malie leia kua taofi atu ma koutou i le atu lagi, ti kua fakasa atu kia koutou i mua e le folafola o le maoki, le folafola o le Evaselio.

⁶ Kua kaku atu a ia kia koutou, ti mo le malama nei katoa ; ti kua fua a ia, ti kua mafola a ia, o fai foki pe koutou, talu mei le aso leia na kotou logo ai mo iloa ai le kalasia o le Atua i le maoki,

⁷ o mulimuli ki le akonaki leia kua kotou tali meia Epafalasi, loma kaukau nea alofaina i le gaoi, leia ko se tagata fakasausau agatonu a Kilisito kia koutou,

⁸ ti na fakasa mai e ia kia maua le lasi o lokoutou alofa i le Laumalie.

⁹ Koia ko maua foki, talu mei le aso leia na ma logo ai ki le nea lena, e leaise koi gato lama faikole ki le Atua o uiga mo koutou ; e ma kole ke kotou apele i le iloa o lona finegalo, i le poto katoa ti mo le atamai fakalaumalie,

¹⁰ o tupu ke kotou saele o gali mo le Aliki, ti ke kotou malilie kiate ia i nea fuli, ti ke kotou maua ia ni fua o lasi i gaoi malilie kesekese, ti ke kotou tupu o lasi i le iloa o le Atua,

¹¹ ti ke fakamakeke koutou e lona makeke fakakololia, o tupu ke kotou matatali ia a nea fuli i le fiafia, ti ke kotou kataki fualoa tuumau.

¹² Kotou fakafetai ki le Tamana, leia kua mafai ai ke kotou kau i le tofiga o le kau sagato i le malama ;

¹³ leia kua saofaki ia tatou mei le makeke o le fakapouli ti kua siki ia tatou ki le puleaga o lona Alo alofaina,

¹⁴ leia e tou maua ai le totogi, ti mo le fakamolemole o agasala.

Tauaga kese o Kilisito

¹⁵ Ko le Alo ko le paaki a ia o le Atua leia e leaise tou tio mata ki ai, ko le uluaki tupu a ia o nea fuli kua fakatupu.

¹⁶ Talie na fakatupu e ia a nea fuli, ala i le atu lagi ti mo la i le malama nei, mo nea ala e sa ti mo nea ala e leaise sa, pe ko nofoaga sau, pe ko nofoaga fakaaliki, pe ko le kau makeke, pe ko le kau pule. Na fakatupu e ia a nea fuli ma ana.

¹⁷ E mua a ia i nea fuli, ti e tuu mau a nea fuli iate ia.

¹⁸ Ko le ulu a ia o le tino, o le Ekelesia ; ko le kamataaga a ia, ko le uluaki tupu a ia mei le kau mate, o tupu ke uluaki a ia i nea fuli.

¹⁹ Talie na loto le Atua ke nofo a apeleaga fuli iate ia ;

²⁰ ti na loto a ia ke fakatokatoka iate ia a nea fuli mo ia totonu, tatau a nea ala i le malama nei ti mo nea ala i le lagi, o fai le tokamalie iate ia i le toto o lona koluse.

²¹ Ti ko koutou, ala na matapule mo fili i mua o tupu ko akoutou manatu mo akoutou gaoi veveli, kua fakatokatoka e ia koutou i le aso nei i lona mate i le tino o lona kanofi,

²² o tupu ke fakatuu e ia koutou i ona mua kua maokioki, mo lee mele, ti mo sala valoki,

²³ mo kapau e kotou tuu mau i le tui, o leaise kotou maliu kese mei le amanaki malie o le Evaselio leia kua kotou logo ki ai, leia kua fakasa ki tagata fuli i le lalo lagi, ti kua fakanofo ai au, Paulo, ko lana tagata gaoi.

Le tau a le apositolo

²⁴ E kau fiafia i le aso nei i oku mamae o tupu ko koutou ; ti ko le nea leia e puli i mamae o Kilisito, e kau fakakatoa a ia i loku kanofi, o tupu ko lona tino, ko le Ekelesia.

²⁵ Ti kua fakanofo au ko le tagata gaoi o le Ekelesia lena, o mulimuli ki le kavega leia kua tuku mai e le Atua kiate au, o tupu ko koutou, o tupu ke kau fakasa le folafola katoa a le Atua,

²⁶ le misitelio leia na fufu i temi fuli ki tautupu fuli, kae kua fakasa i le aso nei ki lana kau maokioki.

²⁷ Na finegalo le Atua ke fakasa kia latou le koloa fakakololia o le misitelio a ia i lotolotoga o le kau pagani, ke iloa : Kilisito ia koutou, ko le amanaki malie o le kololia.

²⁸ Ko ia leia e ma fakasa, o kole ki tagata fuli, ti mo akonakii tagata fuli i le poto katoa, o tupu ke ma momoli ki le Atua a tagata fuli kua malie tukupau ia Kilisito.

²⁹ Ko le nea lena e kau gaoi foki ki ai, o tau i lona makeke leia e gaoi makeke iate au.