Kalate 6 - Tosi Tapu

Fakatuutuu ki le mauli fakakilisiteano

¹ Fetaina, kapau e maua atu se tasi kua sala, ko koutou ala e fakalaumalie, kotou fakatonutonu a ia i se loto agamalu. Tokaga kiate koe totonu, talie ke aua na toe fakasalai foki mo koe.

² Kotou feamoaki a koutou kavega, ti e kotou fakasoko loa i ai le lao a Kilisito.

³ Kapau e manatu se tasi ko se tasi a ia, kae ko se nea noa a ia, e kakai e ia a ia totonu.

⁴ Kae ke tasi asiasii e le tagata ana gaoi totonu, ti o feala loa ke fakakololia a ia iate ia toka tasi, kae leai i se tasi ake,

⁵ talie e tasi amo loa e le tagata lana kavega totonu.

⁶ Ko leia e akonaki ki ai le folafola, ke soli e ia se vaega i ana nea fuli ki leia e akonaki.

⁷ Aua na kotou fai sala i le nea lena : e leaise gologolo ki le Atua. Ko le nea leia e muluki e se tagata, e toe utu loa e ia a ia.

⁸ Ko leia e muluki ia i lona kanofi e utu loa e ia mei le kanofi le pala ; kae ko leia e muluki ia i le Laumalie e utu loa e ia mei le Laumalie le mauli lee gato.

⁹ Aua na tou kaekae i le fai o le nea leia e malie ; talie e tou utu loa i lona temi totonu, mo kapau e leaise tou fakagaegae.

¹⁰ Koia, i le koi tou maua ia le faigamalie, tou fai le nea leia e malie ki tagata fuli, kae tafito ki fetaina i le tui.

¹¹ Kotou tio ki le lalasi o matai tosi ala e kau fai tosi atu ai i loku lima totonu.

¹² Ko latou fuli ala e fia mata malie ki le tagata e fakamaua ia koutou ke silikosisio, o tupu fua ke aua na fakavelivelii koutou o tupu ko le koluse o Kilisito.

¹³ Talie e leaise fai e le kau lee silikosisio totonu le lao ; kae e lotou loto ke silikosisio koutou, o tupu ke lotou fakakololia i lokoutou tino.

¹⁴ Kae kiate au, e mamao meiate au le manatu ke kau fakakololia i se tasi ake a nea kese, kae i le koluse o lotatou Aliki ko Sesu-Kilisito, leia kua tutuki ki ai le malama nei kiate au, ofaipe au kua tutuki ki le malama nei.

¹⁵ Talie ia Kilisito e leaise aoga le silikosisio mo le lee silikosisio ; ko le nea leia e aoga ko le liliu ko se nea kua tupu foou.

¹⁶ Tokamalie mo manavaalofa kia latou fuli ala e mulimuli loa ki le lekula lena, ti mo le Iselaele o le Atua !

¹⁷ Koia ke aua na fakamamae loku loto e se tasi, talie e kau maua i loku tino a fakamailoga o Sesu.

¹⁸ Fetaina, ke nofo le kalasia o lotatou Aliki ko Sesu-Kilisito i okoutou laumalie ! Amene !