Kalate 3 - Tosi Tapu

E faitotonu le tagata i le tui ata, sala gaoi o le lao

¹ Ei kau Kalate valelea ! Ko ai lena kua fakauluvalea ia koutou, ke aua na koutou fakalogo ki le maoki, koutou ala na fakasa tautonu ki okoutou mata a Sesu-Kilisito leia na tutuki i le koluse ?

² Ko leinei fua le nea e tasi leia e kau fia ilo ki ai : Pe na kotou tali le Laumalie Maokioki o tupu ko gaoi o le lao, pe tupu ko le akonaki o le tui ?

³ Pe kua kotou valelea lasi ai ? I le oki o lakotou kamata i le Laumalie Maokioki, pe kua kotou loto i le temi nei ke kotou fakaoki i kanofi ?

⁴ Pe na kotou kataki noa a mamae fuli ? Mo kapau e feala ke noa a ia !

Ko le sai mo Apalaamo ko se sai o le tui

⁵ Ko leia e soli atu ia kia koutou le Laumalie, ti mo fakasoko ia ni milakulo ia koutou, pe fai e ia a nea ana o tupu ko gaoi o le lao, pe tupu ko le akonaki o le tui ?

⁶ Ofaipe le tui a Apalaamo ki le Atua, ti na lau loa a ia kiate ia ko le faitotonu,

⁷ ke kotou iloa foki ko latou ala e maua ia le tui ko vosa latou o Apalaamo.

⁸ Koia i le iloa fakatomua e le Tosi e fakamatatonu loa e le Atua le kau pagani ki le tui, na fakasa fakatomua e ia kia Apalaamo le logo malie leinei : E tapuakina loa a puleaga fuli iate koe !

⁹ Koia, ko latou fuli ala e tui e tapuakina loa mo Apalaamo, le tagata tui.

Ko leia e pipiki ki gaoi o le lao e nofo i le malaia o le lao

¹⁰ Talie ko latou fuli ala e pipiki ki gaoi o le lao e nonofo i le malaia ; talie e tosi : Malaia leia e leaise tausi ia a nea fuli ala e tosi i le tosi o le lao, ti e leaise fai ia latou.

¹¹ Ti e matala malie foki, e leaise fakamatatonu se tasi i mua o le Atua e le lao, talie e tuu i le Tosi : E mauli loa le tagata faitotonu i le tui.

¹² Ti e kese foki le lao mo le tui ; kae e pati le lao : ko leia e fai ia loa a nea fuli ana e mauli loa i ai.

Na amo e Kilisito le malaia o le lao

¹³ Na totogi tatou e Kilisito mei le malaia o le lao, o liliu a ia ko se malaia o tupu ko tatou - talie e tuu i le Tosi : Malaia leia e tautau i le laakau -

¹⁴ o tupu ke fakasoko le tapuaki a Apalaamo ki le kau pagani ia Sesu-Kilisito, ti ke tou tali i le tui le Laumalie leia na fakapapau mai.

¹⁵ Fetaina, (e kau masau ofaipe tagata), ka fai e se tagata se fakapapau o mulimuli ki lekula totonu, logo ai e fai a ia e se tagata, kae leaise toe soloi a ia e se tasi, ti e leaise toe teki e se tasi se nea ki ai.

¹⁶ Ko leinei, na fai a fakapapau kia Apalaamo mo lona sakoga. Na leaise pati : mo ona sakoga, o sakinake na mauke ni sakoga, kae ko le sakoga fai e tasi : ti ki lou sakoga, ko lona uiga kia Kilisito.

Na leaise toe teki e le lao se nea foou ki le sai mo Apalaamo

¹⁷ Ko leinei le nea leia e kau fia fakasa ia : Ko se sai leia kua fakamaoki e le Atua i mua, e leaise mafai ke toe soloi a ia, ti e leaise toe mafai foki ke fakanoai le fakapapau leia e muli i ai, e le lao leia na tuku kae kua sili ki ai fetuu e kau lelau fa kau tolu.

¹⁸ Talie kapau e au le tofiga mei le lao, ti e leaise toe au loa a ia mei le fakapapau ; talie na soli le tofiga e le Atua kia Apalaamo i le fakapapau.

Ko le gaoi a le lao ko le tautea mo le teuteu

¹⁹ Kolea na soli ai le lao ? Na soli mai a ia ki le fakapapau o tupu ke iloa ai a agasala ki le finegalo o le Atua : na tonu ke tuu a ia o kaku ki le kaku mai o le sakoga o Apalaamo leia na fai ki ai le fakapapau ; na tuku le lao lena e ni aselo ki lima o se tagata fakasoko pati.

²⁰ Kae ko le tagata fakasoko pati e leaise ko se fakasoko pati o se toka tasi, kae ko le Atua i lana fakapapau kia Apalaamo na toka tasi a ia.

²¹ Pe fakafesagai le lao ki fakapapau a le Atua ? E leai ai ! Ka na soli mai se lao leia e mafai ke soli ia le mauli, e au maoki loa le faitotonu mei le lao.

²² Kae na fakasa e le Tosi e taomi le malama nei katoa e le agasala, o tupu ke soli le nea leia na fakapapau i le tui kia Sesu-Kilisito kia latou ala e tui.

²³ I mua o le kaku mai o le tui, na leoleo tatou i le pilisoni e le lao, o talitali ki le tui leia e tonu ke fakasa.

²⁴ Ti na fai le lao pe se tagata fai sekola ke takitaki ia tatou o kaku kia Kilisito, o tupu ke fakamatatonu tatou e le tui.

E tupu le maokioki o le kilisiteano i le kalasia kae leai i le lao

²⁵ I le kaku mai o le tui, e leaise koi tou nonofo loa o fakalogo ki le tagata fai sekola lena.

Ko leia kua tui e liliu ko se vosa i le famili o le Atua

²⁶ Talie ko vosa fuli koutou o le Atua i le tui kia Sesu-Kilisito ;

²⁷ Ko koutou fuli, ala kua papitema ia Kilisito, kua kotou kofu Kilisito.

²⁸ E leaise koi i ai se Sutea, pe ko se Keleka ; e leaise koi i ai se tagata popula pe lauatea ; e leaise koi i ai se tagata pe ko se fafine ; talie kua kotou liliu fuli ko se nea e tasi ia Sesu-Kilisito.

²⁹ Ti kapau e kotou kau kia Kilisito, ti ko le sakoga loa koutou o Apalaamo, ko fanau mau tofiga o le fakapapau.