Kalate 2 - Tosi Tapu

Felavei a Paulo mo le kau apositolo i Selusalemi

¹ Ti na sili fetuu e kau agafulu tupu fa, na kau toe pale loa ki Selusalemi mo Palenapa, ti na kau ave foki mo Tito.

² Ti na kau pale loa ki ai i se levelasio. Ti na kau fakamatala loa kia latou le Evaselio leia e kau akonaki ki le kau pagani ; ti na kau fakamatala tafito a ia kia latou ala e logologona, o tupu ke aua na ano noa laku makape i le temi nei mo le temi kua sili.

³ Kae ko Tito, leia na nofo mo au, leia na Keleka foki, na leaise fakamaua loa ke silikosisio.

⁴ Ti ko le nea lena o tupu ko fetaina loi ala na ulu fakafufu mai kia matou, o lama le mauli lauatea leia kua motou maua ia Sesu-Kilisito, mo le manatu ke lotou fakapopulai matou.

⁵ Kae na leaise motou gaegae fua i se ga temi ia latou, ti na motou taui alatou tonu makeke, o tupu ke taofi le maoki o le Evaselio ia koutou.

⁶ Ko latou ala e logologona - e leaise mauiga kiate au olatou anoaga totonu : talie e leaise fakapalatasi le Atua - ko latou ana na logologona na leaise fakamaua ia mai kiate au se nea.

⁷ Kae, i lalatou tio kua tuku mai kiate au le Evaselio ki le kau lee silikosisio, ofaipe le tuku kia Petelo o leia ki le kau silikosisio -

⁸ talie ko leia na fakanofo ia Petelo ko le apositolo ki le kau silikosisio na toe fakanofo ia foki au ko le apositolo ki le kau pagani -

⁹ Ti i lalatou iloa le kalasia leia kua tuku mai kiate au, ko Sakopo, mo Kefasi, ti mo Soane, ala e pati ko pou tafito, na soli ia mai loa kiate au mo Palenapa le lima atamai, o tupu ke ma ano ki le kau lee silikosisio, kae ko latou ki le kau silikosisio.

¹⁰ Ti na lotou kole mai fua ke ma manatui le kau mativa ; ti na kau tokaga ai o fai le nea a ia.

Fakafesagai a Paulo kia Petelo i Atiokia

¹¹ Kae i le au loa a Kefasi ki Atiokia, na kau tuu loa ki aluga o valoki a ia, talie na tonu ke valoki a ia.

¹² Talie i mua o le kaku mai o ni iki meia Sakopo, na kai a ia mo le kau pagani, kae i lalatou kaku mai, na sola loa a ia o tuu kese, i lona i ki le kau silikosisio.

¹³ Ti na fai fakamalualoi loa mo ia le toega o le kau Sutea ; koia na toe pikiia ai foki mo Palenapa i lalatou malualoi.

¹⁴ I laku tio na leaise lotou saele fakasako i le maoki o le Evaselio, na kau pati loa kia Kefasi i mua o latou fuli : Kapau ko koe leia e Sutea, e ke fai o fakatatau ki le aga a le kau pagani, kae leai ki le aga a le kau Sutea, kolea e ke fakamakeke ai le kau pagani ke fai o fakatatau ki le kau Sutea ?

Kua mate le kilisiteano ki le lao ; kua oki lona fakamaau i le fai

¹⁵ Ko tatou, e tou Sutea i le tupu, kae e leaise ko le kau agasala tatou o atu puleaga pagani.

¹⁶ Kae, i le iloa e leaise fakamatatonu le tagata i mua o le Atua ki gaoi o le lao, kae ki le tui kia Sesu-Kilisito, ko tatou foki kua tou tui kia Sesu-Kilisito, o tupu ke fakamatatonu tatou ki le tui kia Kilisito kae leai ki gaoi o le lao, talie e leaise fakamatatonu loa se tasi ki a gaoi o le lao.

¹⁷ Ti kapau, i latatou lolotoga afa ke fakamatatonu tatou ia Kilisito, kua maua tatou ko le kau agasala, pe kua liliu ai Kilisito ko se tagata gaoi a le agasala ? Leai ai !

¹⁸ Talie, kapau e kau toe fakatuu a nea ala na kau maumaui, e kau fakaliliu a au totonu ko se tagata maumau lao.

¹⁹ Talie ko le lao leia kua kau mate ai ki le lao, o tupu ke kau mauli ki le Atua.

Ko le mauli fakakilisiteano ko le fakasa o le mauli o Kilisito

²⁰ Kua tutuki au ki le koluse mo Kilisito, ti kapau e kau mauli, e leaise ko au leia e mauli, ko Kilisito leia e mauli iate au ; ti kapau e kau mauli i le temi nei i le kanofi, e kau mauli i le tui o le Alo o le Atua, leia na alofa kiate au, o soli e ia a ia o tupu ko au.

Ko le filo o le lao mo le kalasia e fakanoa ia le kalasia

²¹ E leaise kau fakafiti ki le kalasia o le Atua ; talie kapau e maua le faitotonu i le lao, ti na leaise uiga o le mate o Kilisito.