Kalate 1 - Tosi Tapu

Fakaalofa

¹ Ko au Paulo, ko le apositolo, leai mei tagata, pe i se tagata, kae meia Sesu-Kilisito ti mo le Atua le Tamana, leia na fakatuuake ia a ia mei le kau mate,

² ti mo fetaina fuli ala e nonofo mo au, ki Ekelesia o Kalatia :

³ Ke soli atu kia koutou le kalasia mo le tokamalie e le Atua ko le Tamana ti mo le Aliki ko Sesu-Kilisito,

⁴ leia na soli ia a ia o tupu ko atatou agasala, ti ke taaki ai tatou mei le sekulo veli leinei, o mulimuli ki le finegalo o lotatou Atua mo Tamana,

⁵ leia e tuku ki ai le kololia i sekulo mo sekulo ! Amene !

Tiaki o le Evaselio maoki e le kau Kalate

⁶ E kau punamauli i lakoutou titua vave ai ki leia na kalagai ia koutou i le kalasia o Kilisito, o fakalaka ki se tasi ake Evaselio.

⁷ Ko le maoki e leaise tasi ake Evaselio, kae e i ai ni iki ala e fakamamae ia koutou, ti e lotou loto ke fetogi le Evaselio a Kilisito.

⁸ Kapau ko matou totonu, kapau na fakasa e se aselo mei lagi se evaselio kae e leaise ko leia na motou akonaki atu kia koutou, ke anateme a ia !

⁹ Kua motou fakasa a ia i mua, ti e kau toe liuga atu a ia i le ola leinei : Kapau e fakasa atu e se tasi se Evaselio kese kia koutou kae e leaise ko leia kua kotou tali, ke anateme a ia !

¹⁰ Ti ko leinei, pe ko le alofa o tagata leia e kau oli ki ai, pe ko leia o le Atua ? Pe kau afa ke kau mata malie ki tagata ? Kapau koi kau mata malie ki tagata, ti e leaise ko le tagata fakasausau loa au a Kilisito.

Tafoki mo le vokasio o Paulo

¹¹ E kau fakapapau atu kia koutou, fetaina, ko le Evaselio leia na kau akonaki ia na leaise au mei se tagata ;

¹² talie na leaise kau tali a ia pe na kau ako a ia mei se tagata, kae meia Sesu-Kilisito leia na sa mai kiate au.

¹³ Talie kua kotou logo ki laku nofo i mua i le lotu fakasutea, mo laku fakavelivelii le Ekelesia o le Atua, ti mo laku maumaui a ia ;

¹⁴ Ti mo laku fakalaka mamao i le tausi ki le lotu fakasutea i se toka api o loku tautupu mo loku kakai, talie na kau tausi malie ake ia latou ki talatisio o oku tamana.

¹⁵ Kae, i le finegalo malie o le Atua, leia na vaei kese ia au i le manava o loku tinana, leia na kalagai ia au i lona kalasia,

¹⁶ ke fakasa lona Alo iate au, o tupu ke kau fakasa a ia i le kau pagani, na leaise kau afa fua se tokoi ki se kanofi mo se toto,

¹⁷ ti na leaise kau pale fua ki Selusalemi, kia latou ala na apositolo i oku mua, kae na kau ano ki Alapia ; ti na kau toe liliu mai ki Tamaso.

¹⁸ Ti na sili fetuu e tolu, na kau pale loa ki Selusalemi o feiloaaki mo Kefasi, ti na kau nofo i aso e kau agafulu tupu lima i lona kaiga ;

¹⁹ kae na leaise kau tio ki se tasi ake o le kau apositolo, gato fai kia Sakopo, le taina o le Aliki.

²⁰ I le nea leinei e kau tosi atu kia koutou, ko leinei, i mua o le Atua, e leaise kau loi fua.

²¹ Ti na sili a ia, na kau ano loa ki fenua o Silia mo Silisia.

²² I le temi lena, na leikiaise iloa oku mata e Ekelesia o Sutea ia Kilisito ;

²³ kae na gato fai i lalatou logo ki le pati : Ko leia na fakaveliveli kia tatou i mua e fakamafola e ia i le temi nei le tui leia na faiga a ia ke maumaui.

²⁴ Ti na lotou fakakololia loa ki le Atua o tupu ko au.