Gaoi 7 - Tosi Tapu

Akonaki a Setefano

¹ Ti na pati loa le pule faisakilifisio : Pe maoki a nea anei ?

² Ti na tali loa Setefano : Kau tagata fetaina mo tamana, kotou fakalogo mai ! Na sa loa le Atua o le kololia ki lotatou tamana ko Apalaamo, ka koi nofo a ia i le fenua o Mesopotamia, i mua o lana nofo i Salani ; ti na pati loa a ia kiate ia :

³ Mavae i lou fenua mo lou famili, o ano ki le fenua leia e kau fakasa atu loa kiate koe.

⁴ Ti na mavae loa a ia mei le fenua o le kau Kaletea, o nofo i Salani. I le oki o le mate o lona tamana, na too loa a ia e le Atua i lena, o aumai ki le fenua leinei e kotou nonofo ai nei.

⁵ Ti na leaise soli loa e ia kiate ia se ga kele i le fenua leinei, pe ko se ganea fua ke teki ai lona vae, kae na fakapapau loa e ia ke soli le fenua katoa ma ana, ti mo lona sakoga ki muli iate ia, kae na leikiai fua sana fanau.

⁶ Kae na folafola le Atua, o pati : E nofo loa lona sakoga i se fenua kese ; ti e fakapopulai loa latou ti mo fakavelivelii loa latou i lolotoga o fetuu e kau lelau fa.

⁷ Ti na pati loa le Atua : ko le puleaga leia ka lotou popula loa ki ai, ko au leia e tautea ia loa a ia. I le oki o le nea lena, e lotou mavae loa mei ai, o atolasio kiate au i le ganea leinei.

⁸ Ti na tuku loa e le Atua kia Apalaamo le sai o le silikosisio ; ti na tupu loa Isaake ia Apalaamo, o silikosisio e ia a ia i lona aso valu ; ti na tupu loa Sakopo ia Isaake, o silikosisio e ia ; ti na tupu loa ia Sakopo le kau pateliaka e tino agafulu tupu lua.

⁹ Ti na finenonofo loa le kau pateliaka kia Sosefo, o lotou fakatau loa a ia ke ave ki Esipito.

¹⁰ Kae na nofo loa le Atua mo Sosefo, o saofaki a ia i ona mamae fuli ; na soli loa e ia kia Sosefo le poto mo le kalasia i mua o Falaone, sau o Esipito, leia na fakanofo ia loa a ia ke kovana i Esipito, ti mo lona fale katoa.

¹¹ Ti na to loa se oge i le fenua katoa o Esipito, ti mo leia o Kanaane. Na lasi ai le mamae, ti na leaise koi maua e otatou tamana se nea kai.

¹² Ti na logo loa Sakopo na maua se fulumeto i Esipito, ti na kakau loa e ia ki ai otatou tamana, i se uluaki faiaga.

¹³ I le tua lua, na fakasa loa e Sosefo a ia ki ona fetaina, ti na iloa loa e Falaone le famili o Sosefo.

¹⁴ Ti na kakau loa e Sosefo ke afa mai lona tamana ko Sakopo, ti mo lona famili katoa, ko le tino fitu tupu lima.

¹⁵ Ti na ifo loa Sakopo ki Esipito, ti na mate loa a ia i ai, o tatau mo otatou tamana.

¹⁶ Ti na ave loa latou ki Siseme, o tuku ki le tanuma leia na totogi paaga e Apalaamo ki vosa o Amole i Siseme.

¹⁷ Na ofi mai loa le temi leia na tonu ke fakasoko ai le fakapapau leia na fai e le Atua kia Apalaamo ; ti na tupu loa o toka api ai le kakai i Esipito,

¹⁸ o kaku ki le sa o se tasi ake a sau leia na leaise iloa ia Sosefo.

¹⁹ Ko le sau lena, na fakakaka loa ki lotatou lanu, ti na fakavelivelii loa e ia otatou tamana o kaku ki lana fakamaua latou ke titiaki alatou fanau ke mamate.

²⁰ I le temi lena, na tupu loa Moisese, leia na fulumalie ki mata o le Atua. Na fagai loa a ia i ni masina e tolu i le fale o lona tamana ;

²¹ ti i lona tuku ke mate, na too loa a ia e le taine o Falaone, o taupau pe sona tama totonu.

²² Na ako loa Moisese i le poto katoa o le kau Esipito, ti na makeke a ia i masau mo gaoi.

²³ I lona fetuu kau fa, na tupu loa i lona loto ke fakatele a ia ki ona fetaina, ko vosa o Iselaele.

²⁴ Ti na tio loa a ia ki se tasi o latou na fakavelivelii e se tagata Esipito, ti na saofaki loa e ia lona taina, kae na tamate loa e ia le tagata Esipito leia na fakavelivelii ia lona taina.

²⁵ Talie na manatu a ia kua iloa e ona fetaina e fakamauli loa latou e le Atua ki lona lima, kae na leaise lotou matala loa.

²⁶ I leia ake a aso, na toe au loa a ia kia latou, o maua mai latou e vusu, ti na taofi loa e ia latou, o fakatokatoka, o pati : Kau tagata, ko fetaina koutou, kolea e kotou fefele ai ?

²⁷ Kae ko leia na fakavelivelii ia lona taina na tekei loa e ia Moisese, o pati : Ko ai na fakanofo ia a koe ke pule mo tui fakamaau kia matou ?

²⁸ Pe ke loto ke ke toe tamate au ofaipe lau tamate le tagata Esipito nanafi ?

²⁹ I le masau lena na sola loa Moisese, ti na ano loa a ia o nofo i le fenua o Matiane, leia na tupu ai loa ni vosa e toka lua.

³⁰ I le sili o fetuu e kau fa, na sa loa se aselo kiate ia i le toafa, i le mauga ko Sinai i le ula o se ulu vao kaka.

³¹ I le tio a Moisese ki le nea lena, na ofolele loa a ia i le sa lena ; ti i lana fakafeofi ke tio ki ai, na logo mai loa kiate ia le leo o le Aliki, o pati :

³² Ko le Atua au o ou tamana, ko le Atua o Apalaamo, mo Isaake, ti mo Sakopo. Ti na lulu katoa Moisese, ti na leaise mafai ke tio a ia.

³³ Na pati loa le Aliki kiate ia : Too ou taka i ou vae, talie ko le ganea leia e ke tuu ai ko se kele maokioki.

³⁴ Kua kau tio ki le mamae o loku kakai i Esipito, kua kau logo ki alatou tagi, ti kua kau ifo mai o fakamauli latou. Ano i le lakaga nei, e kau kakau loa a koe ki Esipito.

³⁵ Ko le Moisese lena, leia na lotou fakafiti ki ai, o pati : Ko ai leia na fakanofo ia a koe ko le pule mo le tui fakamaau ? Ko ia leia na kakau e le Atua ko le pule ti mo le fakamauli i le tokoi a le aselo leia na sa kiate ia i le ulu vao.

³⁶ Ko ia leia na fakamavae ia loa latou mei Esipito, ti na fai ia loa ni nea fakaofolele mo ni milakulo i le fenua o Esipito, mo le Tai Kula, ti mo le toafa, lolotoga o fetuu e kau fa.

³⁷ Ko le Moisese lena, leia na pati loa ki vosa o Iselaele : E fakatuu ake loa kia koutou e le Atua i okoutou fetaina se polofeta ofaipe au.

³⁸ Ko ia leia, i le fakatasi i le toafa, na nofo mo le aselo leia na masau kiate ia i le mauga o Sinai ti mo otatou tamana, na tali ia a folafola mauli, ke tuku mai kia koutou.

³⁹ Na leaise fia fakalogo loa o tatou tamana kiate ia, kae na lotou tekei loa a ia, ti na lotou fakamaliu loa olatou loto ki Esipito,

⁴⁰ ti na lotou pati loa kia Alone : Fau kia tatou ni taulaatua ke saele i mua o tatou ; talie ko le Moisese leinei na fakamavae ia tatou mei Esipito, e leaise tou iloa pe kolea le nea kua soko kiate ia.

⁴¹ Ti i aso ana, na lotou fau loa se uviki pipi, ti na lotou momoli loa se sakilifisio ki le taulaatua, ti na lotou fiafia loa i gaoi o olatou lima.

⁴² Koia na maliu ai loa le Atua meia latou ti na tuku loa e ia latou ke atolasio ki fetuu o le lagi, o mulimuli ki le nea leia e tuu i le tosi a le kau polofeta : Pe na kotou momoli mai kiate au ni vikitima mo ni sakilifisio Ilolotoga o fetuu e kau fa i le toafa, fale o Iselaele ?

⁴³ Na kotou amo le falela o Moloke Ti mo le fetuu o le taulaatua ko Lemifani, Ko fakatata ana na kotou fau ke atolasio ki ai ! Koia e kau ave ai loa kotou ki mamao atu i Papilone.

⁴⁴ Na nofo otatou tamana i le toafa mo le falela o le fakamaoki, o mulimuli ki le fakatotonu a leia na pati kia Moisese ke fau a ia o mulimuli ki le paaki leia kua tio a ia ki ai.

⁴⁵ I le oki o lalatou fau le falela, na fakaulu loa a ia e otatou tamana, i le taki a Sosue, ki le fenua leia na lotou maua mei puleaga ala na kapu e le Atua i olatou mua, ti na nofo ai loa a ia o kaku mai ki aso o Tavite.

⁴⁶ Na maua loa e Tavite se kalasia i mua o le Atua, ti na kole loa e ia ke laga se nofoaga ki le Atua o Sakopo ;

⁴⁷ ti ko Salomone leia na fakatuu ia loa kiate ia se fale.

⁴⁸ Kae e leaise nofo le Taualuga i le nea leia na fai e le lima o le tagata, ofaipe lona fakasa e le polofeta :

⁴⁹ Ko le lagi ko loku ekeekeaga fakasau, Ti ko le kele ko loku tekiaga vae. Ko le fale fea leia e kotou fau mai loa kiate au, Pe ko fea loa loku maloloaga ?

⁵⁰ Pe leaise ko loku lima leia na fau ia a nea fuli ana ?…

⁵¹ Tagata ulu fefeka, mo lee silikosisio i le loto mo le taliga ! E kotou fakafesagai tuumau ki le Laumalie Maokioki, koutou ofaipe okoutou tamana.

⁵² Ko ai i le kau polofeta na leaise fakavelivelii e okoutou tamana ? Na lotou tamate ala na fakasa fakatomua ia le saele mai o le Tagata Agatonu e Tasi, leia na kotou fakatau i aso anei, ti kua kotou tamate,

⁵³ e koutou ala na tali ia le lao mei le kau aselo, kae na leaise kotou fai a ia !…

Mate o Setefano

⁵⁴ I lalatou logo ki masau ana, na itaita loa i olatou loto, ti na lotou gugu loa olatou nifo kiate ia.

⁵⁵ Kae na apele loa Setefano i le Laumalie Maokioki, o tio fakamaumau ona mata ki le lagi, ti na tio loa a ia ki le kololia o le Atua, ti mo Sesu e tuu i le fetuu atamai o le Atua.

⁵⁶ Ti na pati loa a ia : Ko leinei, e kau tio ki le lagi kua mavaa ti mo le Vosa o le tagata e tuu i le fetuu atamai o le Atua.

⁵⁷ Ti na lotou kalaga loa o leo lasi, mo tapono olatou taliga, o feoso fakatasi fuli kiate ia,

⁵⁸ o toso a ia ki le tua kolo, ti na lotou tuki fatui loa a ia. Na tuku loa e le kau tagata fakamaoki olatou kofu ki vae o se tupulaga na igoa ko Saulo.

⁵⁹ Ti na lotou tuki fatui loa Setefano, leia na faikole, o pati : Aliki Sesu, tali loku laumalie !

⁶⁰ Ti na tuutuli loa a ia, o kalaga leo lasi : Aliki, aua na ke tuku kia latou le agasala leinei ! Ti i le oki o masau ana, na moe loa a ia.