Gaoi 4 - Tosi Tapu

Petelo mo Soane i mua o le fono lasi

¹ Koi lolotoga masau Petelo mo Soane ki le kakai, kae na feoso ake loa le kau tagata faisakilifisio mo le pule o le fale tapu, ti mo le kau Satuseo,

² i lolatou ita i lala akonaki ki le kakai, o fakasa le toe tuuake o Sesu mei le kau mate.

³ Ti na lotou too loa laua, o velo ki le pilisoni o kaku ki leia ake aso ; talie ko le afiafi lena.

⁴ Kae na tui loa se toka api o latou ala na logo ki le folafola, ti na lau loa ki tino afe e lima le api o tagata.

Masau a Petelo ki le fono lasi

⁵ I leia ake aso, na fakatasi loa ki Selusalemi le kau pule o le kakai, mo le kau fakamatuatua, mo le kau sekelipa,

⁶ mo Anasi, ko le pule faisakilifisio, mo Kaifa, mo Soane, mo Alesatelo mo latou fuli ala na kau ki le sakoga o le kau pule faisakilifisio.

⁷ Ti na lotou fakatuu loa Petelo mo Soane i lotomalie o latou, ti na lotou vesili loa kia laua : Ko le makeke fea, ti ko le suafa o ai, leia na kolua fai ai le nea lena ?

⁸ Ti ko Petelo, na apele i le Laumalie Maokioki, na pati loa kia latou : Kau pule o le kakai, mo kau fakamatuatua o Iselaele,

⁹ talie kua fakavesili maua i le aso nei o tupu ko se gaoi malie kua fai ki se tagata masaki, o tupu ke ma fakasa pe na feaki lona fakamauli,

¹⁰ ke kotou iloa fuli, ti ke iloa e le kakai katoa o Iselaele : Ko le igoa o Sesu-Kilisito mei Nasaleti, leia na kotou tutuki i le koluse, kae kua toe fakatuuake e le Atua mei le kau mate, ko ia leia kua tuku ia le malolo katoa ki le tagata leinei e tuu i okoutou mua.

¹¹ Ko Sesu Ko le fatu leia na tiaki e koutou ala na laga ia, Ti kua liliu a ia ko le fatu tafito o le agele.

¹² E leaise fakamauli i se tasi kese, talie e leaise se tasi ake igoa i le lalo lagi nei kua soli ki le tagata, leia e tonu ke tou mauli ai.

Tapu o le akonaki i le suafa o Sesu

¹³ I lalatou tio ki le tuu makeke o Petelo mo Soane, na lotou punamauli ai, talie na lotou iloa ko ni tagata laua o le kakai, ala na leaise sekola ; ti na lotou iloa na la nonofo mo Sesu.

¹⁴ Kae i lalatou tio ki le tuu o le tagata leia kua fakamauli i ola tafa, na leaise lotou maua ia loa se tali.

¹⁵ Ti na lotou fakatotonu loa kia latou ke lotou mavae ki fafo mei le fono lasi, kae lotou fonofono mua ia latou tefua, o pati : Kolea loa le nea leia e tonu ke tou fai ki tagata ana ?

¹⁶ Talie kua sa ki le kakai katoa o Selusalemi kua la fai le milakulo lasi lena, ti e leaise mafai ke tou fakafiti ki ai.

¹⁷ Kae, o tupu ke aua na toe mafola le nea leinei i le kakai, tou tapui fakamakeke kia laua le toe masau ki se tasi ki le igoa lena.

¹⁸ Ti na lotou kalagai loa laua, ti na lotou tapui fakamakeke loa kia laua le masau mo le akonaki i le suafa o Sesu.

¹⁹ Ti na tali loa Petelo mo Soane kia latou : Kotou tio pe totonu i mua o le Atua ke ma fakalogo ake kia koutou i le Atua ;

²⁰ talie e leaise mafai ke aua na ma masau ki le nea leia kua ma tio mo logo ki ai.

²¹ Na lotou toe fai loa kia laua ni iki fakaii foou, ti na lotou tuku loa laua ke ano, talie na leaise lotou iloa se nea ke fakatua ai laua, o tupu ko le kakai ; talie kua fakakololia le kakai katoa ki le Atua o tupu ko le nea leia kua soko.

²² Talie kua fetuu kau fa tupu le tagata leia na soko ki ai le milakulo lena.

Faikole a le kau kilisiteano

²³ I lola tuku ake, na la ano loa ki ola kaukaunea o fakamatala kia latou a nea fuli ala na pati ake ki ai le kau pule faisakilifisio mo le kau fakamatuatua.

²⁴ I lalatou logo ki le fakamatala lena, na lotou siki ake loa ki le Atua olatou leo, e latou fuli fakatasi, o pati : Aliki, ko koe leia na fakatupu ia le lagi, mo le kele, mo le tai, mo nea fuli ala e maua i ai,

²⁵ ko koe leia na fakasa ia i le Laumalie Maokioki, i le gutu o lomatou tamana, lau tagata fakasausau ko Tavite : Kolea le maveuveu lena i puleaga, Ti mo ni manatu vaiga ana i kakai ?

²⁶ Kua malaga ki aluga a sau o le malama nei, Ti kua fakatasi a pule Oagatuu ki le Aliki mo lona Kilisito.

²⁷ Talie e maoki na fakatasi Elote, mo Posio Pilato i le kolo leinei, mo atu puleaga, ti mo kakai o Iselaele, o agatuu ki lau tagata fakasausau maokioki ko Sesu, leia na ke fakanofo,

²⁸ o fai a nea fuli ala na fakatuutuu fakatomua e lou lima ti mo lou poto.

²⁹ Ti ko leinei, Aliki, tio ki alatou fakaii, ti ke tuku ki au tagata fakasausau ke lotou fakasa lau folafola i le makeke katoa,

³⁰ o falo lou lima, o tupu ke fai ni fakamauli, mo ni milakulo, ti mo ni nea fakaofolele i le suafa o lau tagata fakasausau maokioki ko Sesu.

³¹ I le oki o lalatou faikole, na galulu loa le ganea leia na lotou fakatasi ai ; ti na lotou apele fuli loa i le Laumalie Maokioki, ti na lotou fakasa loa le folafola a le Atua i le makeke katoa.

Mauli vaevae o le kau kilisiteano

³² Na loto tasi mo laumalie tasi latou fuli ala na tui. Ti na leaise pati se tasi ko nea ala e maua e ia ko ana nea, kae na fakatasi alatou nea fuli.

³³ Ti na fakamaoki le kau apositolo ki le toe tuuake o le Aliki Sesu i le makeke katoa, ti na nofo ia latou fuli se kalasia lasi.

³⁴ Talie na leaise tasi fua ia latou na fakaaloalofa : ko latou fuli ala na maua ia ni kele pe ko ni fale na fakatau ia latou, ti na lotou aumai le totogi o nea ala kua lotou fakatau,

³⁵ o tuku ki vae o le kau apositolo ; ti na fai loa ni tufa kia latou taki toka tasi o mulimuli ki le nea leia e aoga kiate ia.

³⁶ Ko Sosefo, leia na fakaigoa e le kau apositolo ko Palenapa, (ko lona uiga ko le vosa o le fakapelepele), tagata Levita, mei le motu ko Sipele,

³⁷ na fakatau ia loa se faisaga leia na maua e ia, ti na aumai loa e ia le paaga, o tuku ki vae o le kau apositolo.